Esita 4

Modekai alombeza wambizi kwa Esita

1Modekai eze abunkule izimbuli zilaile niyo atatula izisuche zakwe, avala majuniya na kwebuluga maivu. Niyo ajinka mgatigati momzi akaila kwa izwi kulu dya usungu. 2Kaita niyo akuchimala ko mwingilo we idizumba dya seuta, kwaviya hahana mntu yoyose akulekeilwa engile kuno akatenda kavala majuniya. 3Mwe chila mkowa, iviya idilagizo dya seuta dize ditambaliswe, niyo kwatenda na malombolezo makulu mwa Awayuhudi. Wafunga na kwila, walozize mgati mwawo niyo wagona mwe maivu wakatenda wavika majuniya.

4Umo awandima wechivyele na awatumigwa wa malikiya Esita weze wamgambile izimbuli za Modekai niyo asusuhala vitendese. Kamwigaila Modekai shuche vileke avale ukaleka amajuniya, mna Modekai niyo azilemela. 5Esita niyo amwitanga Hataki yumwenga ywa awandima wafuntigwe wa seuta asagulwe ni seuta amsankanile Esita, amsigila aite akamuze Modekai kulaila mbwani naho kwambwani. 6Hataki niyo ambasa Modekai kwechiwasa, kulongozi komwingilo we idizumba dya seuta. 7Modekai niyo amtamuila Hataki mbuli zose zimlaile na uwazwa wa amayuwe ye ichumbu Hamani agambile nalihe na kwika mwe ichumba chokwiya izimpamba cha seuta uneva Wayahudi wose nawakomwe. 8Iviya niyo amwinka ibaluwa iyo ye idigong'ondo wendile utambaliswa komzi wa Shushani ukulagiza Wayahudi wose wakomwe amwigaile Esita, amgambile izimbuli ivyo zili. Modekai kamgamba uyo mndima amlahilize Esita aita akamweile seuta na kumlombeza awawonele mbazi Wayahudi, wantu wakwe Esita. 9Hataki niyo auya kwa Esita na kumgambila mbuli zose alongile Modekai. 10Esita niyo amgamba Hataki auye kwa Modekai akamgambe vino, 11“Awandima wose wa seuta na awantu wose we imikowa yose wavimanya kugamba mntu yoyose yudya anengila kwebalaza ya kundani na kumuwona seuta uneva hetangwe uyo akomwa. Akudaha kuhona ni yudya du seuta namchulusize inkome yakwe ye izahabu vileke amhonye. Mna miye sitangwe ni seuta, vino haluse ubula mwezi mjima.”

12Modekai eze agambilwe ulosi uwo wa Esita, 13Modekai amgamba Hataki akamfunde Esita vino, “Usekufanyanya kugamba kwaviya weye wimweidizumba dya seuta nowikale mpeho vitendese ukaleka Myahudi mtuhu yoyose yudya. 14Ichipindi chino unanyamala du, wambizi nauwezile Wayahudi kulawa kwembingu, awo nawakombolwe, mna weye nokomwe na awelekwa wa tati yako nawakomwe. Ni yuhi amanyize mafani weye kutendwa malikiya kwachausa cha chipindi sachino!”

15Esita niyo egala ulosi kwa Modekai amhitula vino, 16“Hita kawachisanye hamwenga Wayahudi wose wa kwikala komzi wa Shushani. Fungani msekudya hegu kunywa kwa mazuwa matatu, chilo na msi kwachausa changu. Miye hamwenga na awandima wangu we chivyele nachidamanye seivyo. Vikaheza nanimbase seuta, hata hegu ni kuhiga isigilizi. Hegu ni kukomwa leka nikomwe.”

17Ivyo, Modekai niyo aita zakwe akudamanya saviya agambilwe ni Esita.