Esita 5

Esita awagoneka seuta na Hamani kwengasu

1Zuwa dya katatu dyo ukufunga kwakwe, Esita niyo avala izisucha zakwe ze ichimalikiya, niyo aita akuchimala kwebalaza ya kundani ye idizumba dya seuta, kuhinga koukumbi wa seuta. Seuta nendile eyuko kekala mwe ichigoda chakwe cho useuta akasinya komwingilo wo kwingila kwe idizumba dya seuta. 2Seuta eze amuwone malikiya Esita kachimala aho niyo awagizwa nuyo, vyaleka amchulusiza inkome yakwe ye zahabu yendile kaitoza mo mkono wakwe. Ivyo, Esita niyo asogela na kukufya imbulo ye inkome ya seuta. 3Aho seuta niyo auza, “Esita waunga mbwani? Nigambila icho ukunga, nahwinke hata hegu ni inusu yo useuta wangu.”

4Esita niyo amhitula, “Hegu vyakuwagila, weye seuta, dyelo wize hamwenga na Hamani kwengasu ye inkande humalanya kwachausa chako weye seuta.”

5Seuta niyo alagiza mndima ywakwe akamwitange Hamani asunguze kwiza, saviya Esita alombeze. Ivyo, seuta na Hamani niyo waita kwengasu iyo ye inkande imalanywe ni Esita. 6Umo wakanywa idivai, seuta niyo amuza vituhu Esita, “Waunga mbwani? Nigambila, weye nopate. Lombezo dyako ni mbwani? Hata hegu ni inusu yo useuta wangu nawinkigwe.”

7Esita niyo amhitula lombezo dyangu nidino, 8“Hegu vyakuwagila, weye seuta, zumila idilombezo dyangu, nalombeza weye na Hamani luvi mwize kwe ingasu ntuhu hunga nimalanye kwachausa chenyu. Aho nahugambile idilombezo dyangu.”

Hamani adya njama za kumkoma Modekai

9Hamani kakulawa uko kwengasu akatenda kelelwa vitendese, moyo wakwe usangala. Mna eze amuwone Modekai henchili ye idizumba dya seuta hakuchimala naho hakumzingiziza, Hamani niyo amwihiwa vitendese. 10Mna, Hamani kajijimiza du niyo aita zakwe kunyumba. Akaheza niyo awagoneka wambuyaze kunyumba kwakwe, iviya kamgoneka mkaziwe Zeleshi atende hamwenga nawo. 11Hamani niyo akonga kweduvya mwawo ko ugoli wakwe ulozize na wanawe we chilume walozize na ivyo seuta amtendile mkulu na ivyo enkigwe usekulu kujinka masekulu wose wa seuta. 12Hamani niyo ajendeleza kweduvya, “Ukaleka ayo, malikiya Esita hagoneke mntu mtuhu ukaleka miye na seuta. Iviya hata luvi kachigoneka miye na seuta. 13Mna hamwenga na ayo yose, haviniwagile hegu nanijendeleze kumuwona yudya Myahudi Modekai heinchili ye idizumba dye ichiseuta.”

14Ivyo, Zeleshi mkaza Hamani na wambuyaze wose wamgamba vino, “Damanya mti wa kunyulikila wantu, utali wakwe futi milongo mfungate na shano. Luvi mtondo wadaha ulonge na seuta vileke Modekai anyulikwe mlanga momti uwo, ukaheza wite kwengasu ukadye na seuta kwa mbwedo.”

Mbuli iyo imwelela Hamani, niyo adamanya mti wa kunyulikila wantu.