Esita 6

Seuta amwinka ntunyo Modekai

1Chilo icho, seuta hapatile ntongo. Ivyo niyo alagiza ichitabu chikuwandikwa mbuli zilaile mo useuta wakwe chigalwe chisomwe kulongozi kwakwe. 2Umo wakasoma niyo hawoneka hantu hawandikwe ivyo Modekai abunkule injama yo kumkoma seuta idamanywe ni Bigitana na Teleshi, wandima waidi mgati mwa awandima wa seuta wendile wamizi we ivyumba vya seuta. 3Seuta niyo auza, “Togolani, Modekai chimwinka ntunyo hegu jeleko dyani kwe imbuli ino?”

Awandima wakwe niyo wamhitula, “Hudamanye mbuli kwachausa chakwe.”

4Seuta niyo auza, “Kwebalaza kuna sekulu yoyose?”

Ichipindi icho, Hamani nendile kengila kouwa wa kuse we idizumba dya seuta, keza kwa seuta kulombeza vileke Modekai anyulikwe momti wo kunyulikila amdanyize. 5Elo, awandima awo niyo wamhitula seuta, “Hamani nuyo eyuko kungwelo.” Seuta niyo agamba.

“Mgambeni engile kunyumba.”

6Hamani eze engile kunyumba, seuta niyo amuza, “Togola nimtendele mbwani mntu yudya hungisa nimwinke ntunyo?”

Hamani niyo afanyanya momoyo wakwe, “Ni yuhi mtuhu uyo seuta akunga amtunye ukaleka miye?”

7Elo, Hamani niyo amhitula seuta, “Mntu uyo seuta aunga amtunye, 8viwagila awandima wa seuta wamwigaile suche zedi zing'aile zivaligwe ni seuta na falasi ihezize kukwelwa ni seuta. 9Naho yumwenga ywa awalangilizi wako wakutunyiswa, amvise uyo mntu izisuche izo ze ichiseuta na kumlongoila mwe izisila zomzi akatenda kakwela falasi, kuno akatowa lugong'ondo, ‘Vino nivyo akutendelwa mntu yudya seuta akunga kumwinka ntunyo.’”

10Aho, seuta niyo amgamba Hamani, “Sunguza! Guha izisuche izo ne ifalasi ukamwinke ino intunyo Modekai, yudya Myahudi akwikala henchili ye idizumba dye ichiseuta. Usekuleka kumdamanyiza hata mbuli imwenga mgati mwe izo ulongile.”

11Ivyo, Hamani niyo aguha izo izisuche amvisa Modekai, niyo amjendeza mwe izisila zo umzi akatenda mlanga mwe ifalasi ya seuta, kuno atambalisa, “Vino nivyo akutendelwa mntu yudya seuta akunga kumwinka ntunyo.”

12Vikaheza, Modekai niyo auya he inchili ye idizumba dye ichiseuta. Mna Hamani niyo agulukila kunyumba kwakwe, kahuza naho kegubika mo uso wakwe awona soni. 13Uko niyo awatamwila mkaziwe Zaheshi na awambuyaze wose izimbuli zose zimlaile. Zaleshi na awo awambuyaze niyo wamgamba, “Hegu Modekai uyo ukongile kwaza usekulu wako kwakwe ni Myahudi, elo, weye homdahe, nakuhude.”

Hamani akomwa

14Umo wachei walonga naye, awandima wa seuta niyo weza wasunguza kumguha Hamani waita naye kwengasu idamanywe ni Esita.