Esita 7

1Elo, seuta na Hamani niyo waita wakudya nkande kwengasu imalanywe ni malikiya Esita. 2Mwe idizuwa dya kaidi, umo wakanywa idivai, seuta niyo amuza vituhu Esita, “Malikiya Esita waunga mbwani? Nigambila nawe nowinkigwe. Lombezo dyako ni mbwani? Hata hegu ni inusu yo useuta wangu nahwinke.”

3Malikiya Esita niyo amhitula, “Uneva sizumilwa kwako, weye seuta, naho hegu waunga uninke idilombezo dyangu, lombezo dyangu ni miye na awantu wangu chijendeleze kusigala no ujima. 4Kwaviya miye na awantu wangu chitagwa chikomwe. Hegu chatagigwe du chitende watumwa wa chilume na wachivyele nasinyamala dwii, kwaviya nkunto saino hayachintile hutumbwadise weye seuta. Hata chikakomwa hahana mnkondo navuze ukwazwa kuno kwa seuta. Mna chaungwa chikomwe!”

5Aho, seuta Ahasuelo niyo amuza malikiya Esita, “Uyo akujeza kudamanya imbuli iyo ni yuhi? Mntu uyo ekuhi?”

6Esita niyo amhitula, “Mnkondo ywetu mkulu na akuchisulumiza ni yuno mwihi Hamani!” Aho, Hamani niyo engila luchenyenta kulongozi kwa malikiya na seuta. 7Seuta niyo achimala chimayamaya, afosa kwechumba che ingasu ye idivai kaita kuse kwe ivibuta vye idizumba dye ichiseuta. Hamani eze awone seuta aunga amkantile niyo asigala kunyuma vileke amweile malikiya Esita ahonye ujima wakwe. 8Nyumani seuta niyo auya kulawa kwe ivibuta, eze engile kwechumba wendile wakanywa idivai kambwila Hamani kedula hajihi ne idikochi ekale Esita. Seuta eze awone ivyo niyo agamba, “Yuno mntu aunga amkakalise na kumgonya malikiya kulongozi kwangu, naho mndani mwe idizumba dye ichiseuta?” Ahadya seuta hanati kubinda ukulonga, awandima wa seuta niyo wamgubika uso Hamani. 9Vikaheza, Halibona yumwenga ywa wadya awandima wakumsankanila seuta, niyo agamba, “Hamani kadamanya mti wa kumnyulikila Modekai uyo ahonyize ujima wako, weye seuta. Mti uwo una utali wa futi milongo mfungate na shano wicheyuko kwenyumba yakwe.” Aho, seuta niyo alagiza, “Mnyulikileni Hamani mlanga mo umti uwo!”

10Elo, Hamani niyo anyulikilwa aho homti wo kunyulikila endile kaudamanya kwachausa cha Modekai. Ivyo, amaya ya seuta niyo yasila.