Esita 8

Wayahudi walekwa wegombele

1Idizuwa idiya, seuta Ahasuelo niyo amwinka malikiya Esita ugoli wose wa Hamani, mnkondo ywa Wayahudi. Esita niyo amgambila seuta kugamba Modekai ni mntu ywe ikaya yakwe. Elo, kukongela aho, Modekai niyo alekwa engile kumuwona seuta. 2Seuta niyo avula impete yakwe yokujeila idihula amhokile Hamani amwinka Modekai. Esita naye niyo amwinka Modekai usekulu mo ugoli wa Hamani.

3Vikaheza, Esita niyo alonga vituhu na seuta, kedula hasi heviga vya seuta kuno aila, kamweila seuta vileke alekeze injama ihiye wa Hamani mwelekwa yo ulukolo lwa Agagi apangile mkuwadamanyiza Wayuhudi. 4Seuta niyo amchulusiza Esita inkome yakwe ye izahabu, Esita niyo achimala amgamba, 5“Hegu ukaunga, weye seuta, naho hegu waniwona mbazi na kuwona vyawagila, hampu lavya lagizo dya kusa izinjama za Hamani iyo Hamani apangile zidamanywe. Njama iyo ni idya ya Hamedata mwana ywa Agagi apangile vileke awakome Awayahudi wose mwe imikowa yose. 6Kwaviya nanijijimize vivihi hawona awantu wangu wabalangwa na awantu we ikaya yangu wakomwe?”

7Seuta Ahasuelo niyo awagamba malikiya Esita na Modekai, “Kaulani Esita simwinka ugoli wa Hamani, uyo wamnyulike kale kwachausa che izinjama zakwe mwa Awayahudi. 8Mwadaha kuwawandikila Wayahudi chochose mkunga. Naho mwadaha kuwandika kwa zina dyangu na kujela hula dya chiseuta, kwaviya gong'ondo dilavigwe kwa zina dya seuta na kujelwa hula dya seuta, hadikudaha kuhituilwa.”

9Elo, mweidizuwa dya milongo midi na ntatu dyo umwezi wa katatu ukwitangwa Siwani, Modekai niyo awetanga wata kuwandika wose wa seuta, kawalagiza wawandike baluwa kwa Awayahudi na awakulu na ivilongozi na amasekulu we imikowa yose gana dimwenga milongo midi na mfungate, kukongela Indiya kubula Kushi, kugamba Isiopia. Baluwa izo ziwandikwa kwa chila mkowa na chila longa dyakwe na miandikilwe yakwe, iviya kwa Wayahudi. 10Modekai nendile kawandika izibaluwa izo kwa zina dya seuta Ahasuelo niyo azijela hula kwa mpete ya seuta. Wazigale wendaga wasigilwa wa seuta wakwela falasi zina nguvu zikugulukisa. 11Kweisila ye izibaluwa izo seuta kawaleka Wayahudi mwe chila mzi kwechisanya vileke wadime uwikazi wawo. Nendile walekeilwa kubalanga na kukoma hehena mbazi na kubalanga bunga dyodyose dya wantu hegu mkowa nadiwebunge kwa viziha hamwenga na awavyele wawo na awana wawo na kutaha ugoli wawo. 12Mbuli iyo imalanywa idamanywe mwe imikowa yose ya seuta Ahasuelo, mwe idizuwa dya mlongo na ntatu dyo umwezi wa mlongo na mbili, kugamba, Adali. 13Baluwa zo ulugong'ondo ulo zilavigwa saviya sigilizi mwe chila mkowa zigalwa kwa chila mntu mwe chila mkowa, vileke Wayahudi wemalanye kulihiza chikoda idizuwa idyo dikabula. 14Kwa lagizo dya seuta, wandima wakweile mwe falasi zina nguvu zikugulukisa, wahalawa na nguluko. Lugong'ondo ulo iviya lutambaliswa komzi umkulu wa Shushani.

15Modekai niyo ahalawa he idizumba dya seuta kulongozi kwa seuta, akatenda kavala suche za chiseuta zibuluu na ing'aile, juba dyedi didolonywe dizambalau na chilemba chikulu cha zahabu, wantu wo umzi wa Shushani nendile wamema chinyemi na nchelejele. 16Wayahudi mo umzi wa Shushani niyo wamema mbwedo na wantu watuhu wawatunya. 17Mwe chila mkowa na chila mzi, hohose hadya ulugong'ondo ulo lusomigwe, Wayahudi welelwa na kutowa nchelejele, niyo wadamanya ngasu na kuhumula, wantu watuhu walozize nawo niyo wetenda kugamba ni Wayahudi, kwaviya wawogohesa Wayahudi.