Esita 9

Wayahudi wawakoma awankondo wawo

1Dize dibule idizuwa dya mlongo na ntatu dyo umwezi wa mlongo na mbili, kugamba mwezi wa Adali, zuwa idyo nidyo nolujeswe ulugong'ondo lulagizwe ni seuta, wankondo wa Wayahudi nendile waika msuhi kugamba nawawahude Wayahudi, mna zuwa idyo niyo dyahitulwa kutenda uhuda kwa Wayahudi. 2Wayahudi nendile wechisanya mwe imizi yawo mwe imikowa ya seuta Ahasuwelo kuwebunga wadya nawakalonda kuwakoma. Hakuna yoyose adahile kuhigana anawo kwaviya wantu we izisi ntuhu zose nawakawogoha. 3Niyo vyatenda ivilongozi wose we imikowa na masekulu na wakulu wa wagomba nkondo niyo wawabiza Wayahudi kwaviya wose wamogoha Modekai. 4Modekai nendile ni mntu amanyikise mwe idizumba dye ichiseuta, mbuli zakwe zitambaliswa mwe imikowa yose kugamba udahi wakwe nendile ukajenyela vitendese. 5Ivyo, Wayahudi niyo wawebunga awankondo wawo kwa mabamba wawachinja na kuwakoma wawadamanya saviya waungile.

6Ukodu komzi umkulu wa Shushani, Wayahudi wakoma wantu magana mashano. 7Iviya wawakoma Palishandata na Dalifoni na Asipata, 8na Polata na Adaliya na Alidata, 9na Palimashita na Alisai na Alidai na Waizata, 10awo wendaga ni wana mlongo wa Hamani mnkondo ywa Wayahudi, awo ni wezukulu wa Hamedata. Mna hawatahile vintu.

11Idizuwa idyo, seuta niyo agambilwa uwazwa wa awantu wakomigwe mo umzi umkulu wa Shushani. 12Ivyo, seuta amgambila malikiya Esita, “Mo umzi umkulu wa Shushani uwodu, Wayahudi wakoma wantu magana mashano hamwenga na awana mlongo wa Hamani. Togola, wafanyanya uko kwe imikowa imituhu wadamanya mbwani! Haluse waunga mbwani? Kwaviya naudamanyizwe. Nigambambila icho chisigale, nacho nawinkingwe.”

13Esita niyo ahitula, “Weye seuta, ukawona vyawagila, luvi waleke Wayahudi wavuzagize vituhu viya wadamanye dyelo. Naho, lagiza ivimba vya wana mlongo wa Hamani vilungikwe kwe imiti yo kunyulikila.” 14Seuta niyo alagiza imbuli iyo idamanyike. Gong'ondo niyo dyatambaliswa komzi wa Shushani. Awana mlongo wa Hamani niyo wanyulikwa molumpe. 15Mwe idizuwa dya mlongo na nne dyo umwezi wa Adali, Wayahudi wadugana vituhu, niyo wakoma wantu magana matatu watuhu komzi wa Shushani. Mna hawatahile ivintu vyawo.

16Wayahudi wendile kwe imikowa imituhu, iviya nawo wemalanya kwegombela ujima wawo. Wehonya kulaila kwa awankondo wawo kwa kukoma wantu elufu sabini na shano. Mna hawatahile ivintu vya awankondo wawo. 17Mbuli iyo itendeka mwe idizuwa dya mlongo na ntatu dyo umwezi wa Adali. Zuwa ditimile dya mlongo na nne, niyo wahumula, waditenda ni zuwa dya ngasu na mbwedo. 18Wayahudi wendile komzi umkulu wa Shushani, iviya waduganaga mwe idizuwa dya mlongo na nne, mna hawahumule, mna niyo wahumula zuwa dya mlongo na shano. Ngasu yawo waidamanya mwe idizuwa dya mlongo na shano kwa mbwedo na nchelejele. 19Kwachausa icho, nivyo vikuleka Wayahudi wakwikala kwevijiji na kwe imizi imidodo wadamanya ngasu mwe idizuwa dya mlongo na nne dyo umwezi wa mlongo na mbili wekana majeleko. Mna wadya wakwikala kwe imizi imikulu wadamanya ngasu mwe idizuwa dya mlongo na shano dyo umwezi wa mlongo na midi saviya zuwa dya kuhumula, iviya wegailana majeleko.

Ngasu yo uhuda wa Wayahudi

20Modekai kawandika izimbuli izo zose na kuzituma mwe baluwa kwa Wayahudi wose wendile wakekala mwe imikowa ihajihi na ihale yo useuta wa Ahasuelo. 21Kawagamba chila mhilimo wadamanye ngasu, zuwa dya mlongo na nne na zuwa dya mlongo na shano dyo umwezi wa Adali, 22kwaviya mwa amazuwa ayo, Wayahudi wawahudaga awankondo wawo mwa amazuwa ayo, yendaga mazuwa ayo chinyulu na ndilo yawo niyo yahituka kutenda mbwedo na chinyemi. Walagizwa wayakumbuke amazuwa ayo kwa kudamanya ngasu na kwigailana majeleko na nkande na kuwenka vintu wantu wachiwa. 23Ivyo, Wayahudi niyo wazumila kujendeleza kudamanya ingasu iyo wakongile na kutimila amalagizo ya Modekai awalagize.

24Kwaviya Hamani mwana ywa Hamedata mwelekwa ywo ulukolo lwa Agagi mnkondo ywa Wayahudi nendile kadamanya njama ihiye mwa Wayahudi vileke awakome, iviya nendile katowa tegatega, kugamba ni asagule zuwa dya kuwahonda na kuwakoma Wayahudi. 25Mna Esita eze aite kwa seuta, seuta niyo alavya lagizo kwa kuwandika kugamba njama idya ihiye iyo Hamani adamanye kwalanga Wayahudi, imuwiye uyo mwenye na kugamba Hamani na wanawe wanyulikwe na kukomwa mo umti wo kunyulikila. 26Elo, zuwa idyo niyo waditanga Pulimu, kuligana na ulosi puli, kugamba kutowa tegatega. Kwachausa che ibaluwa ya Modekai ne izimbuli wawone wenye na kuwalaila. 27Wayahudi niyo waitenda ni mazwela mwawo na awelekwa wawo na mntu yoyose akunga ekale mwawo, kugamba mwe chipindi chisiku chila mhilimo, hehena kuswesa, mazuwa ayo amaidi kujeswe chinyemi cha ngasu kuligana na amalagizo ya Modekai. 28Iviya, wevana kugamba chila kaya ya Wayahudi na cheleko kwa cheleko na mwe chila mkowa na chila mzi waungwa wakumbuke kutowa tegatega mazuwa yose.

29Elo, mo ukulu wakwe malikiya Esita mwana ywa Abihaili niyo awandika baluwa hamwenga na Modekai Myahudi kulagisa kugamba yadya awandike Modekai aho nkongo kulanga idizuwa dyo kutowa tegatega ni chindedi. 30Modekai niyo asigila izibaluwa izo zigalwe mwe imikowa yose gana dimwenga milongo midi na mfungate yo useuta wa Ahasuelo. Izibaluwa izo nendile zikawaungila Wayahudi utondowazi na kwikala mpeho. 31Iviya kahikiliza kuwagambila awo na wana wawo wadamanye ingasu ya Pulimu mwe ichipindi chakwe chikigwe, saviya wakukumbuka amazwela yo ukufunga chipindi cha kulomboleza. Malagizo ayo yalavigwa ni Modekai na malikiya Esita. 32Lagizo dya Esita ilavyanya izimbuli zo kutowa tegatega niyo yawandikwa mwe ichitabu che izimbuli zilaile.