Nehemiya 8

Ezila awasomela wantu Sigilizi

1Mo mwezi wa mfungate wantu wose wa Izulaeli nendile wakekala mwe imizi yawo. Vikaheza kwa niya imwenga, niyo wechisanya komzi wa Yelusalemu mwe chiwasa chihajihi ne Inchili ya Amazi. Niyo wamgamba Ezila, uyo mhinya sigilizi naho mlavyantambiko alete ichitabu che Isigilizi ya Musa iyo Chohile alagize kwachausa cha Waizulaeli. 2Ezila niyo egala ichitabu che Isigilizi kulongozi komdugano wendile wadugana wagosi na wavyele na wana wendile wakadaha kumanya mbuli zikulongwa. 3Ezila niyo awasomela ichitabu che isigilizi ya Musa akatenda kulungozi kwe Inchili ya Amazi, kukongela mtondo kubula nomsi. Wantu wose wetegelezesa icho chiwandikwe mwe ichitabu icho che Isigilizi. 4Ezila kachimala mlanga mwe chilingo chizengigwe kwachausa che imbuli iyo. Haguhi naye ntendele ya kulume nendile wachimala Matitiya na Shema na Anaya na Uliya na Hilikiya na Maaseya. Ntendele ya kumuso nendile wachimala Pedaya na Mishaeli na Milikiya na Hashumu na Hashibadani na Zekaliya na Meshulamu.

5Ezila kachimala mlanga mwe ichilingo icho, ivyo kenukila kujinka wantu wose vyaleka wamuwona. Umo akagubula ichitabu che Isigilizi wantu wose niyo wachimala. 6Ezila kamtogola Zumbe Chohile mkulu, wantu wose niyo wenula imikono kulanga weketikila, “Taile! Taile!” Wakaheza niyo wafika madi na kumvikila Zumbe vinengo vyawo vikatenda viduma mwe isanga.

7Weze wachimale Walawi wano wakutimila nendile wakawevilikiza wantu idya Isigilizi. Mazina yawo ni Yesuwa na Bani na Shelebiya na Jamini na Akubu na Shebatai na Hodai na Maseya na Kelita na Azaliya na Yozabadi na Hanani na Pelaya. Watenda ivyo chila yumwenga akatenda kachimala hantu hakwe. 8Wasoma kulawa mwe chiya Ichitabu che Isigilizi ya Chohile wakaitambalisa na kuwevilikiza wantu niyo wadaha kukombaganya chiya chisomigwe. 9Wantu wose weze weve viya Isigilizi ikunga niyo wakonga kwila. Aho, Nehemiya uyo endile chilongozi na Ezila mlavyantambiko na mta kuwandika hamwenga na Walawi nendile wakatapita kwa wantu icho nachikalongwa, niyo wawagamba wantu wose, “Zuwa dino dikuka kwa Zumbe Chohile ywenyu. Msekulomboleza hegu kwila.” 10Nehemiya niyo awagamba, “Hitani kwezikaya zenyu mkatekubweda nkande zibukile mwile na kunywa vimwile, na ivimwenga wegaile wadya hewena chochose cha kudya. Zuwa dino dikuka kwa Zumbe Chohile. Msekwezimatila kwaviya mbwedo nawenkeni Zumbe nauwatogezeni.”

11Walawi niyo wawabasa wantu wose wawanyamaza wawagamba, “Mtondowale, kwaviya dino ni zuwa dikukule. Msekwezimatila.” 12Ivyo, wantu wose niyo wahalawa waita wakudya na kunywa na kuwegaila nkande wadya hewena, wakaheza wavina kwa chinyemi chikulu, kwaviya wamanya imilosi idya wagambilwe.

Ngasu ya makumbi

13Zuwa ditimile wakulu wa nkolo zose, hamwenga na walavyantambiko na Walawi, niyo wadugana wamzunguluka Ezila mta kuwandika chani wahine imilosi ye Isigilizi. 14Niyo wabunkula kugamba Chohile amlagizaga Musa kugamba wantu wa Izulaeli waungwa wekale mwe makumbi mwe ngasu yo mwezi wa mfungate. 15Ivyo niyo watambalise ulosi uno wenele mwemizi yawo na Yelusalemu wakagamba, “Hitani ko lugulu mkakante miti ya misiga na mizaituni mbago na mitende na miti ya muituyhu chani mdamanye makumbi kuligana na viya viwandikwe mwe Isigilizi.”

16Elo, wantu niyo waita wakuguha matambi na kuzenga makumbi mlanga mo uwala we izinyumba zawo na mwezinyuwa zawo na mo uwa we Inyumba ya Chohile na hechiwasa hajihi ne Nchili ya Mwingilo ya Amazi ne Nchili ya Mwingilo ya Efulaimu. 17Wantu wose wa Izulaeli wawiye kulawa ko usamizo niyo wazenga makumbi na kwikala umo mndani. Ino yendaga nkanana ya nkongo ngasu iyo kuvinwa seivyo kukongela amazuwa ya Yoshuwa mwana ywa Nuni kubula zuwa idyo. Waizulaeli hawajezaga kudamanya seivyo wadamanye mwe iyo. Wantu naweleleswa. 18Chila zuwa, kukongela zuwa dya nkongo dye ingasu kubula dyo uhelo, Ezila kasoma mwe Ichitabu che Isigilizi ya Chohile. Ngasu iyo waivina kwa mazuwa mfungate na zuwa dya mnane kwendaga na mdugano wa kubindiliza ingasu saviya vilagizwe mwe isigilizi.