Nehemiya 6

Mzungu wa kumkoma Nehemiya

1Sanibalati na Tobiya na mwalabu akwitangwa Geshemu na wankondo wetu watuhu weze weve kugamba chibindiliza kuzenga uhya ichiwambaza na naho hahana hantu hohose hasigale, ukaleka nyivi nizodu zisigale kwikwa mwe izinchili zo umwingilo, 2Sanibalati na Geshemu niyo wanigaila ulosi wanigamba, “Soo chidugane mwe kaya imwe na imwe mweisi ye idibwandasi ya Ono.” Mna nawekamba vileke wanilumize. 3Elo, niyo nasigila walosi nawagamba, “Ndima hudamanya ikulisa haikulekeka, sikudaha kwiza kwenyu nneza uko indima naichimale.”

4Wanigaila ulosi sauwo nkanana nne na chila nkanana siwahitula saviya nihitule nkongo. 5Elo, nkanana ya shano, Sanibalati niyo amsigila mwambizi ywakwe kwangu anigaila baluwa heifungigwe ikudaha kusomwa ni mntu yoyose, 6baluwa iyo iwandikwa vino, Geshemu anigamba, “Mbuli zenela mwe izisi zose, ni chindedi kugamba weye na Wayahudi mwadamanya mwalo wa kuhitukila, nivyo vikuleka mwazenga chiwambaza. Ukaleka ayo kuligana na ulosi uno weye waunga wetende seuta ywawo, 7naho kusagula waoni watowe lugong'ondo kukulanga weye uko Yelusalemu, kugamba, weye Nehemiya wi seuta uko Yuda! Haluse ulosi uno nagambilwe seuta Atashasita, elo soo chilafye chahamwenga.” 8Niyo namhitula namgamba, “Mbuli ukulonga sicho chindedi, mna walonga vikulawa mo mtwi wako.”

9Wose nawakajeza kuchitisa wakafanyanya kugamba, wantu nawogohe hawadahe kudamanya ndima, ivyo ndima haisile. Mna niyo nalombeza, “Weye Chohile nijela nguvu!”

10Zuwa dimwenga niyo naita kunyumba kwa Shemaya mwana ywa Delaya mwezukulu ywa Mehetabeli, uyo endaga kafungwa mndani mwe inyumbakwe. Niyo agamba, “Chidugane kwenyumba ya Chohile mndani mwe inyumba yo kumvikila Chohile chivugale izinyivi zakwe chefise, kwaviya wantu naweze wakukome. Chindedi nechilo naweze wakukome.”

11Niyo nagamba, “Togola mntu samiye nisumke? Hegu mntu samiye nite kwe Inyumba ya Chohile nihonye wikazi wangu? Sanikwite!”

12Nasibunkula kugamba Chohile hamsigile, mna Tobiya na Sanibalati wamfumbasa anigambile ivyo. 13Nendile kafumbaswa anitise nidamanye mbuli iyo nikole masa, wakaheza wabalange idizina dyangu na kunitende nibelwe ni wantu.

14Silombeza hagamba, “Weye Chohile ywangu usekujala kuwakantila Tobiya na Sanibalati kwa mbuli wadamanye, naho usekumjala Naodiya muoni ywa chiche na waoni watuhu wajezize kunitisa.”

Ndima yabindilikila

15Mwe idizuwa dya milongo midi na shano dyo mwezi wa Eluli, nuwo mwezi wa mlongo ndima yo kuzenga ichiwambaza niyo yabindilikila. Ndima iyo idamanyika kwa mazuwa milongo mishano na mbili 16Wankondo wetu wose mwe izisi zose zichizunguluke weze weve ulosi uwo niyo wogoha na kuhuza, kwaviya wabunkula kugamba ndima ino idamanyika kwa wambizi wa Chohile ywetu.

17Naho mwa amazuwa ayo wakulu wa Yuda nendile wakawandikilana baluwa zilozize na Tobiya. 18Wantu walozize mweisi ya Yuda nawelunga na Tobiya, kwaviya endaga mkwewe dya Shekaniya mwana ywa Ala. Iviya mwanawe akwitangwa Yehohanani amsolaga mchiche ywa Meshulamu mwana ywa Belekiya. 19Ukaleka ayo nendile wakanitamwila mbuli zedi za Tobiya ne izimbuli zangu nendile wakamwigaila. Tobiya naye niyo anigaila baluwa za kuntisa.