Nehemiya 5

Nehemiya ambiza wachiwa

1Nyumani niyo kwalaila mafuzumo mgati mwa wantu, wagosi kwa wavyele wawafuzumila walukolo wawo watuhu Wayahudi. 2Wakagamba, “China wana walozese. Ivyo chaunga nkande ilozize chani chidye chijendeleze kwikala.” 3Watuhu wagamba, “Chaika lahani izinkonde zetu ne imizabibu yetu ne izinyumba zetu chani chipate nkande chipindi cha gumbo chinase kubanika.” 4Watuhu wakagamba, “Chaungwa chikope hela chani chilihe kodi ya seuta kwachausa che izinkonde zetu ne imizabibu yetu. 5Suwe Chiwayahudi saviya weli wowo, wana wetu ni watana saviya wana wawo, mna chaungwa chiwalavye wanetu awamwenga wakatende watumwa. Wachiche weyu awamwenga watenda kale watumwa, mna hachina udahi wa kuchinda imbuli iyo kwaviya nkonde zetu ne imizabibu yetu viguhigwa vitenda ugoli wa watuhu.” 6Nize nive indilo na amafuzumo yawo niyo nemukwa ni maya vitendese. 7Niyo nalungumula mwe izifanyanyi zangu, nawakwahila wakulu na masekulu nawagamba, “Ni mbwani mkuwazila walukolo wenyu kwa kuwatoza chongezeko!”

Ivyo niyo naduganya mdugano mkulu chani niwausize inkunto yawo, 8niyo nagamba, “Kwa udahi wetu chiwakombola walukolo wetu Wayahudi watahigwe kwesi ntuhu. Mna haluse nyuwe mwawataga walukolo wenyu chiwagule suwe!” Masekulu niyo wanyamala dwii hawana dya kulonga. 9Ivyo niyo najendeleza kulonga, “Dino mkudamanya diha. Timilani viya Chohile ywetu akulonga chani chenege kulongwa vihiye ni wankondo wetu wantu we izisi ntuhu. 10Miye na walukolo wangu na wantu wangu chawakopeshe wantu hela na nkande hehena chongezeko. Nyuwe nanywi mbuli ya kutoza chongezeko ilekeni! 11Sunguzani wavuzizeni izinkonde zawo ne imizabibu yawo ne izinkonde zawo ze imizaituni ne izinyumba zawo, iviya ichongezeko chawo che izihela ne inkande ne idivai impya na amavuta viya mwatozize.” 12Niyo wagamba, “Nachiwavuzize, naho hachunge chintu chochose nachongezeke kulawa kwawo. Nachidamanye seivyo ulongile.” Haheza niyo nawetanga walavyantambiko na kuwagamba wadya wakulu na masekulu welise kudamanya chiya walongile. 13Iviya niyo nakung'unta umsipi we izisuche zangu na kugamba, “Mntu yoyose hanadamanye icheliso chino, Chohile amkung'unte savino mwe inyumba yakwe na mwe indima yakwe. Chani atende hana chintu!” Mdugano wose niyo wagamba, “Taile” Wamtunya Zumbe. Awo niyo wadamanya saviya welisize.

Wedi wa Nehemiya

14Kukongela chipindi nikigwe nitende sekulu mwe isi ya Yuda kwa mihilimo mlongo na midi, kugamba kukongela mhilimo wa milongo midi kubula mhilimo wa milongo mitatu na midi yo usekulu wa seuta Atashasita, sajezaga kudya nkande ikuwagila kudigwa ni sekulu, hata walukolo wangu hawadamanye seivyo. 15Mna masekulu we nkongo wadya wanilongwele wawegamila wantu na kuguha kulawa mwawo vihande vya mayuwe ya chumbu vikubula milongo mine chila zuwa hamwenga na nkande na divai. Iviya wambizi wawo wapata luhenyo lwa kuwadidimiza wantu. Mna miye sidamanye ivyo kwaviya namtunya Chohile. 16Sihikiliza kudamanya ndima mwe ichiwambaza chino. Wantu wangu wose wadugana aho chani wadamanye ndima ya kuzenga ichiwambaza, hachiguhile nkonde yoyose. 17Ukaleka ayo, Wayahudi gana dimwenga na milongo mishano na masekulu nendile wakadya hemeza yangu, hamwenga na wantu wezile kulawa kwe izisi ntuhu zihaguhi. 18Chila zuwa chidya njeku imwenga na ngoto mtandatu zidamane na nguku. Chila yakomboka mazuwa mlongo umwenga nalavyaga divai ilozize. Ukaleka ayo kwaviya wantu nendile wazamilwa, sungile nilihwe maliho yakumuwagila sekulu.

19Weye Chohile ywangu usekunijala, nikumbuka mo wedi wangu kwa mbuli zose nidamanye kwachausa cha wano awantu.