Nehemiya 4

Nehemiya ahuda uhigani mo uzesi

1Sanibalati eze eve kugamba suwe Wayahudi chazenga uhya ichiwamabaza niyo ehiwa vitendese vyaleka akonga kuchitila. 2Akatenda ekulongozi kwa wambuyaze na wagomba nkondo wa Wasamaliya, akagamba, “Wano Wayahudi wasokele watenda bwani? Togola nawadahe kuzenga uhya ichiwambaza chawo? Togola wafanyanya kugamba kwa kulavya ntambiko nawabinde kuzenga kwa zuwa dimwenga? Togola nawadahe kufukula mayuwe kulawa mwe visungu vya makalankala?” 3Tobiya kulawa kwe idikabila dya Amoni nendile kachimala hampezo ha Sanibalati niyo agamba, “Icho wakuzenga hata uzi dinakwela mlanga mwakwe nadikadaha kugwisa ichiwambaza chawo!” 4Niyo namlombeza Chohile, “Weye Chohile ywetu uchive, kwaviya chibelwa. Wavuzize amahuluto yawo yawawiye wenye. Walavye chani wegalwe kweisi yo usamizo. 5Usekuwalekeila wihi wawo naho usekujala amasa yawo kwaviya wawahuluta awazesi kulongozi kwako!” 6Ivyo niyo chazenga ichiwambaza kubula mwe inusu yo utali we ichimo chakwe, kwaviya wantu wadamanya ndima kwa myoyo yawo yose. 7Mna umo Sanibalati na Tobiya na Walabu na Waamoli na wantu wa Ashidodi weze weve kugamba kuzengwa uhya iviwambaza vyomzi wa Yelusalemu nendile ukajendeleza na mudya mbogozoke msitwa niyo wehiwa vitendese. 8Wose niyo walafya chahamwenga weze watowane na awekazi wa Yelusalemu na kuhosa wasekwivana. 9Mna niyo chamlombeza Chohile ywetu na kwika wantu wamile ichiwambaza chilo na msi chani chiwachinde. 10Wantu wa Yuda niyo wachema nchemo wagamba, “Udahi wa awandima uhunguka, makalankala nayo yalozesa elo hachikudaha kuzenga uhya ichiwambaza.” 11Wankondo wetu niyo wakagamba, “Hawadahe kumanya hegu kuwona kubula aho nachibule kwawo na kuwakoma na kuchinda indima iyo.” 12Vikaheza, Wayahudi wendile wakekala haguhi nawo niyo weza chila nkanana kuchilangiliza wachigamba, “Naweze kulawa chila hantu wakwikala na kuchebebunga!” 13Ivyo niyo naika wantu wamile mudya umuntu ichiwambaza hechinati kusila, siwaika kutimilana na nkolo zawo, wakatenda na mabamba yawo na maguha na nyuta na mifulo. 14Nize niwone wantu wengilwa ni nkama, niyo nachimala nawagamba wakulu na masekulu na wantu watuhu wose, “Msekuwogoha. Ikani msuhi kwa Zumbe uyo ni mkulu mta kogofya. Gombani nkondo kwachausa cha walukolo wenyu na wana wenyu na wanachiche wenyu na wavyele wenyu na izinyumba zenyu.” 15Wankondo wetu weze weve kugamba chibunkula umwalo wawo na kugamba Chohile kazaganya umwalo wawo, suwe chose niyo chauya kwechiwambaza, chila mntu hendima yakwe. 16Kukongela zuwa diya na kujendeleza inusu ya awantu wangu wadamanya ndima yo uzesi ne inusu ya intuhu nawatoza maguha na uta na nchingo za mwevifuwa. Masekulu nendile wakawakondagiza wantu wose wa Yuda, 17wendile wakazenga ichiwambaza. Wadya wendile wenula ivimpandwa vyo kuzengela wadamanya ndima yawo kwa mkono umwenga na mkono umtuhu watoza chiziha. 18Chila mzesi nendile kenyinyi chiziha ntendele imwenga kuno adamanya ndima, yudya mntu akuvila idigunda nendile kekala hamwenga na miye. 19Vikaheza niyo nawagamba wakulu na masekulu wa wantu watuhu wose, “Ndima ino ikulisa naho yenela chila hantu, suwe naswi chizagala chila mntu ehale na mnyawe. 20Hegu mneva izwi dya gunda soni mwechisanye hamwenga na suwe, Chohile nagombe nkondo kwachausa chetu!” 21Ivyo, chijendeleza kudamanya ndima, nusu ya wantu watoza maguha kukongela kukacha kubula kagogoza ntondo zawoneka. 22Ichipindi icho, niyo nawagamba wantu, “Chila mntu na mwambizi ywakwe nechilo wekale komzi wa Yelusalemu, kwa kudamanya ivyo nawatende wamizi nechilo na nomsi wadamanye ndima.” 23Elo, miye hegu walukolo wangu hegu wandima wangu hegu wamizi nendile nawo hahana ahambule suche yakwe. Chila yumwenga nendile anachiziha chakwe hata akaita kwekuteka mazi.