Nehemiya 3

Viwambaza vya Yelusalemu chazengwa uhya

1Mazina ya wano wantu nawo wambizane kuzenga ichiwambaza chomzi wa Yelusalemu. Eliyabu mlavyantambiko mkulu na walavyatambiko weyawe waitaga wakudamanya ndima ya kuzenga uhya inchili ikwitangwa ya Ngoto. Waikukiza na kwika izivyivi ahantu hakwe, wazenga kubula mnala wa gana dimwenga, uwo niyo wausenta kwachausa cha Chohile kubula mnala wa Hananeli. 2Wantu wa Yeliko wazenga hantu hatimile, hantu hatimile hazengwa ni Zahuli mwana ywa Imli. 3Inchili ye Izisamaki izengwa uhya ni welekwa wa Hasena. Waika iziboliti zakwe, niyo waika izinyivi zakwe ne imihindo ya chuma. 4Hantu hatimile hazengwa ni Malemoti mwana ywa Uliya mwezukulu ywa Hakosi. Atimile ni Meshulamu mwanawe dya Belekiya mwezukulu ywa Meshezabeli. Atimile ni Zadoki mwana ywa Baana kazenga uhya hantu hatimile. 5Hantu hatimile hazengwa uhya ni wantu walaile Tekowa, mna vilongozi wawo walemela kudamanya ndima wenkigwe wakachimailwa ni masekulu wawo. 6Inchili ikwitangwa ya Chikale izengwa uhya ni Yoyada mwana ywa Pasea na Meshulamu mwana ywa Besodeya. Niyo waika iziboliti zakwe ne izinyivi ne ivipete ne imihindo. 7Wawatimile awo mwe indima iyo yo kuzenga uhya wendaga Melatiya kulawa Gibeoni na Yadoni kulawa Melonoti hamwenga na wantu wo mzi wa Gibeoni na Mizipa, wantu awo wendaga wakalongozwa ni chilongozi ywo mkowa wa ntendele yo uswelo wa zuwa yomto wa Efulati. 8Intendele itimle yazengagwa ni Uzieli mwana ywa Halihaya mta kusana zahabu, intendele itimile kubula kwe ichiwambaza chizangalamu chazengagwa uhya ni Hananiya, mta kudamanya mavuta yakupwepweleka. 9Lefaya mwana ywa Huli, chilongozi nakalongoza inusu yo umzi wa Yelusalemu kazenga uhya hantu hatimile. 10Yedaya mwana ywa Halumafu azengile uhya intendele ikusinyana ne inyumbakwe. Hatushi mwana ywa Hashabuneya kazenga uhya ahantu hatimile. 11Malikiya mwana ywa Halimu na Hashubu mwana ywa Pahati Moabu wazenga uhya muntu mtimile hamwenga na Umnala wa Tanuli dya kokela mikate. 12Shalumu mwana ywa Haloheshi, chilongozi ywe inusu yo umzi wa Yelusalemu kazenga uhya ntendele zitimile akambizana na wanachiche wakwe. 13Inchili ya Kwedikolongo izengwa uhya ni Hanuni na awekazi wo umzi wa Zanoa. Wazenga uhya na kwika izinyivi ne vipete ne imihindo hantu hakwe. Iviya wazenga uhya ichiwambaza china utali wa futi elufu imwenga na magana mashano kubula Kwenchili ye Idizalazala. 14Inchili ye Idizalazala izengwa uhya ni Makaya mwana ywa Lekabu chilongozi ywa Beti Hakelemu. Kazenga uhya na kwika izinyivi zakwe ne ivipete ne mihindo yo kuvugaila inchili. 15Inchili ye Sokwe izengwa uhya ni Shalumu mwana ywa Kolihoze chilongozi ywe wilaya ya Misipa. Kazenga uhya Inchili iyo yo kwingilila niyo aihanga na kwika izinyivi zakwe ne iziboliti zakwe ne imihindo hantu hakwe. Iviya kazenga uhya ichiwambaza che Idibwawasi dya Silo hajihi ne idikonde dya seuta kubula kwezintantilo zikuseleza kulawa komzi wa seuta Daudi. 16Hantu hatimile, izengwa uhya ni Nehemiya mwana ywa Azibuki chilongozi ywe inusu ye wilaya ya Beti Zuli kubula hantu hakusinyana ne izimbila za Daudi, kubula kwedibwawa didamanywe na kubula Kwenyumba ya Wakankalu.

Walawi wadamanye ndima mwechiwambaza

17Hantu hatimile, hazengwa uhya ni Walawi wakalongozwa ni Lehumu mwana ywa Bani. Hashabiya chilongozi ywe inusu ye wilaya ya Keila, kajendeleza kuzenga uhya hantu hatimile kwachausa cha wantu we iwilaya yakwe. 18Hadya ahele, hantu hatimile kuzengwa uhya hazengwa ni walukolo wawo wakachimailwa ni Binui mwana ywa Henadadi, chilongozi ywe inusu ye wilaya ya Keila. 19Hantu hatimile kuzengwa uhya hazengagwa ni Ezeli mwana ywa Yeshua chilongozi ywa Misipa, kazenga uhya muntu mtimile kukongela hadya ahantu hakusinyana ne ikweza ikuhinga kwenyumba yo kwikiya viziha kubula kwe mpembe ye chiwambaza. 20Hantu hatimile kukongela kwe impembe kubula ko lwivi lwa Eliashibu mlavyantambiko mkulu hazengwa ni Baluki mwana ywa Zabai. 21Hantu hatimile, Melemoti mwana ywa Uliya mwezukulu ywa Hakosi kazenga uhya muntu mtimile kukongela henchili ye iyumba ya Eliyashibu kubula uhelo we inyumba iyo.

Walavyantambiko wazengile ichiwambaza

22Hantu hatimile kuzengwa uhya hazengwa ni walavyantambiko walaile ntendele zizunguluke umzi wa Yelusalemu. 23Awo wakaheza, Benjamini na Hashubu wazenga uhya hantu hakusinyana ne izinyumba zawo.

Azaliya mwana ywa Maseya mwezukulu ywa Ananiya kazenga uhya hajihi ne inyumbakwe. 24Hantu hatimile, hazengwa uhya ni Binui mwana ywa Henadadi kakongela kwenyumba ya Azaliya kubula kwempembe ye ichiwambaza. 25Vikaheza, Palali mwana ywa Uzai kazenga uhya kukongela he impembe ye ichiwambaza kubula ko mnala wa kulanga ukulagisa idizumba dye chiseuta hampezo ho uwa wa awamizi. Hantu hatimile, hazengwa uhya ni Pedaya mwana ywa Paloshi, 26hamwenga na awandima we Inyumba ya Chohile wakwikala kulanga kwenkweza ya Ofeli wazenga uhya kubula hantu hakusinyana ne Inchili ya Amazi kuhinga ulailo wa zuwa hamwenga na udya umnala usolokele.

Wazesi watuhu

27Hantu hatuhu hatimile, wantu kulawa Tekoa wahazenga uhya kukongela ko mnala usolokele kubula kwechiwambaza cha Ofeli. 28Walavyantambiko wazenga uhya mwe Inchili ye Izifalasi, chila yumwenga kulongozi kwenyumbakwe. 29Awo weze wajike, Sadoki mwana ywa Imeli kazenga uhya hantu hakutimila hakusinyana ne inyumbakwe. Hantu hatimile kuzengwa uhya hazengwa ni Shemaya mwana ywa Shekaniya mwamizi ywe Inchili ya ulailo wa zuwa. 30Hantu hatuhu hatimile hazengwa uhya ni Hananiya mwana ywa Shelemia na Hanuni mwana ywa mtandatu ywa Salafu. Awo waze waheze, Meshulamu mwana ywa Belekiya kazenga uhya hantu hakutimila hakusinyana ne inyumbakwe akwikala. 31Hantu hatimile, makaya msana zahabu kazenga uhya kubula kwe izinyumba za Wanetini na wataga mayombe, hakusinyana ne Inchili yo Kulaula kubula kwechumba chikulanga kwempembe ye chiwambaza. 32Hantu ho uhelo kukongela kwechumba mwe mpembe kubula kwa Inchili ye Izingoto hazengagwa uhya ni wasana zahabu na wataga mayombe.