Nehemiya 2

Nehemiya aita Yelusalemu

1Eze ijinke myezi mine, mhilimo wa milongo midi yo ulongozi wa seuta Atashasita, umo idivai ikatenda kulongozi kwakwe, niyo naiguha namwinka seuta. Seuta niyo aniwona hatenda simema chinyulu mwe idizuwa idyo. 2Elo, seuta niyo anuza, “Ni mbwani walagisa una chinyulu wenawe hwimnyonje? Weye huna chintu chituhu ukaleka chinyulu cha moyo.

Niyo nogohesa.” 3Mna niyo namgamba seuta, “Seuta wikale mazuwa yose! Kwambwani nsekutenda na chinyulu naye umzi wahambigwe wakale wangu usigaila mahame ne izinyivi zakwe zitikimya moto?” 4Seuta niyo anigamba, “Togola, icho ukunga ni chibwani?” Aho, niyo nalombeza chimoyomoyo kwa Chohile ywa kwembingu. 5Haheza niyo namhitula seuta “Hegu vyakuwagila weye seuta naho hegu mndima ywako kazumilwa kulongozi kwakwe nisigila nite kweisi ya Yuda komzi hantu wakale wangu wahambigwe chani nidahe kuuzenga uhya.” 6Seuta akatenda kekala hajihi na mkaziwe niyo anuza, “Ntambo yako naiguhe mazuwa mengahi, wenawe nauye ini?” Niyo namgambila seuta utali we intambo yangu na amazuwa nanikale uko, seuta niyo azumila. 7Iviya niyo namgambila, “Hegu vikakuwagila weye seuta, nakweila uninke baluwa hawalagise masekulu we ntendele ya uswelo wa zuwa yomto wa Eufulati, vileke wanileke nibule kweisi ya Yuda. 8Iviya nakweila uninke baluwa nimwigaile Asafu uyo akutunduliya imbago ya seuta chani aninke miti nidamanye mbawo kwachausa che izifilemu ze izinyivi ze ingome ye Inyumba ya Chohile na kwachausa che izinyivi ze ichiwambaza chomzi na hantu howikazi wangu nanikale.” Kwaviya udahi na wedi wa Chohile ywangu nendile wihamwenga na miye, seuta niyo azumila idilombezo dyangu. 9Seuta nendile kasigila masekulu wa wagomba nkondo na wakwela falasi waite hamwenga na miye, niyo chabula kwa vilongozi wa ntendele ya kaidi yomto wa Eufulati niyo nawenka izibaluwa za seuta. 10Mna Sanibalati kulawa komzi wa Holoni na Tobiya chilongozi kulawa Kwa Waamoni weze weve imbuli iyo, niyo wehiwa vitendese kugamba keza mntu akunga awadamanyize mbuli zedi Waizulaeli.

11Nize nibule Yelusalemu niyo nekala uko kwa mazuwa matatu, 12yeze yomboke amazuwa ayo, niyo nakulawa nechilo hamwenga na wantu wajeche. Sigambile mntu yoyose icho Chohile ywangu aikiye mo moyo wangu nidamanye kwachausa chomzi wa Yelusalemu. Mnyama uyodu nendile ninanaye ni impunda iyodu nikweile. 13Nafosa kuse komzi kujinkila inchili ya kwedikolongo kuhinga kwedisima dikwitangwa Zoka na inchili ikwitangwa Zalazala, silaula iviwambaza vya Yelusalemu vyendile vibogozolwa ne izinchili zakwe zitikimya moto. 14Haheza niyo nahinga kubula kwenchili ye sokwe ne idibwawa dya seuta, mna impunda yangu idunduga kujinka kwaviya nendile kuna visungu vya makalankala, 15ivyo ichilo icho niyo chajinkila mnkanda mo mto wa Kiduloni nalaula iviwambaza. Haheza niyo chauya na kwingila vituhu kujinkila kwe Nchili ya kwedikolongo. 16Masekulu hawamanyize uko nitile na icho hudamanya, kwaviya nendile sinati kuwagambila chochose Wayahudi hegu walavyantambiko hegu vilongozi hegu masekulu hegu mntu yoyose nadamanye indima yo kuzenga uhya umzi. 17Aho niyo nawagamba, “Nkunto chinanazo mwaziwona! Yelusalemu usigala mahame ne izinyivi zakwe zitikimya moto. Soni chizenge uhya ichiwambaza cha Yelusalemu, chani chisekutenda na soni vituhu.” 18Iviya siwagambila ivyo Chohile endile hamwenga na miye na kunambiza na ivyo seuta anigambile. Niyo wanihitula, “Nivyedi, leka chikonge kuzenga vituhu.” Ivyo niyo wakonga indima iyo yedi. 19Mna Sanibalati na Tobiya na mwalabu akwitangwa Geshomu weze weve imbuli iyo niyo wachitila na kuchiseka. Niyo wauza, “Vino mwadamanya mbwani? Togolani mwamhituka seuta?” 20Niyo nawahitula nawagamba, “Chohile ywa kwembingu nachambize chidahe kudamanya indima ino. Suwe wandima wakwe nachikonge kuzenga uhya, mna kwenyu nyuwe hamtende na fungu hegu chenyu hegu lukumbusa lwa uwagilwa momzi wa Yelusalemu.”