Nehemiya 1

1Ino ikutimila ni milosi ya Nehemiya mwana ywa Hakaliya.

Ndima ya Nehemiya momzi wa Yelusalemu

Mo mwezi wa Kisileu wo mhilimo wa milongo midi wo ulongozi wa seuta Atashasita, umo nendile kwengome ye idizumba dya seuta mo mzi wa Shushani. 2Hanani yumwe ywa walukolo wangu, ezaga akalaila kweisi ya Yuda hamwenga na wantu watuhu, niyo nawauza kuwalanga Wayahudi wawiye kulawa ko usamizo uko Babeli na icho chilaile komzi wa Yelusalemu. 3Niyo wanigamba, “Wadya wachulupuke kwigalwa kosamizo nawo wawiye mwe isi yawo wemwenkuto ikulise na soni. Chiwambaza chomzi wa Yelusalemu chibogozolwa na izinyivi zakwe zitikimywa moto.” 4Eze nive izimbuli izo niyo nekala na kwila. Kwa mazuwa masiku silomboleza na kufunga na kulombeza kulongozi kwa Chohile. 5Haheza niyo nagamba, “Weye Zumbe, Chohile ywa kwembingu, mkulu mta kogofya, weye ukutoza idilagano dyako na kulagisa ungi wako hewine udumo kwa wadya wakutoza amalagizo yako. 6Nikaula miye mndima ywako wetegeleze malombezo ya mndima ywako akulombeza kulongozi kwako chilo na msi kwa chausa cha wandima wako, wantu wa Izulaeli. Nakweila masa yetu suwe Waizulaeli, hamwenga na masa yangu na masa ya walukolo wangu, chazumila kugamba chikolola masa. 7Chidamanya masa yakulise kwako. Hachitimile imiko na malagizo na sigilizi uchinkile kujinkila kwa Musa mndima ywako.” 8“Nakulombeza kumbuka idilagizo umlagize Musa mndima ywako, ukagamba, ‘Uneva mnajendeleza kuswesa ukanuni naniwamwaganise mwe wantu we izisi ntuhu. 9Mna mnaniwiya na kutimila imiko yangu, aho hata hegu wantu wenyu wakwikala ko usamizo wehale vitendese uhelo we isi, naniwachisanye na kuwegala hatu nisagule chani wantu wanivikile aho.’” 10Zumbe Chohile, “Wano ni wandima na wantu wako ukombole kwa udahi wako mkulu na mkono wako udahise. 11Weye Zumbe Chohile, tegeleza amalombezo yangu miye mndima ywako na malombezo ya wandima wako wakubweda kukutunya weye. Dyelo uninke miye mndima ywako kuwonelwa mbazi kulongozi kwa seuta.”

Mwe chipindi icho miye nendaga mta kwinkiza vya kunywa kwa seuta.