Ezila 10

Kusolana na wantu sawo Wayahudi kwalemezwa

1Umo Ezila endile akalombeza na kweila kuno akaila na kwedula hasi chifudifudi kulongozi kwe Inyumba ya Chohile, bunga kulu dya awantu wa Izulaeli, wagosi na wavyele na wana, wechisanyaga hajihi nauyo wakaila kwa chinyulu chitendese. 2Elo, Shekaniya, mwana ywa Yehieli, wo lukolo lwa Elamu, niyo amgamba Ezila, “Chiswesa ukanuni kwa Chohile kwa kusola wavyele wajeni we isi ino, mna ukaleka ivyo kuchei na msuhi mwa awantu wa Izulaeli. 3Haluse nachidamanyeni lagano na Chohile ywetu chilekane na awavyele wano hamwenga na awana wawo, kwa kutimilana na ulangilizi wako na wawadya awatuhu wakwiva imiko ya Chohile. Yose yadamanywe kwa kutimila isigilizi. 4Inuka, ijese imbuli ino weidaha suwe nachelunge na weye, kwenke moyo udamanye ivyo.” 5Ivyo Ezila niyo akonga kuwatenda walavyantambiko ne ivilongozi na Walawi na Waizulaeli watuhu wose welise kugamba na wadamanye saviya vilongigwe ni Shekaniya, nawo niyo wazumila. 6Vikaheza Ezila niyo ahalawa kulongozi kwe Inyumba ya Chohile, nakwita kwa Yehohanani mwana ywa Eliyashibu. Ezila niyo ekala uko chilo chijima hadile hegu kunywa mazi, kwe chinyulu endilie ananacho kwaviya wa wantu walaile kudya wasamizizagwa nawaswesa ukanuni. 7Lugong'ondo lwigalwa chila hantu mwe isi yose ya Yuda na komzi wa Yelusalemu kugamba wantu wose walaile Babeli wechisanye uko Yelusalemu. 8Kuligana na malagizo yalavigwe ni vilongozi, uneva mntu yoyose ana dunduga kubula mwe chipindi cha mazuwa matatu, ivintu vyakwe vyose navitahigwe naho uyo naalemezwe kwelunga na awantu wawiye kulawa kudya wasamizizagwa. 9Mwa amazuwa ayo amatatu, zuwa dya mlongo dya mwezi wa chenda, wantu wose wekalaga mwe isi ya Yuda na Benjamini wabulaga Yelusalemu na kwechisanya mo lwazo lwe Inyumba ya Chohile. Nawakazingiza kwachausa che imbuli wetangilwe na kwachausa che ifula nkulu naikanya vitendese. 10Mlavyantambiko Ezila niyo achimala na kulonga nawo. Akagamba, “Hamwiwakanuni kwaviya msola wavyele wajeni, ivyo mwiyongezeza mlema mwe Izulaeli. 11Haluse, kweileni amasa yenyu kulongozi kwa Zumbe Chohile, Chohile ywa wababa zenyu, na kudamanya yadya yakumuwagila. Kwenegeni na wekazi we si ino na kuwaleka wakazi zenyu awajeni.” 12Awatu wose niyo wahitula kwa hamwenga kwa izwi, “Chiva, nachidamanye saivyo ukulonga.” 13Mna niyo wajendeleza kulonga wakagamba, “Awantu walozesa, naho ifula yanyelesa. Hachi kudaha kujendeleza kuchimala hano holwazo savino. Ino siyo mbuli ikudaha kudamanywa mwe zuwa dimwenga hegu maidi, kwaviya wantu walozize mwetu wadamanye amasa yano. 14Naviwagila amasekulu wetu wasigaile komzi wa Yelusalemu wasankanile imbuli ino ha awantu wose. Vikaheza chila mntu mta mvyele mjeni eze mwe chipindi chikigwe hamwenga na ivilongozi na wakanta wo mzi wakwe. Ivyo nivyo navinaleke amaya yatendese ya Chohile nayauswe mwe imbuli ino.” 15Hahana mntu ahigile imbuli iyo ukaleka Yonasani mwana ywa Asaheli na Yazeya mwana ywa Tikwa, niyo walungwa mkono ni Meshulamu na Shabetai ywe idikabila dya Walawi. 16Awantu wose walaile kudya wasamizizagwa niyo wazumila imbuli iyo, ivyo Ezila mlavyantambiko awasagulaga wagosi mgati mwe ivilongozi wezinkolo zesimile na kudongelesa amazina yawo. Umo mwe idizuwa dya nkongo dya mwezi wa mlongo, wantu awo niyo wakonga indima yawo yo uzuza we imbuli iyo, 17na miezi mitatu itimile wabindaga uzuza wawo mwa awagosi wose wendaga wasoile wavyele wajeni.

Wagosi wata wavyele sawo Wayahudi

18Luno nulo uludongo lwa awagosi wendile wasoile wavyele sawo Wayahudi, Walavyantambiko kuligana ne izinkolo zawo, ulukolo lwa Yeshua, mwana ywa Yehosadaki na walukolo wakwe, ni Maaseya na Eliezeli na Yalibu na Gedaliya. 19Awo walaganaga kuwasa awavyele wawo, ivyo chila yumwenga niyo alavya ndolome itende lavyo dya mlema wawo. 20Ulukolo lwa Imeli, ni Hanani na Zebadiya. 21Ulukolo lwa Halimu, ni Maaseya na Eliya na Shemaya na Yehieli na Uziya. 22Ulukolo lwa Pashuli, ni Eliehoenai na Maaseya na Ishimaeli na Nasanieli na Yozabadi na Elasa. 23Walawi wasolaga wavyele wa chijeni, ni Yozabadi na Shimei na Kelaya endaga ana zina tuhu aketangwa Kelita, na Petahiya na Yuda na Eliezeli. 24Mgati mwa wachemi wasolaga wavyele wa chijeni ni Eliyashibu. Na mgati mwa awamizi we Inyumba ya Chohile, ni Shalumu na Telemu na Uli. 25Na wantu watuhu wasoile wavyele sawo Wayahudi wo lukolo lwa Paloshi, ni Lamiya na Iziya na Malikiya na Miyamini na Eliazali na Malikiya na Benaya. 26Ulukolo lwa Elamu wasolaga wavyele wa chijeni ni Mataniya na Zekaliya na Yehieli na Abudi na Yelemoti na Eliya. 27Ulukolo lwa Zatu wasolaga wavyele wa chijeni, ni Eliehoenai na Eliashibu na Mataniya na Yelemoti na Zabadi na Aziza. 28Ulukolo lwa Bebayi wasolaga wavyele wa chijeni, ni Yehohanani na Hananiya na Zabayi na Atilayi. 29Ulukolo lwa Bani wasolaga wavyele wa chijeni ni Meshulamu na Maluki na Adaya na Yashubu na Sheali na Yelemoti. 30Ulukolo lwa Pahashi Mmoabu wasolaga wavyele wa chijeni, ni Adina na Kelali na Benaya na Maaseya na Mataniya na Besaleli na Binui na Manase. 31Ulukolo lwa Halimu wasolaga wavyele wa chijeni, ni Eliezeli na Ishiya na Malikiya na Shemaya na Shimeoni, 32na Benjamini na Maluki na Shemaliya. 33Ulukolo lwa Hashumu wasolaga wavyele wa chijeni, ni Matenayi na Matata na Zabadi na Elifeleti na Yelemayi na Manase na shimeyi. 34Ulukolo lwa Bani wasolaga wavyele wa chijeni ni Maadayi na Amlamu na Ueli, 35na Benaya na Bedeya na Keluhi, 36na Waniya na Melemoti na Eliashibu, 37na Mataniya na Matenayi na Yaasu. 38Ulukolo lwa Binui, ni Shimeyi, 39na Shelemiya na Nasani na Adaya, 40na Makinadebayi na Shashayi na Shalayi, 41na Azaleli na Shelemiya na Shemaliya, 42na Shalumu na Amaliya na Yosefu. 43Ulukolo lwa Nebo wasolaga wavyele wa chijeni, ni Yeieli na Matitiya na Zabadi na Zebina na Yadayi na Yoeli na Benaya. 44Awagosi wano wose wasolaga wavyele wajeni. Ivyo niyo wawaleka awavyele awo wahalawe hamwenga na awana wawo.