Ezila 9

Waizulaeli wasola wavyele sawo Wayahudi

1Vize viheze ivyo, niyo ivilongozi wanibasa na kunigamba, “Wantu wa Izulaeli na walavyantambiko na Walawi, hawesentile na awekazi we isi wadya wakudamanya yakwihiza, Waamoli na Wamoabu na Wamisili na Wakanaani na Wahiti na Wapelezi na Wayebusi na Waamoni. 2Wayahudi wakusola wavyele wachijeni iviya kuwaloza wabwanga wawo wajeni. Ivyo, wantu wasagulwe ni Chohile wahangana na wantu wa si ntuhu, ivyodu masekulu na wakulu nawo wankongo kudamanya ayo yakwihiza. 3Eze nive izimbuli izo, niyo natatula izi suche zangu ne inkazu yangu, niyo nang'ola izi fili zangu ne zindevu zangu kwa chinyulu chitendese na kwikala hasi kwa nkama. 4Niyo awantu wose wengilwe ni nkama kwachausa che izimbuli alongile Chohile ywa Izlaeli mwa masa ya wadya wawiye kulawa kudya wasamizizagwa wakonga kwechisanya haguhi na miye, nami niyo natenda na nkama kubula nechisingi, chipindi cho kulavya ntambiko.

5Chisingi mwe ichipindi cho kulavya ntambiko, niyo nenuka hadya ahantu nekale kwa chinyulu kuno izisuche zangu ne inkazu yangu zitatuke, niyo nafikamadi na kumchulusiza imikono yangu Zumbe Chohile, Chohile ywangu.” 6Hagamba, “Hoi Chohile ywangu, nawona soni nkulu kwinula umtwi wangu kulongozi kwako. Masa yetu yalozesa kujinka imitwi yetu, heye, mlema wetu ubula kwembingu. 7Kukongela amazuwa ya wababa zetu, suwe awantu wako chibalangisa. Na kwachausa cha amasa yetu, suwe na maseuta wetu na walavyantambiko wetu, chihudwa ni maseuta we zisi zechijeni naho nachikomwa, nachitahigwa na kuhokwa ugoli wetu. Kubula vino dyelo, chijelwa soni vitendese. 8Mna haluse weye Zumbe Chohile, Chohile ywetu, kwa chipindi chijihi kuchilagisa izimbazi zako na kuwadahiza awamwenga wetu kusumka kulawa kousamizo na kwikala kwa utondowazi ahantu hano hakukile. Ukaleka utumwa kuchinka mbwedo na wikazi mhya. 9Hata hegu nendile chiwatumwa huchilekile chikale mo utumwa. Kuwatenda maseuta wa Uwajemi watende wedi kwetu na kuchilekeila chikale kwa utondowazi na kuizenga uhya Inyumba ya Chohile yako yendile ibogozoke, hano Yuda na Yelusalemu.” 10“Mna haluse, Hoi Chohile ywetu, chigeze yeze yajinke ayo yose? Hachitimile imiko yako, 11uchinkile kwa sila ya wandima wako wawoni. Wachigambaga si mkwita kwikala na kutenda yenyu ibalangwa ni wihi wa wantu wakwila umo walaile mwesi zesimile, kwawihi kwa kudamanya mbuli zikwihiza chila hantu. 12Elo, msekuwaloza awantu awo wachiche wenyu, hegu kuwalekeila wabwanga wenyu kusola wachiche wawo, naho msekutumbwazika mo utondowazi hegu ukuchumilwa kwawo, chani nyuwe wenye mtende na nguvu, naho mbwede yedi ye isi iyo nakuwalekela wana wenyu saviya ulisi wa kalenakale. 13Ukaleka ayo yose yachigwele kwachausa cha amsa yetu, yalozize, chivimanya kugamba inkanto uchinkile, we Chohile ywetu ni ndodo ukaliganya no uwihi wetu, na kuwaleka watuhu watende no ujima. 14Kwambwani chisekutimila sigilizi zako vituhu kwa kuwaleka wana wetu wa chilume na wachiche wetu wasolane na awantu wano wakudamanya wihi uno? Nawihiwe nakuchikoma asekusigala hata mntu yumwenga nahone. 15Elo Zumbe Chohile, Chohile ywa Izulaeli, weye wadamanya vichumile mna kuchileka chisigaile savino chili vino dyelo. Cheila amasa yetu kulongozi kwako, chikamanya kugamba hahana mta wedi yoyose akwiza kulongozi kwako kwachausa cha amasa yano.”