Ezila 8

Wantu wawiye kulawa Babeli

1Luno nulo uludongo lwe vilongozi we izinkolo za awantu wawiye hamwenga na miye Ezila kulawa Babeli uko wasamizizagwa, mwe ichipindi cho usekulu wa seuta Alitashasita. 2Welekwa wa Finehasi chilongozi endaga Gelishoni ulukolo lwa Itamali chilongozi endaga Danieli, kulawa ulukolo lwa Daudi chilongozi endaga Hatushi, 3walaile kwa awelekwa wa Shekaniya no ulukolo lwa Paloshi chilongozi endaga Zekaliya hamwenga na wagosi gana dimwenga na milongo mishano wo lukolo lwakwe, wawandikwe hamwenga naye. 4Walaile ko ulukolo lwa Pahati mntu ywa Moabu chilongozi ywawo endaga Eliehoenai, mwana ywa Zelahiya hamwenga na wagosi magana maidi. 5Walaile ko ulukolo lwa Zatu chilongozi endaga ni Shekaniya mwana ywa Yahazieli auyaga hamwenga na wagosi magana matatu. 6Walaile ko ulukolo lwa Adini chilongozi ywawo endaga Ebedi mwana ywa Yonasani auyaga hamwenga na wagosi milongo mishano. 7Walaile ko ulukolo lwa Elamu chilongozi ywawo endaga Yesaya mwana ywa Ataliya auyaga hamwenga na wagosi milongo mfungate. 8Walaile ko lukolo lwa Shefatiya chilongozi endaga Zebadia mwana ywa Mikaeli auyaga hamwenga na wagosi milongo mnane. 9Walaile ko lukolo lwa Yoabu chilongozi endaga Obadiya mwana ywa Yehiele auyaga hamwenga na wagosi magana maidi na mlongo mnane. 10Walaile ko lukolo lwa Bani chilongozi endaga Shelomiti mwana ywa Yosifiya auyaga hamwenga na wagosi gana dimwenga na milongo mtandatu. 11Walaile ko lukolo lwa Bebai chilongozi endaga Zekaliya mwana ywa Bebai auyaga hamwenga na wagosi milongo midi na mnane. 12Walaile ko ulukolo lwa Azigadi chilongozi endaga Yohanani mwana Hakatini auyaga hamwenga na wagosi gana dimwenga na mlongo umwenga. 13Walaile ko ulukolo lwa Adonikamu vilongozi wendaga Elifeleti na Yeueli na Shemaya wawiye hamwenga na wagosi milongo mtandatu, wano wauyaga nyumani. 14Walaile ko ulukolo lwa Bigwai vilongozi wendaga Utai na Zakuli wawiye hamwenga na wagosi milongo mfungate.

Ezila alonda Walawi kwachausa che Inyumba ya Chohile

15Siwachisanya hamwenga mnkanda mo mto ukuhinga komzi wa Ahava, na kwika lago kwa mazuwa matatu. Niyo nawakaula awantu wose na walavyantambiko mna siwone Walawi mgati mwawo. 16Niyo nasigila vilongozi chenda weze, Eliezeli na Alieli na Shemaya na Elinatani na Yalibu na Elinatani na Natani na Zekaliya na Meshulamu hamwenga na wahinya waidi, Yoyalibu na Elinatani. 17Siwasigila kwa Ido chilongozi ywa wantu wa Kasifia, simlombeza uyo hamwenga na weyewe wasankane mwe Inyumba ya Chohile ywetu. 18Kwa ungi wakwe Chohile, kachigaila Shelebiya mntu mta ubala Mlawi wo lukolo lwa Mahili, hamwenga na wanawe na walukolo wakwe mlongo umwenga na mnane. 19Iviya kachigaila Hashabiya na Yeshaya, wose wo lukolo lwa Melali, hamwenga na walukolo wawo milongo midi. 20Ukaleka awo, kwendaga na wasankana we Inyumba ya Chohile magana maidi na milongo midi, awo wababa zawo wendaga wasagulagwa ni seuta Daudi na masekulu wakwe wawambize Walawi. Amazina yawo yawandikagwa.

Ezila alongoza awantu wafunge na kulombeza

21Vikaheza, nalavyaga malagizo kugamba wantu wose chibule haguhi no mto wa Ahava chani chifunge na kunyanyahala kulongozi kwa Chohile ywetu chimlombeze achidime na kuchilongoza mwe intambo yetu hamwenga na wanetu. 22Nanisoni kumlombeza seuta bunga dya wagomba nkondo na wakwela falasi wachidime na wankondo wetu mwe isila kwaviya nasimgambila kale kugamba Chohile awajimbika wadya wose wakumlonda, mna awehiwa na kuwakantila wadya wose wakumleka. 23Ivyo chifunga na kumlombeza Chohile ywetu kwa chausa cha ayo, uyo niyo achihitula.

Malavyo kwachausa che Inyumba ya Chohile

24Vikaheza, mgati mwe ivilongozi wa awalavyantambiko nasagulaga mlongo na waidi, Shelebiya na Hashabiya hamwenga na weyawe mlongo umwenga. 25Wano nawahimilaga kwa chihimo, mayuwe ya chumbu na zahabu na viya vyose vyalavyagwa ni seuta na walangilizi wakwe na masekulu wakwe hamwenga na awantu wa Izulaeli kwachausa cha malavyo ye Inyumba ya Chohile ywetu. 26Vino nivyo ivintu nawahimilaga, mayuwe ya chumbu chilo elufu milongo midi na mbili, viya vidamanywe kwa mayuwe ya chumbu chilo milongo mfungate, zahabu chilo elufu ntatu na magana mane, 27mabakuli milongo midi ya zahabu uzami wakwe chilo mnane, viya vidi vya shaba yedi ikung'ala, vina yombe saviya ya zahabu.

28Vikaheza niyo nawagamba, “Nyuwe mwi wantu wa Zumbe Chohile. Seivyo iviya navyo ni vya Chohile, chumbu na zahabu ni malavyo ya kweungila nyuwe wenye kwa Zumbe Chohile, Chohile ywa wababa zenyu. 29Hampu vidimeni na kuvitundulia kwa untanda ivintu ivyo, kubula aho na mvihime kulongozi kwa walavyantambiko wakulu, na Walawi na wakulu we vilongozi we izinkolo za Izulaeli, uko Yelusalemu, mwe Inyumba ya Zumbe Chohile.” 30Elo walavyantambiko na Walawi wahokela ichumbu ne izahabu ne viya, chani wavigale Yelusalemu kwe Inyumba ya Chohile ywetu.

Ntambo ya kuya Yelusalemu

31Mwe idizuwa dya mlongo na mbili dyo mwezi wa nkongo, chatambaga kulawa komto wa Ahava, nakwita Yelusalemu, Chohile ywetu achamizaga na kuchidima mwa wankondo wetu na wadya wakwebunga wantu mwe sila. 32Eze chibule Yelusalemu, niyo chahumula kwa mazuwa matatu. 33Mwe idizuwa dya kane, niyo chaita mwe Inyumba ya Chohile, Chohile ywetu chahimaga ichumbu ne izahabu ne iviya, chikaheza niyo chamwinka mlavyantambiko Melemoti mwana ywa Uliya. Melemoti endaga hamwenga na Eleazali mwana ywa Finehasi, na Walawi waidi, Yozabadi mwana ywa Yeshua na Noadiya mwana ywa Binui. 34Chila chintu chawazagwa na kuhimwa na uzami wa chila chintu wawandikagwa.

35Vikaheza, wadya wose wawiye kulawa kudya wasamizizagwa wamlavizaga Chohile ywa Izulaeli malavyo yawo ya kutikimya, njeku mlongo umwenga na mbili kwachausa cha Waizuaeli wose, na ndolome milongo chenda na mtandatu na wana ngoto milongo mfungate na mfungate iviya walavyaga mbuzi mlongo umwenga na mbili saviya lavyo dya kusa masa. Awanyama wose awo walavyagwa watende lavyo dya kutikimya kwa Zumbe Chohile. 36Seivyo wawenkaga amasekulu wa seuta na maseuta wo mkowa wa uswelo wa zuwa wo mto Eufulati ivyo wasigilagwa ni seuta, niyo walavya wamb izi kwa wantu na kwachausa che Inyumba ya Chohile.