Ezila 7

Ezila abula Yelusalemu

1Vikaheza, mwe chipindi cho useuta wa Alitashasita ywa Uwajemi, hendaga na mntu yumwenga endile aketangwa Ezila. Ezila endaga mwana ywa Selaya, mwana ywa Azaliya, mwana ywa Hilikiya, 2Hilikiya endaga mwana ywa Shalumu, Shalumu mwe mazuwa ya mwana ywa Sadoki, Sadoki endaga mwana ywa Ahitubu, 3mwana ywa Amaliya, mwana ywa Azaliya, mwana ywa Melayoti, 4mwana ywa Zelahiya, mwana Uzi, Uzi endaga mwana ywa Buki, 5Buki endaga mwana ywa Abishuya, Abishuya endaga mwana ywa Finehasi, mwana ywa Eleazala, mwana ywa Aloni, mlavyandambiko mkulu.

6Ezila akulawaga Babuloni, uyo endaga muwandika mta umanyi ulozize mwe isigilizi idya Zumbe Chohile, Chohile ywa Izulaeli, amwinkaga Musa. Na kwa wambizi wa Zumbe Chohile, Chohile ywakwe, seuta amwinkaga Ezila chila chintu aungile. 7Mo mhilimo wa mfungate wo usekulu wa seuta Alitashasita, Ezila akongaga ntambo kulawa Babuloni kwita Yelusalemu. Wamwenga mwa awantu wa Izulaeli, walavyantambiko na Walawi na wachemi na wamila nyivi na wandima we Inyumba ya Chohile waitaga hamwenga na uyo. 8Wabulaga komzi wa Yelusalemu mwe idizuwa dya nkongo dyo mwezi wa shano mo mhilimo wa mfungate wo useuta wa Alitashasita. 9Zumbe Chohile aitendaga intambo iyo itende yedi vitendese waikongaga zuwa dya nkongo dyo mwezi wa nkongo. 10Ezila endaga elavyaga umoyo wose kuhina sigilizi ya Zumbe, kuidamanya na kuwahinya wantu wa Izilaeli malagizo na sigilizi zakwe.

Baluwa ya seuta Alitashasita kwa Ezila

11Ibaaluwa iyo ya seuta Alitashasita amwigaile Ezila, mlavyantambiko na mta kuwandika na mhinya mta umanyi wa sigilizi na malagizo ya Zumbe Chohile awenkaga awantu wa Izilaeli. 12“Kulawa kwa Alitashasita, seuta mkulu ywa maseuta, kwa Ezila, mlavyantambiko naho mntu mta umanyi wa kuhinya sigilizi za Chohile ywa kweimbingu ndamsa.” 13“Nalagiza kugamba kujinkila mo usekulu wangu wantu wose wa Izilaeli, walavyantambiko na Mlawi kugamba akunga kuya Yelusalemu kwa kunga wenye, adaha kwita hamwenga na weye. 14Miye, hamwenga nawalangilizi wangu mfungate, chakusigila ukadamanye uzuza uko Yuda na Yelusalemu ukakaule hegu isigilizi ya Chohile ywako idya akwinkile uneva yatimilwa viya vikuwagila. 15Guha mayuwe ya chumbu na zahabu, idya miye na awambizi wangu chimlaviza Zumbe Chohile ywa Izulaeli kwa kweungila wenye, yudya Inyumba yakwe iyuko Yelusalemu. 16Uguhe mayuwe ya chumbu ne izahabu yose nochisanye mo mkowa wose wa Babeli, hamwenga na malavyo ya kweungila walavize awantu wa Izulaeli na walavyantambiko wawo kwachausa che Inyumba ya Zumbe Chohile ywawo iyuko Yelusalemu.” 17“Jeseza vihande ivyo vye chumbu kwa untanda vitendese kwa kugula majeku na ndolome na wana ngoto hamwenga na malavyo ya uhule na divai na kuvilavya mlanga mwe mazabahu mwe Inyumba ya Chohile ywenyu, iyuko Yelusalemu. 18Amayuwe ye ichumbu ne izahabu naisigale wadaha uzijeseze hamwenga na awantu weyawo saivyo namunge, kutimilana na viya vikumuwagila Chohile. 19Ne iviya winkigwe kwa chausa cho kuvikila mwe Inyumba ya Chohile ywako nomlavize Chohile uko Yelusalemu. 20Chintu chochose nounge kwachausa che Inyumba ya Chohile ywako, wadaha uchipate kulawa mwe ihazina ya seuta.” 21“Miye, seuta Alitashasita, nalavya lagizo kwa wose wakudima ihazina mo mkowa wa uswelo wa zuwa wo mto Eufulati kugamba, sunguzani mwinkeni chila chintu Ezila naunge, mlavyantambiko, na mhinya sigilizi ya Chohile ywa kwembingu, 22Hata hegu ni mayuwe ya chumbu yasekujinka chilo elufu ntatu na magana mane na ngano chilo elufu mlongo umwenga na lita elufu mbili za divai na lita elufu mbili za mavuta ya mizaituni na munyu chilo zozose naunge. 23Chila chintu alagize Chohile ywa kwembingu, kwa chausa che Inyumba yakwe, naho mjese kwa ukanuni anasekuwihiwa useuta wangu hegu wanangu. 24Iviya chawagambilani hamkungwa mkachisanya kodi kwa walavyantambiko, na Walawi na wachemi na wachimaila umwingilo na wandima watuhu we Inyumba ino ya Chohile.” 25“Weye Ezila, kwa kujeseza ubala akwinkile Chohile ywako, wike wakanti na walamuzi na wawalongoze wekazi wose wo mkowa wa uswelo wa zuwa wo mto Eufulati kudya wakwikala kutimilana ne isigilizi ya Chohile ywako. Mhinye yudya heimanyize isigilizi iyo. 26Na mntu yoyose hekwiva isigilizi ya Chohile ywako, na sigilizi ya seuta, asunguze kukantilwa hegu kukomwa hegu kusamizwa hegu kuhokwa ugoli wakwe hegu kujelwa mwe chifungo.”

Ezila amtogola Chohile

27Ezila niyo agamba, “Atogolwe Zumbe Chohile, Chohile ywa wababa zetu, uyo amwinkile moyo seuta mkulu wa kuitunya Inyumba ya Chohile iyuko Yelusalemu. 28Kwa wedi wakwe Chohile, sinkwa wambizi wa seuta na masekulu wakwe wata udahi mnkulu. Senka moyo kwaviya Zumbe Chohile, Chohile ywangu, nendile ehamwenga na miye, niyo nawachisanya ivilongozi wa Izilaeli chani wauye hamwenga na miye.”