Ezila 6

Malagizo ya seuta Dalio yabunkulwa

1Ivyo Seuta Dalio alavyaga lagizo wantu wadamanye uzuza mwe lukumbusa zikigwe mwe vyumba vyo kwikiya vintu uko Babeli mo lukumbusa we chiseuta. 2Mna ichitabu chibwilwa ko mzi wa Ekibatana mo mkowa wa Media, chendaga na malagizo sayano, 3“Mo mhilimo wa nkongo wo useuta wakwe, seuta Koleshi alagizaga Inyumba ya Chohile izengwe uhya mo mzi wa Yelusalemu, na itende hantu hakulaviza ntambiko na malavyo ya kutikimya. Ichimo chakwe na chitende mita milongo midi na mfungate na wangalamu wakwe mita milongo midi na mfungate. 4Iviwambaza vyakwe navizengwe kwa nchanjale umwenga wa mgamba mlanga mwa chila nchanjale ntatu itende ya mayuwe makulu. Amaliho yose yalihwe kulawa mwe ihazina ya seuta. 5Naho, iviya vyose vye zahabu na mayuwe ye chumbu viya seuta Nebukadineza egale Babeli mwe inyumba ya Mnungu ywakwe vivuzwe kwe Inyumba ya Chohile uko Yelusalemu na kwikwa chila chimwenga ahantu hakwe mwe Inyumba ya Chohile.”

Dalio alagiza indima ijendeleze

6Vikaheza Dalio niyo egala ulosi sauno, “Kwa Tatenai, sekulu ywa mkoa wa uswelo wa zuwa wa Eufulati na Shetahali bozenai na masekulu weyawo ko mkowa.” “Walekeni ikalani hale nawo, 7naho lekani indima yo uzesi we Inyumba ya Chohile ujendeleze. Mlekeni sekulu ywa Yuda ne vilongozi wa Wayahudi waizenge Inyumba ya Chohile hantu hakwe. 8Naho, nalagiza kugamba nyuwe namuwambize mwe indima iyo. Maliho yawo yose hehena kukawa kulawa kwe hazina ya seuta ikulawa mwe ikodi ikuchisanywa ko mkowa wa uswelo wa zuwa wo umto wa Eufulati, chani uzesi unase kuchimala. 9Chila zuwa msekuleka kuwenka walavyantambiko wa Yelusalemu chila chintu nawaunge, vikatenda ni wajeku hegu ndolome hegu wana ngoto kwa malavyo ya kutikimya kwa Chohile ywa kwembingu, hegu ngano na munyu na divai hegu mavuta ya mizaituni. 10Vino vyose vidamanywe chani wadahe kumlaviza Chohile ywa kwembingu malavyo yakumuwagila naho wanilombezeze ujimbiko miye seuta na wanangu. 11Naho nalagiza kugamba mntu yoyose yudya hanazumile idilagizo dino, msomo ung'olwe kulawa mwe inyumba yakwe naho usongolwe na kutumbulwa na uwo umsomo. Naho inyumba yakwe itendwe zalazala. 12Elo Chohile ausagulaga umzi wa Yelusalemu kutenda hantu hakwe ha kumvikila na amgwise seuta hegu si yoyose nahige idilagizo dino hegu kunga kuibalanga Inyumba ya Chohile iyuko komzi wa Yelusalemu. Miye Dalio silavya idilagizo dino, vyaungwa ditimilwe.”

Inyumba yatedwa ya Zumbe

13Vikaheza, Tatenai, sekulu ywa mkowa wa uswelo wa zuwa wo mto wa Eufulati na Shetahali bozenai na masekulu weyawe, wahikiliza kujesa idilagizo dya seuta Dalio. 14Ivilongozi wa Wayahudi niyo wajendeleza vyedi vitendese ne indima yo uzesi we Inyumba ya Chohile, wakajelwa moyo ni muwoni Hagai na Zekaliya, mwana ywa Ido. Wabindiliza uzesi we Inyumba ya Chohile saviya walagizwe ni Chohile ywa Izilaeli saviya walagizwe ni seuta Koleshi na seuta Dalio na seuta Alitashasita wa Pelisiya. 15Uzesi we Inyumba ya Chohile ubindilikila mwe idizuwa dya katatu dyo mwezi ukwitangwa Adali, mo mhilimo wa mtandatu wo useuta wa seuta Dalio. 16Vikaheza, awantu wa Izilaeli na walavyantambiko na Walawi na awantu watuhu wadya wauyaga kulawa kudya wasamizizagwa waikaga Inyumba iyo kulongozi kwa Chohile kwa mbwedo utendese. 17Mwe ichipidi cho kwisenta Inyumba ya Chohile, walavyaga majeku gana dimwenga, na ndolome magana maidi na wana ngoto magana mane ya malavyo, na mavulata mlongo umwenga na mbili kwa chausa cha lavyo dya kusa masa na mbuzi imwenga kwa chila kabila dya Izilaeli. 18Seivyo, kwa chausa cha indima ya Chohile mwe Yelusalemu, wawaikaga walavyantambiko mwe mabunga yawo ya Walawi kwa luzo lwawo kutimilana na malagizo yawandikwe mwe ichitabu cha Musa.

Ngasu ya Pasaka

19Mwe idizuwa dya mlongo na nne dyo mwezi wa nkongo, wantu wendile wauya kulawa kudya wasamizizagwa wadamanyaga ngasu ya Pasaka. 20Walavyantambiko na Walawi wetenda wazumilike kwa Chohile, wose wendaga wakuka vitendese. Walawi wachinjaga mwana ngoto ywa Pasaka kwachausa cha wantu wose wawiye kulawa kudya wasamizizagwa, walukolo wawo walavyantambiko na kwachausa cha wowo wenye. 21Elo, Waizulaeli wadyaga umwana ngoto ywe Pasaka wendaga ni wadya wose wawiye kulawa kudya wasamizizagwa hamwenga na awantu watuhu wesentile ne izintendwa zihiye za awantu we izisi ntuhu vileke wamvikile Zumbe Chohile, Chohile ywa Izulaeli. 22Kwa chipindi cha mazuwa mfungate awantu wavinaga kwa mbwedo idizuwa kulu dye mikate heijeligwe hamila, kwaviya Zumbe Chohile awenkaga mbwedo na kumwinka seuta ywa Ashulu moyo wa ungi kwawo, niyo awambiza mwe indima yo usezi we Inyumba ya Chohile, ywa Izulaeli.