Ezila 5

1Mwe ichipindi icho, waoni waidi, Hagai na Zekaliya, mwana ywa Ido wawalavizaga uwoni Wayahudi wendile wakekala Yuda na Yelusalemu, mwa zina dya Chohile ywa Izulaeli. 2Zelubabeli, mwana ywa Shealitieli na Yeshuwa mwana ywa Yosadaki, weze weve ulosi uwo niyo wakonga vituhu kuizenga Inyumba ya Chohile mo mzi wa Yelusalemu, wakambizwa ni wawoni wa Chohile.

3Chipindi icho, Tatenai endaga sekulu ywa mkoa wa uswelo wa zuwa wo mto wa Eufulati na Shetahali bozenai na weyawe waitaga Yelusalemu na kuuza, “Ni yuhi awalagizeni kuizenga uhya Inyumba ya Chohile kubula kuibindiliza?” 4Iviya niyo wauza, amazina ya wadya wakuzenga Inyumba ya Chohile. 5Mna Chohile nendile akawadima ivilongozi wa Wayahudi, ivyo amasekulu awo hawawalemeze kubula aho wamwandikilaga baluwa seuta Dalio na kumanya chiya akulonga. 6Ivyo, Tatenai, sekulu ywo mkowa wa uswelo wa zuwa wa Eufulati na Shetahali bozenai na weyawe, niyo wamwandikila baluwa seuta Dalio. 7Ibaluwa iyo igamba vino, “Kwa seuta Dalio, chakungila utondowazi.” 8“Weye seuta chaunga umanye kugamba chita ko mkowa wa Yuda uko ili Inyumba ya Chohile Mkulu. Inyumba ino yazengwa uhya kwa mayuwe makulu ne viwambaza vyakwe vikwa migamba. Indima iyo yadamanywa kwa untanda mkulu naho yajendeleza vitana vitendese.” 9“Chiwauza ivilongozi awo wachigambile ni yuhi awalagize wazenga uhya Inyumba ya Chohile kubula kuikomeleza. 10Iviya chiwauza amazina yawo chani chikugambile weye seuta wadya wakulongoza indima iyo.” 11“Wantu awo wachihitula vino, ‘Suwe chiwandima wa Chohile ywa kwe mbingu ne isi, chaizenga uhya Inyumba ya Chohile idya yazengagwa na kuheza aho nkongo ni seuta yumwenga mkulu ywa Izulaeli. 12Mna kwaviya mababa zetu weze wamwihize Chohile ywa kwe mbingu, uyo niyo awaleka wahudwe ni seuta Nebukadineza ywa Babuloni, mntu ywa Kalidayo, abalange inyumba ino ya Chohile na kuwegala wantu kousamizo uko Babuloni aibalange Inyumba ya Chohile ino na kuwegala awantu kudya wasamizizagwa uko Babuloni. 13Mna mo mhilimo wa nkongo wo ulongozi wakwe seuta Koleshi ywa Babuloni alavyaga lagizo Inyumba ya Chohile ino izengwe uhya. 14Uyo kavivuza iviya vye zahabu na mayuwe ya chumbu viya seuta Nebukadineza aviguhaga kulawa mwe Inyumba ya Chohile uko Yelusalemu na kuvika mwe inyumba ye milungu yakwe uko Babeli. Iviya Koleshi avyusaga mwe Inyumba ya Chohile kudya Babuloni. Kamwinka mntu akwitangwa Sheshabaza yudya amsagulaga atende sekulu ywa Yuda. 15Seuta kamgamba aguhe iviya ivyo avivuze mwe Inyumba ya Chohile uko Yelusalemu, na kuizenga uhya Inyumba ya Chohile hantu yendaga aho nkongo. 16Ivyo Sheshabaza ezaga na kwika umsingi we Inyumba ya Chohile mo mzi wa Yelusalemu, na kukongela ichipindi icho uzesi naukajendeleza kubula haluse, mna hainati kubindilikila.’” 17“Haluse, uneva vyakuwagila weye seuta, lagiza kudamanywe uzuza mwa mazuwa ya jinkile yo seuta mo mzi wa Babeli saviya seuta Koleshi hegu chindedi kalavyaga lagizo Inyumba ya Chohile izengwe uhya komzi wa Yelusalemu. Vikaheza, chigambile viya ukuwona.”