Ezila 4

Uzesi uhya Inyumba ya Chohile wahigwa

1Vikaheza wankondo wa Yuda na Benjamini weze weve kugamba wantu wawiye kulawa kudya wasamizizagwa niyo wazenga uhya Inyumba ya Chohile, Chohile ywa Waizulaeli, 2wambasa Zelubabeli na vilongozi we izinkolo na kumgamba, “Chehange mo uzesi we Inyumba ya Chohile. Suwe chose chavikila Chohile ywenyu, nendile chikamlaviza malavyo kukongela chikale mwa Esali hadoni, seuta ywa Ashulu, achiletile hano.”

3Mna Zelubabeli na Yeshua na vilongozi watuhu wezinkolo za Izilaeli niyo wawagamba, “Suwe hachikunga wambizi wowose kulawa kwenyu chani chizenge Inyumba ya Chohile ywetu. Suwe wenye nachimzengele Zumbe Chohile, Chohile ywa Izilaeli, saviya seuta Koleshi ywa Uwajemi achilagize.”

4Ivyo, awantu wendile wakekala ahantu aho niyo wakonga kuwatenda wafe chevu na kuwatisa Wayahudi chani wasekujendeleza kuzenga saviya wekambile. 5Naho wawafumbasa amasekulu wo ulongozi wa Ashulu wawahige Wayahudi. Wajendeleza kudamanya ivyo mwe ichipindi chose cho ulongozi wa Koleshi, kubula ichipindi cho useuta wa Dalio.

Uzesi uhya wa Yelusalemu wahigwa vituhu

6Aho nkongo mo ulongozi wa seuta Ahasuwelo, wankondo wa awantu wendile wakekala uko Yuda na Yelusalemu wawandikaga ulahi mwa awo na kumwigaila seuta Ahasuwelo.

7Naho mwe ichipindi cho ulongozi wa Alitashasita, seuta ywa Uwajemi na Bishilamu na Misiiledati na Tabeeli na wambuya zawo, wamwandikilaga seuta Alitashasita baluwa, Baluwa iyo yawandikagwa kwa mawandiko ya Chialamu na kutapitwa mo kusomwa.

8Naho sekulu Lehumu na Shimishai na mkulu wo mkowa, wamwandikilaga Alitashasita baluwa kuwalanga wantu wa Yelusalemu ikugamba, 9Baluwa ino yalawa kwa usekulu wa Lehumu na Shimishai mta kuwandika wo mkowa hamwenga na wetu, na wakantila na masekulu wose wadya umo mwe nkongo walawaga Eleki na Babiloni na Susa mwe isi ya Elamu, 10hamwenga na awantu wa si ntuhu idya Asuli banipali, mntu mkulu na mta nguvu awasamizaga na kuwaika mo mzi wa Samaliya na hantu hatuhu mo mkowa wa uswelo wa zuwa wa Eufulati.

11Ibaluwa yenye yendaga savino, “Kwa seuta Alitashasita, suwe wandima wako mo mkowa wo uswelo wa zuwa wa Eufulati, chakwigaila ndamsa.” 12“Chaunga weye seuta umanye, kugamba Wayahudi wezile kulawa ntendele ntuhu yo useuta wako waita Yelusalemu naho wauzenga uhya umzi ukwikalwa ni wantu wavu na wabanasi. Wabindiliza kuzenga iviwambaza vyakwe na kudamanya imisingi. 13Ivyo, chaunga umanye, weye seuta, kugamba mzi uno una zengwa uhya ne viwambaza vyakwe vina heza, hawalavye kodi, hegu maliho, naho ihazina yako naihunguke. 14Haluse, kwaviya suwe chakwetegeleza weye hachikunga kuwona ukabelwa, nivyo vikuleka chiwona ni vyedi chikugambile, 15chani udamanye uzuza mwe ichitabu cha wababa zako. Umo nowone kugamba kukongela nkongo, umzi uno wendaga na wata kuhituka na wata kuwatumbwadisa maseuta na masekulu we mikowa, na kugamba kukongela nkongo awantu wakwe na ni wankumbizi vitendese, nivyo vilekile umzi uwo ukabalangwa. 16Ivyo, seuta chakugambila kugamba umzi uwo unazengwa uhya, ne viwambaza vyakwe vinaheza kuzengwa, hodahe kuulongoza umkowa we intendele ya uswelo wa zuwa wo mto wa Eufulati.”

17Vikaheza seuta niyo awahitula, “Kwa Lehumu sekulu mta kuwandika na kwa Shishai mkulu wo mkowa, hamwenga na awetu wose wakwikala Samaliya na hantu hatuhu mo mkowa wa uswelo wa zuwa wa Eufulati.” 18“Ibaluwa mnigaile itapitwa na kusomwa kulongozi kwangu. 19Silavya lagizo udamanywe uzuza na ibunkulwa kugamba nichindedi kugamba kukongela nkongo umzi uno wa Yelusalemu wendile ukawahiga maseuta na kugamba awantu wakwe watenda wata kuhitukila na wankumbizi wakulu. 20Maseuta wata nguvu woulongozaga umzi uwo hamwenga no mkowa wa uswelo wa zuwa wa Eufulati wakatoza kodi na maliho mo useuta. 21Ivyo, lavyani lagizo awantu awo waleke kuzenga uhya umzi uwo kubula aho nanilavize malagizo matuhu. 22Naho, sinyisani mse kukawa kudamanya ivyo, nnase kubanikilwa.”

23Ahadya weze wasomelwe ibaluwa ino kulawa kwa Alitashasita na Lehumu, sekulu Shimishai na weyawe niyo wasunguza kwita Yelusalemu na kuwatintisa kwa nguvu Wayahudi waleke kuzenga umzi.

Uzesi we Inyumba ya Chohile wakonga vituhu

24Indima yo uzesi uhya we Inyumba ya Chohile uko Yelusalemu yachimalaga na kwikala ivyo kubula umhilimo wa kaidi wo useuta wa Dalio ywa Pelisiya.