Ezila 3

Kuzengwa uhya Imazabahu

1Wize ubule mwezi wa mfungate, na wantu wa Izilaeli wakatenda wekala mwe mizi yawo, wantu wose wechisanya hamwenga mo mzi wa Yelusalemu, 2Yeshua, mwana ywa Yosadaki, hamwenga na walavyantambiko weyawe na Zelubabeli mwana ywa Shealitieli, hamwenga no lukolo lwakwe, niyo wazenga uhya imazabahu ya Chohile ywa Izilaeli, chani wadahe kumlaviza malavyo ya kutikimya saviya viwandikwe mwe isigilizi ya Musa, mntu ywa Chohile. 3Waizengaga imazabahu iyo hantu ahadya yendaga aho kale, kwa viya nawaka wogoha awantu wadya wendile wakekala mwe isi iyo. Wakaheza watenda wakamlaviza Zumbe malavyo ya kutikimya mlanga mwakwe chila zuwa no mtondo na chisingi. 4Waitenda ingasu ya makumbi saviya viwandikwe mwe isigilizi, chila zuwa nawakalavya malavyo ya kutikimya yaungigwe kwa chausa cha zuwa idyo. 5Naho nawakalavya malavyo ya mazwela hamwenga ne izo chila zuwa yadya nayakatikimya vijima na malavyo yendaga yakalavigwa chipindi cha zuwa dya ngasu ya mwezi mhya na mwe mazuwa makulu matuhu yose yalagizwe ni Zumbe. Naho, nawakalavya ntambiko zose zilavigwe kwa kunga kwawo. 6Hatahegu msingi we nyumba ya Chohile nendile haunati kuzengwa, wantu na wakonga kulavya malavyo ya kutikimya kwa Zumbe Chohile kukongela zuwa dya nkongo dyo mwezi wa mfungate.

Kukonga kuzenga uhya Inyumba ya Chohile

7Wantu walavya hela za kuwaliha wata kusongola mayuwe na wazesi na wasongola mbawo, iviya nawakalavya nkande, na vintu vya kunywegwa na mavuta ya mizaituni, chani vigalwe mwe mizi ya Tilo na Sidoni vileke wenkigwe miti ya mielezi kulaila Lebanoni. Miti iyo yegalagwa kwa sila ya bahali kubula Yopa. Ayo yose yadamanyika kwa wambizi wa seuta Koleshi wa Pelisia. 8Ivyo, wantu wakongaga ndima mo mwezi wa kaidi wo mwaka wa kaidi weze wabule kweinyumba ya Chohile mo mzi wa Yelusalemu. Zelubabeli mwana ywa Shealitieli na Yeshua mwana ywa Yosadaki na walukolo wawo watuhu na walavyantambiko na Walawi na wantu watuhu wose wawiye Yelusalemu kulawa uko wasamizizagwa, welungaga nawo mwe ndima iyo. Walawi wose wendaga na mihilimo milongo midi hegu kujinka, wasagulagwa chani wachimaile ndima yo kuzenga uhya Inyumba ya Chohile. 9Yeshua na wana wakwe na walukolo wakwe, hamwenga na Kadimieli na wana wakwe, wo lukolo lwa Yuda wehangaga kuchimaila uzesi we nyumba ya Chohile. Wambizagwa ni welekwa wa Henadadi na walukolo weyawe Walawi.

10Wazesi eze wakonge kuzenga umsingi we Inyumba ya Chohile, walavyantambiko wakatenda wavika izi suche zawo zo ulavyantambiko, niyo wachimala hantu hawo na magunda mwe mikono. Walawi nawo wo lukolo lwa Asafu awo wachemi niyo wachimala na vilangu vyawo, ivyo, wamtunya Zumbe Chohile kutimilana na malagizo ya seuta Daudi wa Izilaeli. 11Niyo wachema wakaisana, wakamtunya Zumbe,

“Kwaviya ni ywedi, uwedi wakwe kwa Izilaeli wekala kalenakale.” Wantu wose niyo wenuila amaizwi yawo kwa nguvu zawo zose, wakamtogola Zumbe kwa kukonga kuzengwa umsingi we Inyumba ya Chohile. 12Walavyantambiko walozize na Walawi na vilongozi wa nkolo wendile wadalahala na wadya waionaga inyumba ya nkongo, niyo waila kwa izwi kulu weze waone umsingi we Inyumba ya Chohile impya wazengwa, hatahegu wantu watuhu walozize wenulaga maizwi kwa chinyemi. 13Wantu wadunduga kuwazagula maizwi ya chinyemi hegu ya ndilo kwaviya yendaga yaloza na kwivika hale vitendese.