Maseuta 9

Yehu atenda seuta ywa Izulaeli

1Chipindi icho, muwoni ywa Chohile Elisha amwitangaga yumwenga ywa waoni, amgamba, “Kwemalanye wite Lamoti uko Giliyadi. Guha ino isupa ya amavuta, 2ukabula uko, mlonde Yehu mwana ywa Yehoshefati endaga mwezukulu ywa Nimshi. Mguhe mwigale kwechumba che ichedu, hehene weyawe, 3ukaheza mjele yano amavuta mo mtwi wakwe, umgambe, ‘Zumbe Chohile agamba sikujela mavuta chani utende seuta ywa Izulaeli.’ Ukajika vugula ulwivi usunguze halawe ivyo nodahe.” 4Ivyo, mbwanga uyo muwoni niyo aita Lamoti Giliyadi. 5Eze abule, kawabwila masekulu wa wagomba nkondo hechitala. Niyo agamba, “Sekulu naunga hugambile ulosi wako.” Yehu niyo amuza, “Mwasuwe hano ni yuhi ukumgambila?” Amhitula, “Sekulu nalonga na weye.” 6Wose waidi niyo wengila mndani mwe ichumba, uko muwoni uyo ywa Chohile niyo amjela mavuta Yehu momtwi amgamba, “Zumbe Chohile ywa Izulaeli, agamba, ‘Nakujela mavuta utende seuta ywa awantu wangu wa Izulaeli. 7Uwakome awantu wemwekaya ya sekulu ywako Ahabu chani nimlihize Yezebeli chikoda cha kuwakoma awandima wangu waoni na awandima wangu watuhu wose. 8Wantu wose we ikaya ya Ahabu na welekwa wawo wa chilume nowakome. Naho nanimkome chila mntu ywe ikaya ya Ahabu mkulu hegu mdodo. 9Wantu we ikaya yakwe nawatende saviya wantu we ikaya ya Yeloboamu mwana ywa Neboti na awantu we ikaya ya Baasha mwana ywa Ahiya. 10Hahana mntu namhambe Yezebeli, chimba chakwe nachidigwe ni makuli mweisi ya Yezieli.’” Muoni uyo eze abinde kulonga ivyo niyo afosa kulawa kwechumba, aguluka. 11Yehu eze auye kwa aweyawe, yumwenga ywawo niyo amuza, “Uko ni kwedi? Yuno mchilalu aunga mbwani kwako?” Yehu awahitula “Uyo kehabwanta du.” 12Wowo wamgamba, “Icho sicho chindedi! Chigambile icho alongile!” Awagamba, “Kanigamba Zumbe Chohile kagamba, ‘Sikusagula utende seuta ywa Izulaeli.’” 13Aho masekulu wa awagomba nkondo weyawe niyo wahambula amakazu yawo, wazitantalika mwe ntantilo chani achimale mlanga mwakwe, niyo watowa magunda na kulonga, “Yehu ni seuta!”

Seuta Yolamu ywa Izulaeli akomwa

14Yehu mwana ywa Yehoshafati iviya endaga mwezukulu ywa Nimshi, amfungilaga njama Yolamu, Yolamu na wantu wose wa Izulaeli wendaga Lamoti Giliyadi wakaudima umzi usekutahwa ni seuta Hazaeli ywa Alamu. 15Mna seuta Yolamu nendile kauya komzi wa Yezieli chani auguze izinkenje apatile kwenkondo nawakagomba na Hazaeli seuta ywa Alamu. Yehu niyo awagamba maseku wa nkondo weyawe, “Uneva chinevana nyuwe na miye, mntu yoyose asekufosa Lamoti kwita Yezieli kwigala ulosi uno kuganmba miye ni seuta.” 16Aho, niyo akwela mwe idilingisha dyakwe ahinga Yezieli. Yolamu nendile hanati kuhona, seuta Ahaziya ywa Yuda nendile eyaho kamtalamkila. 17Mwamizi ywe uluzo kulanga komnala wa Yezieli niyo agamba, “Nawona wantu wakwiza na lingisha!” Yolamu niyo ahitula, “Sagula mkwela falasi yumwenga umtume chani akadugane nawo, awauze ‘Weza kwa utondowazi?’” 18Ivyo, mlosi uyo eze aite niyo adugana na Yehu, amgamba, “Seuta auza kuna utondowazi?” Yehu ahitula, “Ni mbwani wauza ivyo? Weye hituka unitimile!” Mwamizi kulanga komnala niyo agamba seuta, “Mlosi kawabwila, mna hakuya.” 19Ivyo, seuta Yolamu niyo asigila mlosi ywa kaidi, iviya kamuza Yehu ulosi saudya auzigwe ni mlosi ywa nkongo. Yehu niyo ahitula seiviya, “Ni mbwani wauza hegu kuna utondowazi? Weye hitula unitimile!” 20Yudya mwamizi niyo alonga vituhu, “Mlosi kawabwila mna hakuya.” Akaheza niyo ongezeza, “Myendesheze ye idilingisha nisaviya ya Yehu mwana ywa Nimshi, kwaviya Yehu afulusha idilingisha.” 21Elo, Yolamu seuta ywa Izulaeli niyo alagiza kugamba, “Malanya idilingisha.” Awo niyo wamalanya idilingisha dyakwe. Wakaheza Yolamu seuta ywa Izulaeli na Ahaziya seuta ywa Yuda wahalawa chila yumwenga kakwela idilingisha dyakwe, waita wakudugana na Yehu. Wambwila mwe chiwasa cha Naboti mntu ywa Yezieli. 22Yolamu eze amuwone Yehu, niyo amuza, “Yehu kuna utondowazi?” Yehu niyo amhitula, “Utondowazi ulawe kuhi, kuno wavilanga na wasai wa mama yako Yezebeli waloza?” 23Ivyo, Yolamu niyo ahitula idilingisha dyakwe na kuhalawa, kuno amgamba Ahaziya, “Ahaziya uno ni ubanasi!” 24Yehu niyo aguha uta wakwe niyo adula mvulo ufifinye hagati ha amayega ya Yolamu na kumtunga mo moyo wakwe, niyo abanika mlanga mwe idilingisha dyakwe. 25Yehu niyo amgamba mwambaizi ywakwe Bidikali, “Guha icho ichimba chakwe uchidule mweiyo inkonde ya Naboti mntu ywa Yezieli. Nafanyanya kugamba wakumbuka viya Zumbe Chohile alongile imilosi ino mwakwe umo weye na miye chakweile mwefalasi yetu mnyuma mwa Ahabu ise dyo Yolamu. 26Zumbe Chohile alongaga, ‘Kwa udya ukomi wa a Naboti na wanawe niwone mazuwa yajinkile nelisa kugamba nahulihize chikoda mwe inkonde iyo.’ Ivyo, guha ichimba icho cha Yolamu uchidule mweinkonde ya Naboti saviya Zumbe Chohile alongile.”

Seuta Ahaziya ywa Yuda akomwa

27Ahaziya seuta ywa Yuda eze awone ayo yalaile niyo asumka ahinga komzi wa Beti Hagani, kuno atimilwa ni Yehu. Yehu niyo awalagiza awantu wakwe, “Uyo naye mkomeni!” Awo niyo wamtunga mfulo akatenda emwe idilingisha dyakwe kweisila ikukwela kwita Guli hajihi noumzi wa Ibuleamu. Niyo ademadema asmkila Megido akubanikila uko. 28Awambizi wakwe niyo waguha ichimba chakwe mndani mwe idilingisha dyakwe wachigala Yelusalemu, uko niyo wamhamba kwe izimbila ze chiseuta komzi wa Daudi.

29Ahaziya akongaga kulongoza Yuda mo mhilimo wa mlongo na umwenga wo useuta wa Yolamu mwana ywa Ahabu.

Malikiya Yezebeli akomwa

30Yehu eze abule Yezilieli, Yezebeli nendile keva kale ulosi we izimbuli zilaile. Ehakaga wanja mwa ameso na kuchana izifili zakwe, niyo aita kwedidilisha akaula hasi. 31Umo akengila kwenchili Yezebeli niyo agamba, “Weye wi savya Zimli kwa wedi! Weye ukukoma awakulu wako?” 32Yehu niyo asinya kulanga na kugamba, “Ni yuhi entendele yangu?” Masekulu waidi hegu watatu niyo walaviza imitwi yawo kulawa mwe dilisha wamkaula Yehu, 33Yehu niyo agamba mduleni hasi uyo mvyele yamyalika intuhu mlanga mwe ichiwambaza ne intuhu mwe izifalasi umo zikamjatajata ne izingaga zawo, 34vikaheza, Yehu niyo engila mwe idizumba dye chiseuta, uko niyo adya na kunywa. Alagiza kugamba, “Mhambeni uyo mvyele aligitwe, kwaviya ni mchiche ywa seuta.” 35Mna, awantu weze waite chani wakamhambe, wabwila ingobela yo umtwi na amavuha ye ivifumba no ulwayo ivyodu. 36Wakaheza niyo wauya wamgambila ulosi uyo Yehu, uyo niyo agamba, “Ivyo nivyo Zumbe Chohile alongaga kujinkila mndima ywakwe Eliya mntu ywa Tishibi akagamba, ‘Makuli nayadye ichimba cha Yezebeli mweisi ya Yezilieli. 37Ichimba cha Yezebeli nachimwaganike saviya mavi mwe nkonde mwe isi ya Yezileli, ivyo hahana mntu nammanye.’”