Maseuta 8

Mvyele kulawa Shunemu auya

1Elisha eze amuyuse umwana ywa yudya mvyele nakekala komzi wa Shunemu, niyo amgamba uyo mvyele, “Zumbe Chohile kagwisa gumbo muno mweisi naditendeke kwa mihilimo mfungate, haluse nakulangiliza samila kwesi ntuhu weye na awantu wemwe inyumba yako.” 2Mvyele uyo niyo ahalawa na awantu wemwe inyumba yakwe saviya agambilwe ni Elisha mntu ywa Chohile aita akwikala saviya mjeni kwe isi ya Wafilisiti kwa mihilimo mfungate. 3Mihilimo mfungate ize ijinke niyo akulawa kweisi ya Filisiti auya Izulaeli aita kwa seuta alombeza avuzizwe inyumba yakwe ne inkonde yakwe. 4Yudya mvyele eze abule ambwila seuta alonga na Gehazi mndima ywa Elisha, amgamba, “Hampu nigambila izimpituko zikudamanywa ni Elisha.” 5Umo Gehazi achei kumgambila seuta ivyo Elisha auyuse mntu abanike, uyo mvyele niyo alonga idilombezo dyakwe kwa seuta. Gehazi niyo agamba, “Weye seuta, mvyele yuno nuyo mta umwana auyuswe ni Elisha!” 6Seuta eze amuze uyo mvyele, niyo amgambila ivyo alongile Gehazi ni chindedi. Seuta niyo amwitanga sekulu ywa awandima wakwe na kumlagiza kugamba, mvyele uyo avuzizwe ivintu vyakwe vyose hamwenga na ivyo vilawane mwe inkonde yakwe kwa mihilimo yose iyo mfungate umo hehali.

Elisha na seuta Beni Hadadi ywa Alamu

7Elisha niyo aita Damesiki. Chipindi icho seuta Beni Hadadi endaga mnyonje, eze agambilwe kugamba Elisha eyuko Damesiki, 8niyo amgamba Hazaeli yumwe mwa amasekulu ywa awandima wakwe, “Mwigaile majeleko mntu ywa Chohile mgambe aunge ulangilizi kwa Zumbe Chohile kugamba nanihone hegu bule.” 9Ivyo, Hazaeli niyo akweza majeleko yesimane mwe ngamiya milongo mine amwigaila Elisha. Eze abule kwa Elisha amgamba, “Mndima ywako Beni Hadadi seuta ywa Alamu kanituma kwako huze unyonje wakwe nahone hegu bule?” 10Elisha niyo amhitula, “Hita kamgambe chindedi nahone, mna Zumbe Chohile kanilagisa kugamba nabanike.” 11Aho, Elisha niyo amfantwila meso akatenda na nkama, vyamhosa Hazaeli engilwe ni nkama. Chimpumpa, Elisha mntu ywa Chohile niyo akonga kwila. 12Hazaeli niyo amuza, “Sekulu ywangu walizwa ni mbwani?” Elisha ahitula, “Kwaviya simanya ivihiye ukunga uwadamanyize awantu wa Izulaeli. Notikimye izingome zawo, wabwanga wawo nowakome, wana wawo nauwahonde, wavyele wasoka nowatumbule.” 13Hazaeli niyo amuza, “Miye mndima ywako nisaviya kuli du, nanidahe vivihi kutenda mbuli nkulu saizo?” Elisha niyo amhitula, “Zumbe Chohile kanilagisa kugamba notende seuta ywa Alamu.” 14Hazaeli niyo ahalawa auya kwa sekulu ywakwe. Seuta Beni Hadadi niyo amuza, “Elisha kakugaze?” Hazaeli amhitula, “Kanigamba chindedi nohone” 15Mna zuwa ditimile Hazaeli niyo aguha mgolole uzamile adilweka mwe mazi, akaheza amgubika nadyo mouso kubula abanika. Beni Hadadi eze abanike, Hazaeli niyo alongoza Alamu.

Seuta Yeholamu ywa Yuda

16Mo mhimo wa shano wo ulongozi wa Yolamu mwana ywa Ahabu, seuta ywa Izulaeli, Yeholamu mwana ywa Yehoshefati, akongaga kulongoza mweisi ya Yuda. 17Kakonga kulongoza akatenda na mihulimo milongo mitatu na midi. Kalongoza uko Yelusalemu kwa mihilimo mnane. 18Katimila sila zihiye za amaseuta awatuhu wa Waizulaeli. Saviya wantu we ikaya ya Ahabu watendile, kwaviya mkaziwe endaga ni mchiche ywa Ahabu. Niyo adamanya yehiye kulongozi kwa Zumbe Chohile, 19mna Zumbe Chohile haungile kuwakoma awantu wa Yuda, kwaviya nakaika ndagano kugamba welekwa wa mndima ywakwe Daudi, nawajendeleze kulongoza mazuwa yose. 20Umo Yeholamu akalongoza wantu wa Edomu niyo wauhituka ulongozi wa Yuda, vyaleka wasagula seuta ywawo. 21Ivyo, Yeholamu na wagomba nkondo na amalingisha yakwe yose wahalawaga waita Zaili. Nechilo afosaga na masekulu wakwe wa amalingisha wawebunga Waedomu wendaga wamtandama, mna awagomba nkondo wakwe niyo wafifinya wasumka wauya kwe izikaya zawo. 22Ivyo, awantu wa Edomu wauhituka ulongozi wa Yuda kubula vino haluse. Mwe ichipindi icho wekazi wo umzi wa Libina, nawo niyo wahitukila. 23Mbuli zose ntuhu adamanye seuta Yeholamu ziwandikwe mwe ichitabu cha mbuli za Lukumbusa za amaseuta wa Yuda. 24Yeholamu niyo abanika ahambwa kweizimbila za amaseuta komzi wa Daudi, mwanawe dya Yeholamu akwitangwa Ahaziya niyo atenda seuta hantu hakwe.

Seuta Ahaziya ywa Yuda

2Mihilimo 22:1-6

25Mo mhilimo wa mlongo na midi wo ulongozi Yolamu mwana ywa Ahabu seuta ywa Izulaeli, Ahaziya mwana ywa Yeholamu seuta ywa Yuda akongaga kulongoza. 26Ahaziya akongaga kulongoza akatenda na mihilimo milongo midi na midi, kalongoza komzi wa Yelusalemu kwa mhilimo umwenga. Nine naketangwa Ataliya mchiche ywa seuta Ahabu na endaga mwezukulu ywa seuta Omli ywa Izulaeli. 27Kwaviya Ahaziya endaga mkwelima ywa awantu we ikaya ya Ahabu, katimila lujendo lwa awantu awo we ikaya ya Ahabu, kadamanya mbuli zihiye kulongozi kwa Zumbe Chohile, saviya awantu we ikaya ya Ahabu wadamanye. 28Seuta Ahaziya niyo aita hamwenga na Yolamu mwana ywa Ahabu seuta ywa Izulaeli wakugomba nkondo na Hazaeli seuta ywa Alamu uko Lamoti Giliyadi, Wagomba nkondo wa Alamu niyo wamlumiza Yolamu mwe inkondo. 29Vikaheza, Seuta Yolamu niyo auya komzi wa Yezileli chani atabanwe izinkwenje zakwe alumizwe uko komzi wa Lama mo ukugomba nkondo na Hazaeli seuta ywa Alamu. Ahaziya niyo aita akamkaule Yolamu uko komzi wa Yezileli kwaviya nendile ni mnyonje.