Maseuta 7

1Elisha niyo amhitula, “Tegeleza ulosi wa Zumbe Chohile, ‘Luvi chipindi sachino, muno momzi wa Samaliya chilo ntatu za unga wedi wa ngano nautagwe kwa chihande chimwenga cha chumbu na makopo maidi ya shayili nayatagwe kwa chihande chimwenga cha shekeli mwe inchili yo umzi.’” 2Sekulu mkanuni ywa seuta niyo amgamba Elisha, “Hata hegu Zumbe Chohile mwenye adamanye madilisha kwembingu, togola mbuli saiyo naidahike!” Elisha niyo amhitula, “Kwameso yako nauwone, mna haudye.”

Wagomba nkondo wa Alamu wahalawa

3Kwendaga na wantu wane wata unyonje wa matana uko kwe izinyivi zo umzi wa Samaliya, awo wagambilana wowo wenye, “Ni mbwani chekala hano chafa sala? 4Hata chikengila komzi ni vyabule kwaviya uko nachife. Ivyo chiteni kwenkambi ya wantu wa Alamu, vyadahika nawachikome hegu wasekuchikoma.” 5Ivyo, chiza chize chikonge kwingila, niyo waita kwe inkambi ya awantu wa Alamu, mna weze wabule uko, wakaule! Hawabwile mntu. 6Zumbe Chohile kaditenda idibunga dya awagomba nkondo wa Alamu weve izwi saviya wagomba nkondo walozize wendile na myutuka na falasi. Wagomba nkondo wa Alamu nawafanyanya kugamba seuta ywa Izulaeli kagoneka wagomba nkondo Wahiti na Wamisili weze wawebunge. 7Ivyo, mwe ichilo icho, Waalamu wose niyo wasumka chani wahonye ujima wawo, wasa amahema yawo, falasi ne izimpunda zawo, hata inkambi wayasa ichedu wogoha file. 8Wadya wata amatana awane weze wabule mwe mpembe ye inkambi, niyo wengila mwe hema dimwenga, wadya na kunywa viya wabwile umo, wakaheza waguha hela na zahabu na suche wazifisa. Wengila kwehema tuhu wadamanya seivyo. 9Mna niyo wagambilana, “Chino chikudamanya sicho chedi! Ino ni mbuli yedi chinanayo dyelo, hegu chinagoja kubula mtondo chadaha chikantilwe. Chisunguze kwita chigambile wantu kwenyumba ya seuta!” 10Ivyo, niyo wahalawa he inkambi ya Waalamu waita kwa wamizi womzi na kuwagamba, “Nachita kwenkambi ya wagomba nkondo wa Alamu, mna hachiwone hegu kwiva mntu yoyose. Falasi ne izimpunda zichei zitalizwa, amahema yawo ni saviya wayasize.” 11Wamizi womzi niyo wakulonga ulosi uwo kubula kwenyumba ya seuta. 12Seuta eze eve ulosi uwo iviya kuchei chilo niyo enuka awagambila masekulu wakwe, “Miye simanya umwalo wa Waalamu! Wamanya kuno komzi china gumbo, haluse wasa inkambi yawo waita wakwefisa kwezinkonde chani umo chinaita chikalonde nkande wachigwile chose chiwajima na kutaha umzi.”

13Mna yumwenga ywa wadya amasekulu wakwe niyo agamba, “Wantu walozize muno monzi wafa sala kale. Haluse sigila wantu wajeche waite na falasi shano mwe ziya zisigale chani wakakaule icho chilaile.” 14Niyo wasagula wantu na kuwenka myutuka midi. Seuta awasigila wawabase wagomba nkondo wa Alamu, awagamba, “Hitani mkakaule icho chilaile mwa awagomba nkondo wa Waalamu.” 15Wantu awo niyo wawatimila kubula Yolodani mwesila wawona suche na vimpandwa vituhu vyasigwe ni wagomba nkondo wa Alamu umo wakasumka. Niyo wauya wamgambila seuta ulosi wawone. 16Wantu wa Samaliya niyo wafosa wataha inkambi ya Waalamu. Saviya Zumbe Chohile alongile, chilo shano za unga wedi wa ngano hegu chilo mlongo za shayili zitagwa kwa chihande chimwenga cha chumbu. 17Seuta ywa Izulaeli nendile kaika sekulu yudya mwamizi ywakwe amile inchili yomzi. Sekulu uyo ajatagwa ni wantu aho henchili na kubanika saviya Elisha alongaga umo seuta aitaga kumuwona. 18Elisha amgambaga seuta chipindi saicho zuwa naditimile, chilo shano za unga wedi wa ngano hegu chilo mlongo umwenga za shayili nazitagwe kwa chihande chimwenga cha chumbu, 19mna sekulu uyo amhigaga Elisha, akagamba, “Hata hegu Zumbe Chohile mwenye adamanye madilisha kwembingu, mbuli iyo haidahike.” Elisha niyo amhitula, “Weye nauwone yakalaila mna weye inkande iyo howidye” 20Ivyo nivyo vilaile sekulu uyo kabanika kwa kujatwa ni wantu kwe inchili yo mzi.