Maseuta 6

Hoya yavululwa

1Zuwa dimwenga dya waoni wamfuzumilaga Elisha wakagamba, “Hantu hano chikwikala ni hadodo hachikwenela!. 2Haluse leka chite Yolodani chikakante zengo chila mntu azenge hantu hakwe hakumwenela.”

Elisha niyo awahitula “Hitani.”

3Yumwenga mgati mwawo niyo amgamba, “Nakweila hampu hita na awandima wako.” Niyo azumila, 4elo niyo aita hamwenga nawo, weze wabule ko mto wa Yolodani niyo wakonga kukanta idizengo. 5Umo wakakanta imiti yumwenga ywawo, ihoya yakwe niyo yasomoka mo mhini yagwela mwe mazi, aho niyo akonga kwila akagamba, “Haluse sekulu ywangu nitende zeze? Hoya ino chita kuilombeza!”

6Elisha niyo amuza, “Igwela hahi?”

Niyo amlagisa aho igwele. Elisha niyo afyola kaziti akadula ahadya hagwele ihoya, ihoya niyo yeleleka mlanga mwa amazi. 7Elisha niyo amlagiza ivulule naye niyo achulusa umkono aivulula.

Wagomba nkondo wa Alamu wahudwa

8Nendile hana nkondo ya Waalamu na Waizulaeli. Niyo seuta ywa Alamu alafya na awandima wakwe vilongozi, agamba, “Nkambi yangu naitende hantu hasiku.” 9Mna Elisha niyo amwigaila ulosi seuta ywa Izulaeli akaulise, kwaviya Waalamu wemalanya kale wahebunge ahantu aho. 10Niyo seuta ywa Izulaeli egala wagomba nkondo wakwe hajihi na ahantu aho agambilwe. Elisha niyo ajendeleza kumfunda seuta emalanye kwa nkondo. Imbuli iyo ilaila nkanana zilozize.

11Seuta ywa Alamu niyo ehiwa vidala mwe imbuli iyo. Kawetanga awakulu wa awagomba nkondo wakwe, niyo awauza, “Mnigambile ni yuhi mgati mwenu akutenda ntendele ya seuta ywa Izulaeli?”

12Yumwenga ywawo niyo ahitula, “Hahana akutenda ntendele yakwe, weye seuta. Akudamanya viya ni Elisha, muwoni akutenda kudya Izulaeli. Uyo amgambila seuta ywa Izulaeli mbuli zose ukulonga hata ukatenda kwechumba chako ukugona.” 13Seuta ywa Alamu awagamba, “Hitani mkamlonde uko eli, miye nanisigile wantu waite wakamgwile.” Elo, eze agambilwe Elisha ekomzi wa Dosani, 14seuta niyo egala bunga dya wagomba nkondo walozize hamwenga na malingisha. Bunga idyo dibula nechilo niyo dyautandama umzi. 15Zuwa ditimile mtondo wakwe, mndima ywa Elisha asunguzaga kwinuka na kufosa kuse, niyo awona bunga dya wagomba nkondo na falasi na malingisha watandama umzi. Niyo auya kunyumba amgamba Elisha, “Sekulu ywangu file yetu ibula! Haluse chatenda zeze?” 16Elisha niyo amhitula, “Usekogoha kwaviya awo nawachambize waloza kujinka awo nawawambize.” 17Elisha niyo alombeza, “Weye Zumbe Chohile, mgubule ameso chani awone!” Zumbe Chohile niyo amgubula ameso uyo mbwanga, awona falasi na myutuka ya moto imema chila hantu mo ulugulu lose, vimzunguluka Elisha. 18Wagomba nkondo wa Ashule weze wamsogeile Elisha, niyo alombeza vituhu agamba, “Weye Zumbe Chohile, nakulombeza watende matuntu wano awantu!” Zumbe Chohile niyo azumila idilombezo dya Elisha awatenda matuntu awo awantu. 19Elisha niyo awabasa awagamba, “Mwaga sila, mzi mkulonda suwo uno. Ntimilani niwegaleni kwa uyo mkulonda.” Niyo awalongoza kubula Samaliya. 20Ahadya weze wengile momzi, Elisha niyo alombeza, “Weye Zumbe Chohile nakulombeza wagubule ameso wano awantu chani wawone.” Zumbe Chohile niyo azumila idilombezo dya Elisha, awagubula ameso awantu awo. Wakaule wawona wehagatigati homzi wa Samaliya. 21Seuta ywa Izulaeli eze awawone awo Awaalamu, amuza Elisha, “Togola sekulu niwakome?” 22Elisha niyo amhitula, “Waleke usekuwakoma. Wano wantu huwatahile kwa kugomba nkondo nawo, wenke nkande wadye na mazi wanywe, ukaheza waleke wauye kwa sekulu ywawo.” 23Seuta ywa Izulaeli niyo awadamanyiza ngasu nkulu, weze waheze ukudya na ukunywa, niyo awavuza kwa sekulu ywawo. Kukongela ichipindi icho awantu wa Alamu hawayebungile isi ya Izulaeli kwa chipindi chitali.

Wagomba nkondo wa Ashulu wautandama umzi wa Samaliya

24Mna, nyumani seuta Beni Hadadi ywa Alamu niyo achisanya bunga dya wagomba nkondo wakwe wose aita akutandama umzi wa Samaliya. 25Ulailo wakwe mo umzi wa Samaliya niyo kwatendeka na gumbo ditendese. Mtwi wa mpunda naukatagwa kwa vihande vya chumbu milongo mnane na gilamu gana dimwenga za mavi ya wasuwamanga nazikatagwa kwa vihande vya chumbu vishano. 26Zuwa dimwenga seuta ywa Izulaeli umo endaga akajenda mlanga mwe chiwambaza chomzi, evaga mvyele akamgamba, “Nambiza sekulu ywangu, nambiza!” 27Seuta amgamba, “Zumbe Chohile hanakwambize, miye sanidahe kukwambiza. Kwaviya sina ngano hegu zabibu. 28Seuta amuza, hwambize mbwani?” Mvyele uyo niyo ahitula, “Mazuzi yuno mvyele kaniluvya chimdye mwanangu ukajika luvi nachimdye mwanawe. 29Ivyo mwanangu chimwambika na kumdya. Mtondo wakwe namgamba chimdye mwanawe, mna yeye nendile kamfisa!” 30Seuta eze eve ulosi wa uyo mvyele, niyo atatula izisuche zakwe kwa chinyulu, wantu wendile haguhi ne ichiwambaza wawona kugamba seuta kundani nendile kavika juniya. 31Niyo agamba, “Dyelo, Elisha mwana ywa Shafati hanakantigwe umtwi wakwe, Zumbe Chohile anikome!” 32Niyo asigila mlosi aite akamguhe Elisha. Chipindi icho Elisha endaga kunyumba na wadalahala wamtalamkile. Mlosi uyo ywa seuta umo henati kubula, Elisha niyo awagamba wadya awadalahala,

“Yudya mkomi kasigila mntu eze anikante umtwi! Anabula hano vugalani ulwivi, mnasekumleka akengila kunyumba. Kwaviya sekulu ywakwe amtimila mnyuma.” 33Iviya henati kubinda ukulonga, seuta niyo abula, agamba, “Uchiwa uno ulawa kwa Zumbe Chohile! Ni mbwani nijendeleze kumgoja vituhu?”