Maseuta 5

Namani ahonywa

1Namani mkulu ywa wagomba nkondo wa seuta ywa Alamu amanyikaga na kungiswa ni sekulu ywakwe, kwaviya kujinkila uyo, Zumbe Chohile nendile akainka uhuda isi iyo ya Alamu. Nendile ni mgomba nkondo mkankalu, mna nendila ana unyonje wa matana. 2Mwe nkondo nendile wakagomba na wantu wa Izulaeli, wantu wa Alamu nendile waguha kandele kulawa Izulaeli, uyo niyo atende mndima ywa mkaza Namani. 3Zuwa dimwenga niyo mndele uyo amgamba nine, mkaza Namani, “Hegu sekulu ywangu aitile akamwone yudya muwoni akwikala Samaliya nakamhonya amatana yakwe.” 4Namani eze eve imbuli iyo, niyo aita kwa sekulu akumgambila ulosi ulongigwe ni kadya akandele. 5Seuta ywa Alamu niyo amgamba, “Hita nanimtumile baluwa seuta ywa Izulaeli.”

Namani niyo ahalawa kuno kaguha vihande elufu milongo mitatu vya mayuwe ya chumbu na vihande vya zahabu elufu mtandatu, naho na shuche ntana mlongo umwenga. 6Ibaluwa iyo egale kwa seuta ywa Izulaeli nendile iwandikwa vino, “Ibaluwa ino ni chilagiso kwako cha mndima ywangu mkulu Namani, chani umhonye unyonje wakwe.”

7Mna seuta ywa Izulaeli eze asome ibaluwa iyo niyo atatula izisuche zakwe agamba, “Ni mbwani seuta ywa Alamu aunga nimlagule mntu ywakwe unyonje? Afanyanya miye ni Zumbe Chohile akudaha kukoma hegu kuuyusa? Kaulani mntu yuno anunga nkumbizi.”

8Elisha muwoni ywa Zumbe Chohile eze eve ulosi kugamba seuta ywa Izulaeli katatula izisuche zakwe, niyo egala ulosi kwa seuta amuza, “Ni mbwani kutatula izisuche zako? Nigaila uyo umntu, chani amanye kugamba kwe isi ya Izulaeli kuna muwoni.”

9Namani niyo aita na falasi ne myutuka yakwe kubula ko lwivi lwe inyumba ya Elisha. 10Elisha niyo asigila mndima ywakwe akamgambile, “Hita ukahake ko mto wa Yolodani nkanana mfungate, nkanda yo mwili wako nayuye, nohone vitendese.” 11Mna Namani niyo emukwa ni maya vitendese, ahalawa zakwe akagamba, “Nahagamba nanibase amlombeze Zumbe Chohile, Chohile ywakwe, ajise imikono yakwe muno mwa matana chani anihonye! 12Imito ya Abana na Falipali ya uko Damesiki, ni yedi kujinka imito yose ya Izulaeli, Togola sadahile kuhaka umo niyo nahona?”, Niyo ahituka ahalawa chimayamaya. 13Wandima wakwe niyo wambasa wamgamba, “Sekulu ywetu hegu muwoni akugambile udamanye mbuli siku ndala, togola hwaidamanye? Haluse, icho akugambile du ni kugamba, ‘Kwesunte chani uhone!’ ” 14Ivyo, Namani niyo asela ko mto wa Yolodani etubwiza nkanana mfungate, saviya alagizwe ni Elisha mntu ywa Chohile, niyo ahona. Inkanda yakwe ideleka saviya ya mwana mteke. 15Namani na awandima wakwe niyo wauya kwa Elisha, agamba, “Haluse simanya kugamba hahana Chohile yoyose mna Chohile ywa Izulaeli uyodu, ivyo haluse hampu hokela amalavyo ya miye mndima ywako.” 16Elisha ahitula, “Nelisa kwa zina dya Zumbe Chohle mta ujima uyo husankanila, kugamba sanihokele malavyo yoyose.” Namani amlahiliza na kumweila, mna Elisha niyo ajendeleza kulemela. 17Namani agamba, “Hegu amalavyo yangu hoyahokele, hampu mwinke mndima ywako ulongo ukudaha kwinulwa ni mpunda mbili, kwaviya kukongela vino dyelo miye mndima ywako sanilavye malavyo ya kutikimya hegu ntambiko kwa milungu mituhu mna kwa Zumbe Chohile uyodu. 18Zumbe Chohile anilekeile hatimilana na seuta ywangu kwita kokuvika kwenyumba ya Limoni mnungu ywa Alamu. Namlombeza Zumbe Chohile anilekeile!” 19Elisha amgamba, “Hita kwa utondowazi” Namani niyo aita zakwe. 20Umo Namani henati kubula hale, Gehazi mndima ywa Elisha mntu ywa Chohile, elongela chimoyo moyo, “Kaula sekulu ywangu kamleka Namani, yuno ywa Alamu ahalawe vihufu hahokole vintu egale. Haluse kwa ukanuni nelisa kwa zina dya Zumbe Chohile mta ujima, namgulukila henkigwe chintu kulawa kwakwe.” 21Niyo ahalawa ambasa Namani. Namani eze akaule awona mntu akumgulukila, niyo asela mwe idilingisha dyakwe aita akudugana naye. Niyo amuza, “Togola ni kwedi?” 22Gegazi ahitula, “Mbuli zose zichuma, mna sekulu ywangu kanilagiza hugambile kugamba ivino haluse kahokela wajeni waidi wa bunga dya waoni mweisi ya amagulu ya Efulaimu, haluse aunga umwinke matundu elufu ntatu na suche mbili ntana.” 23Namani ahitula, “Chindedi, guha matundu elufu mtandatu.” Amweila azihokele, amvungila mavunje maidi na kumwinka suche mbili ntana, awenka wandima waidi mgati mwa awandima wakwe awalagiza wamsindikize Gehazi. 24Weze wabule kolugulu akwikala Elisha, Gehazi niyo aguha amavunje ye izihela kulawa kwa awandima wa Namani ayegala kunyumba kwakwe. Vikaheza awaleka wadya awandima waite zawo, awo niyo wahalawa. 25Akajika Gehazi niyo engila kunyumba kwa Elisha akonga kumsankanila. Elisha niyo amuza, “Nakwita kuhi?” Gehazi ahitula, “Nendile sitile hantu hohose.” 26Mna Elisha niyo amgamba, “Togola iloho yangu hayendile hamwenga na weye umo yudya mntu akasela mwe idilingisha dyakwe na kwiza kudugana na weye? Chino ni chipindi cha kuhokela hela na suche na nkonde za mizaituni na ngoto na ng'ombe hegu wandima wa chigosi na wachiche? 27Ivyo amatana ya Namani yakwikwingile weye na awelekwa wako mazuwa yose.” Elo, Gehazi niyo ahalawa akatenda katozwa ni matana, nkanda yakwe itenda ing'ala chweee.