Maseuta 4

Elisha amwambiza mchiwa abanikilwe ni mgosiwe

1Elo mvyele yumwenga mgati mwa wakaza wanampina wa waoni nakambasa Elisha, niyo amgamba, “Mndima ywako mgosi wangu kabanika, wemwenye kuvimanya kugamba mndima ywako nendile akamvikila Chohile, mna nendile ana mdeni ywakwe akumtigiza mapesa keza awaguhe wanangu waidi awatende wandima wakwe.”

2Elisha niyo amuza, “Hutendele mbwani? Nigambila icho unanacho kunyumba.”

Mvyele uyo niyo amgamba, “Miye mndima ywako kunyumba sina chintu mna nna kasupa ka mavuta.”

3Elisha niyo amgamba “Hita kwa awantu wihaguhi nawo wakwinke madumu heyena chintu vitende yalozize ivyo nopate. 4Ukajika wite weye na wanawo mkevugaile kunyumba, mkonge kuyamemeza mavuta. Chila dumu mkumemeza dikeni hampezo.”

5Niyo aita akwevugaila kunyumba na wanawe, wakonga kujuluza mavuta mwa amabiga avyo. 6Amadumu yose yeze yameme, niyo amgamba mwana uyumwenga, “Nigaila chiya chituhu.” Mwanawe niyo amhitula, “Hahana dumu tuhu!” Mavuta niyo yaleka kujuluzika. 7Niyo auya kwa yudya mntu ywa Chohile niyo amgambila imbuli iyo. Elisha niyo amgamba, “Hita ukatage amavuta ayo ulihe amadeni yako, ukajika weye na wanawo namwikale mkajeseza ayo nayasigaile.”

Elisha na mvyele mgoli kulawa Shunami.

8Zuwa dimwenga Elisha nendile kaita Shunami, kwendaga na mvyele yumwenga mgoli akwikala uko. Mvyele uyo niyo amgoneka Elisha akadye nkande kwakwe, kukongela idizuwa idyo niyo Elisha atenda mazwela ya kudya nkande kwakwe chila akajinkila uko. 9Mvyele uyo niyo amgamba mgosiwe, “Kokanuni mntu yuno akwiza hano hetu chila nkanana kakukizwa ni Chohile. 10Chimzengela chumba kwe igolofa chimwikiye lusazi na meza na fumbi na ta, chani chila akeza kuchitalamkila afikile umo.”

11Zuwa dimwenga Elisha niyo atalamka uko, niyo akwela kwe ichumba icho chani akagone. 12Niyo amgamba umndima ywakwe Gehazi, “Mwitange uyo mvyele Mshunami.” Eze etangwe niyo eza achimala kulongozi kwakwe. 13Elisha niyo amgamba Gehazi “Mgambe, chiwona ivyo uchidamanyize, haluse aunga chimdamanyize mbuli yani? Chimlombezeze ulosi kwa seuta, hegu kwa chilongozi ywa bunga dya wagomba nkondo?” Mvyele uyo niyo ahitula, “Hano hwikala nekala na wantu wangu mwenye.”

14Elisha niyo agamba, “Haluse chimtendele mbwani?” Gehazi ahitula “Kokanuni hana mwana, naho mgosiwe kadalahala.” 15Elisha niyo amgamba Gehazi “Mwitange” Gehazi niyo amwitanga. Mvyele uyo niyo eza achimala holwivi. 16Elisha amgamba, “Mhilimo ukwiza chipindi sa chino notende na mwana mwe mikono yako.” Mvyele uyo ahitula, “Bule sekulu ywangu! Weye wi mntu ywa Chohile usekunidanta miye mndima ywako!” 17Mna uyo mvyele atendaga msoka na kwefungula mwana chipindi sa icho mhilimo utimile, saviya agambilwe ni Elisha. 18Mwana uyo niyo akula, zuwa dimwenga ambasaga ise endile akavuna hamwenga na awavuni wakwe. 19Niyo amgamba ise, “Hoi mtwi wangu!” “Mtwi wangu waniluma.” Ise niyo amgamba mndima ywakwe yumwenga, “Mwigale kwa nine.” 20Eze egalwe kwa nine, niyo ekala mlanga mwe iviga vya nine kubula nomsi, niyo abanika. 21Nine niyo amwigala na kumgoneza kolusazi lwa umntu ywa Chohile, avugala ulwivi na kuhalawa. 22Kamwitanga mgosiwe amgamba, “Ninka mndima yumwenga na mpunda imwenga, chani nisunguze kumbasa yudya mntu ywa Chohile, haheza nanuye.” 23Mgosiwe amuza, “Ni mbwani waunga umwone dyelo? Dyelo ni zuwa dya ngasu ya kutontomoka mnenge naho ni zuwa dya kuhumula.” Mvyele uyo ahitula, “Usa nkama.” 24Katandika impunda na kumgamba mdima ywakwe, “Haluse sunguza nyaguliza, kubula aho nahugambe hunguza.” 25Elo, niyo ahalawa abula kolugulu lwa Kalimeli uko endile mntu ywa Chohile. Mntu ywa Chohile eze amwone eza, niyo amgamba mndima ywakwe Gehazi, “Kaula namwona yudya mvyele ywa Shunami eza. 26Sunguza guluka ukadugane naye umlamse, ‘Wivihi? Mgosiwo evihi? Mwanawo evihi?’” Ivyo, Gehaza eze aite na kumlamsa mvyele uyo Mshunami niyo ahitula, “Chiwedi.” 27Eze abule kolugulu kwa mntu ywa Chohile niyo amtoza iviga, Gegazi asogela chani amuse, mna Elisha amgamba, “Mleke kwaviya ana chinyulu chitendese, naye Zumbe Chohile hanigambile imbuli iyo.” 28Mvyele uyo amgamba Elisha, “Sekulu ywangu, togola miye sikulombeza mwana? Sikugambile usekuninka msuhi naunilumize umoyo nyumani?” 29Elisha niyo amgamba Gehazi, “Guha inkome yangu usunguze kuhalawa. Usekuchimala mwesila kulamsa mntu yoyose, naho mntu yoyose nakulamse mwesila usekumwitikila. Kagoneze inkome yangu mwe chinengo cho umwana.” 30Yudya mvyele amgamba Elisha, “Nelisa kwa zina dya Zumbe Chohile mta ujima, chindedi sahwase.” Ivyo, Elisha enuka aitanya na uyo mvyele. 31Gehazi nendile kawalongoila, eze abule aika inkome ya Elisha mlanga mwe chinengo cho umwana, mna chilagiso chochose cha ujima hachilaile. Auya adugana na Elisha amgamba, “Umwana hauyuke.” 32Elisha eze abule, niyo engila kwechumba ichedu, amwona yudya mwana kalambala mlanga mo lusazi kabanika. 33Ivo, kavugala ulwivi amlombeza Zumbe Chohile. 34Niyo agona mlanga mwa yudya mwana, mlomo wakwe aubantika mo mlomo wa yudya mwana, meso yakwe mwa meso yo mwana, mikono yakwe mwe mikono yo umwana. Umo achei mlanga mwa yudya mwana, mwili wa uyo mwana niyo wakonga kubwikana moto. 35Elisha niyo achimala akonga kujenda jenda mwe chumba, akajika niyo auya naho agona mlanga mo mwana. Yudya mwana niyo ajela mitisha nkanana mfungate, akaheza niyo agubula ameso. 36Elisha niyo amwitanga Gehazi amgamba, “Mwitange nine dya yuno mwana.” Eze abule Elisha amgamba, “Mguhe mwanawo.” 37Niyo afunama mwe iviga vya Elisha kwa ntunyo amguha mwanawe afosa kuse.

Mpituko ntuhu adamanye Elisha

38Elisha auyaga kweisi ya Giligali kukatenda kuna gumbo. Zuwa dimwenga akawahinya bunga dya waoni, amgambaga mdima ywakwe, “Sika biga mwediziko uwambikile waoni.” 39Yumwe ywawo niyo aita kwenkonde akwaha mboga. Uko niyo awona lusongabwa, niyo aha masongambwa yalozize viya adahile kwaha. Kaita nayo kayasenga senga na kuyajela mwedibiga heyamanyize ni mabwani. 40Nkande niyo yomolwa. Mna weze walume wamwilila Elisha wamgamba, “Elisha nkande ino naichikome!” Wadunduga kuidya. 41Elisha niyo alagiza egailwe unga, niyo egailwa, kaujela mndani mwe idibiga agamba, “Haluse wenkeni nkande wadye.” Niyo wadya hahana ahumile.

Elisha alisa wantu gana dimwenga

42Mntu yumwenga kulawa Baali Shalisha amwigailaga Elisha migage milongo midi idamanywe kwa shaili ya malimbulo yo ulozo wo mhilomo uwo na maiso mabisi ya ngano mwe juniya. Elisha niyo amlagiza Gehazi awenke awantu wadye 43Mndima ywakwe niyo amgamba, “Saniwenke kwaviya haiwachinte wantu gana dimwenga.” Elisha niyo amgamba, “Wenke wadye, kwaviya Zumbe Chohile kagamba nawadye wegute na intuhu naisigale.” 44Mndima ywakwe niyo awamalanyiza nkande, wose wadya na kwiguta, nkande ntuhu niyo yasigala, saviya mndima ywa Zumbe Chohile alongile.