Maseuta 3

Nkondo ya Waizulzeli na Wamoabu

1Mo mhilimo wa mlongo umwenga na mnane wo useuta wa seuta Yehoshafati ywa Yuda, Yolamu mwanawe ywa Ahabu niyo akonga kulongoza mwe isi ya Izulaeli, kalongoza kukongela Samaliya kwa chipindi cha mihilimo mlongo umwenga na midi. 2Yolamu niyo adamanya yehiye kulongozi kwa Zumbe Chohile, mna havyendaga saviya vya ise na nine, kwaviya nakatula umnala wa Baali adamanyaga ise. 3Mna Yolamu halekile kukola masa saviya seuta Yeloboamu mwanawe dwa Nibeti amlongoile, uyo akolaga masa niyo awahosa Waizulaeli wakola masa.

4Mesha seuta ywa Moabu, nendile ni mfugi ywa ngoto, chila mhilimo nendile akaliha kodi kwa seuta ywa Izulaeli ngoto laki imwenga na mazoya yakantigwe mwe ngoto laki imwenga. 5Ahabu eze abanike, seuta ywa Moabu niyo amhituka seuta ywa Izulaeli. 6Elo, seuta Yolamu niyo akulawa komzi wa Samaliya awachisanya awagomba nkondo wose wa Izulaeli. 7Niyo atuma ulosi kwa seuta Yehoshefati ywa Yuda, amgamba “Seuta ywa Moabu kanihituka, Togola wadaha kunambiza chitowane naye?”

Yohoshefati niyo amhitula “Heye miye na weye ni chintu chimwenga, awantu wangu ni saviya awako, naho falasi zangu ni saviya zako.” 8Niyo amuza, “Nachiwebunge chikalaila ntendele ihi?” Yolamu niyo amhitula, “Nachiwebunge chikalaila kwedijangwa dya Edomu.”

9Elo, seuta ywa Izulaeli niyo aita hamwenga na seuta ywa Yuda na seuta ywa Edomu. Wajenda lujendo lwa mazuwa mtandatu, niyo wasilwa ni mazi. Nendile hahana mazi mwa awagomba nkondo hegu uludimo lwawo. 10Aho, seuta ywa Izulaeli niyo agamba “Nkondo yetu! Zumbe kachilunja suwe maseuta watatu chani achijele mwe imikono ya Wamoabu.”

11Mna seuta Yehoshefati niyo auza, “Hano hahana muwoni ywa Zumbe Chohile chikudaha kumuza ulangilizi wa Zumbe Chohile?”

Mndima yumwenga ywa seuta Yolamu ywa Izulaeli niyo ahitula, “Hano eyaho Elisha mwanawe dya Shafati. Uyo nendile ni mndima ywa Eliya.”

12Yehoshefati agamba uyo ni mndima ywa Chohile chindedi. Maseuta wose watatu niyo wambasa Elisha.

13Elisha niyo amuza seuta ywa Izulaeli, Waunga chibwani kwangu? Wabase awaoni wabasagwa ni iso na nyokwe. Mna seuta ywa Izulaeli niyo amhitula, “Bule! Zumbe Chohile nuyo achiduganye chose watatu chani achijele mwe imikono ya Wamoabu.”

14Elisha niyo amgamba “Nelisa kwa zina dya Zumbe Chohile, hegu nendile suyo mbuyayo Yehoshefati seuta ywa Yuda hutunya, hegu sivyo sakutolotoze hata hadodo. 15Mna haluse nigaila mtowa limba.”

Eze atowe idilimba niyo nguvu za Zumbe Chohile zamwingila Elisha, 16agamba, “Zumbe Chohile agamba vino, ‘Fukani mabome yameme mwe idikolongo dyose. 17Hata hegu hamuwone nkung'unto hegu fula, kolongo idyo nadimeme mazi, namywe nyuwe no uludimo lwenyu.’” 18“Mna ino siyo mbuli ndala kwa Zumbe Chohile, nawenkeni uhuda mwa Wamoabu. 19Namhude chila mzi uzengelwe ngome na chila mzi mtana, naho chila mti wedi ukanteni, soko za mazi zisiteni, chila hantu hedi habalangwe kwa kumemezwa mayuwe.”

20Mtondo wakwe chipindi cha kuvika, wakaule mazi yajuluzika kulawa ntendele ya Edomu yamema chila hantu mwe idikolongo.

21Wamoabu niyo weva kugamba maseuta awo watatu weza kuwebunga, wantu wose wakudaha kujeseza viziha kukongela wabwanga kubula wadalahale niyo wachimala ko mhaka wemalanya kwa nkondo. 22Weze wenuke mtondo wakwe zuwa nendile dikamweka mlanga mwa amazi, Wamoabu wendile ntendele ya kaidi weze wakaule amazi yenkundu saviya sakame. 23Niyo wagamba “Ino ni sakame! Unatankani maseuta awo watatu watowana wowo wenye niyo wakomana! Chiteni chikatahe ivintu wasize!”

24Mna weze wabule kwe nkambi ya Izulaeli, wantu wa Izulaeli niyo wawebunga, Wamoabu niyo wasumka. Wantu wa Izulaeli wawatimila mnyuma kuno wakawakoma kubula Moabu. 25Watula imizi yawo. Chila hantu wajinkile he nkonde yedi, chila mntu kaiduila yuwe niyo inkonde yose yamema mayuwe, iviya wasita izisoko zose za amazi niyo wakanta imiti yose iyedi, vibule gati niyo wasigaila umzi umkulu wa Kilihelesi uwodu, mna wadula nkumbayuwe niyo wautandama na kuutaha.

26Mna seuta ywa Moabu eze awone nkondo yamwegamila niyo aguha wantu wakwe magana mtandatu wakugomba nkondo kwa kuchela mabamba, akafanyanya ajise wankondo wakwe hagati ha seuta ywa Edomu, mna niyo adunduga. 27Niyo amguha mwelekwa ywakwe ywa nkongo, uyo nakongigwa atende seuta hantu hakwe, niyo amlavya jeleko dya kubalangwa mlanga mwe ichiwambaza cho mzi. Waizulaeli weze wawone ivyo, niyo wemukwa ni maya. Wauleka umzi wauya kwe isi yawo.