Maseuta 2

Eliya enulwa aita kwembingu

1Elo, chipindi cha Zumbe Chohile chize chibule cha kumguha Eliya kumwigala kwembingu mwe luzimu, Eliya na Elisha nendile wemwe sila walawa Giligali. 2Wakatenda wemwe sila, Eliya niyo amgamba Elisha, “Hampu ikala hano. Zumbe Chohile kanisigila nite Beteli.” Mna Elisha niyo amgamba, “Nelisa kwa zina dya Zumbe mta ujima naho nelisa kwa zina dyako, sahwase. Ivyo niyo waitanya kubula Beteli.”

3Buna dya waoni wa Beteli niyo wambasa Elisha wamuza, “Togola kuvimanya kugamba dyelo Zumbe namguhe sekulu ywako?”

Elisha niyo ahitula, “Heye sivimanya imbuli iyo ilekeni.”

4Eliya niyo amgamba Elisha, “Hampu ikala hano, Zumbe kanisigila nite Yeliko.”

Mna Elisha niyo alemela amgamba, “Nelisa kwa zina dya Zumbe mta ujima naho nelisa kwa zina dyako, sahwase.” Ivyo niyo waitanya Yeliko.

5Bunga dya waoni wa Yeliko niyo wambasa Elisha wamuza, “Togola kuvimanya kugamba dyelo Zumbe namuse sekulu ywako?”

Elisha niyo ahitula, “Heye sivimanya imbuli iyo ilekeni.”

6Eliya niyo amgamba Elisha, “Hampu ikala hano, Zumbe kanigamba nite komto wa Yolodani.”

Mna Elisha niyo amgamba, “Nelisa kwa zina dya Zumbe mta ujima naho nelisa kwa zina dyako, sahwase.” Elo niyo waitanya. 7Waoni milongo mishano niyo wawatimila kubula ko mto wa Yolodani. Eliya na Elisha niyo wachimala hajihi no umto wa Yolodani, waoni awo nawachimala hale hadodo. 8Eliya niyo ahambula idijuba dyakwe adikunja atowa mwa amazi yapangana haidi niyo wadelukila ntendele ya kaidi hantu hainyaile. 9Weze wadeluke Eliya niyo amgamba Elisha, “Nigambila imbuli ukunga hutendele sinati kuswa kulongozi kwako.

Elisha niyo amgamba, Nakulombeza uninke udahi nkanana mbili chani nilisi viya ukudamanya.”

10Eliya niyo amhitula, “Lombezo dyako dibuka udala. Mna hegu unaniwona hauswa hako navitende saivyo ukunga. Mna hegu hunaniwone, havitende saivyo ukunga.”

11Umo wakajenda na kutamwila, chipumpa niyo kwalaila lingisha dya moto ukubuluzwa ni falasi niyo wawasenta. Eliya niyo enulwa kwe mbingu mwe luzimu. 12Elisha eze awone lailo idyo, niyo aila, “Ho tate, ho tate! Mkankalu ywa Izulaeli ahalawa, Elo, Elisha hamuwone naho Eliya. Elisha niyo azitoza izisuche zakwe niyo azitatula malepe maidi. 13Akaheza niyo adondola idijuba dya Eliya dilagale, auya na kuchimala mo lujevu lo mto wa Yolodani.” 14Niyo atowa amazi ne isuche ya Eliya akagamba, “Ekuhi Zumbe Chohile, Chohile ywa Eliya?” Eze ayatowe amazi niyo yapangana ntendele mbili, adeluka abula ntendele ya kaidi. 15Diya idibunga dya awaoni kulawa Yeliko weze wamwone, niyo wagamba, “Muye wa Eliya wimndani mwa Elisha.” Ivyo, niyo waita wakumsingila wenama kulongozi kwakwe kubula hasi. 16Wamgamba, “Suwe wandima wako china wakankalu milongo mishano, hampu waleke waite wakamlonde sekulu ywako. Hegu Muye wa Zumbe Chohile umwinula na kumdula kulanga kwe lugulu lusiku hegu kolongo.” Elisha niyo awahitula, “Bule msekuwasigila.” 17Mna awakankalu awo niyo walahiliza kubula awona chinanka, niyo awagamba, “Wasigileni.” Ivyo, niyo wasigila wantu milongo mishano waita wakumlonda chila hantu kwa mazuwa matatu mna hawamwone. 18Wakaheza niyo wauya kwa Elisha nendile akekala uko Yeliko. Elisha niyo awauza, “Togolani siwagambileni msekwita?”

Mpituko za Elisha

19Nyumani wantu wa Yeliko wambasa Elisha, wamgamba, “Sekulu, saviya ukuwona umzi uno ni mtana, mna mazi chinanayo yaiha naho yahosa usoka ubanike.” 20Elisha niyo awagamba, “Jelani munyu mwe bakuli mpya mnigaile.” Awo niyo wamwigaila. 21Elisha niyo aita kwe soko ya amazi, adula udya umunyu mndani mwa amazi, agamba, “Zumbe Chohile agamba vino, mazi yano siyatenda yawagile, kukongela haluse hayahose file hegu kubalanga usoka.” 22Mazi ayo yawagila kubula vino dyelo, saviya alongile Elisha. 23Elisha kakulawa Yeliko, aita Beteli. Umo achei mwesila, wabwanga wasiku walawa komzi wakonga kumzoma wamgamba, “Uyoo ana luhala, ana luhala komtwi!” 24Elisha niyo ahituka awasinya na kuwaligita kwa zina dya Zumbe Chohile. Makala maidi mavyele yakwitangwa madubu niyo yalawa kumbago, yalabatula wabwanga milongo mine na waidi mgati mwawo. 25Elo, Elisha niyo ajendeleza ne intambo yakwe kubula kolugulu lwa Kalimeli, eze alawe uko niyo auya komzi wa Samaliya.