Maseuta 10

Welekwa wa Ahabu wakomwa

1Komzi wa Samaliya kwendaga na welekwa wa chilume milongo mfungate wa Ahabu. Yehu niyo awandika baluwa nakuzigala kwa masekulu na kwa vilongozi womzi na kwawamizi wa awana wa Ahabu. Baluwa iyo iwandikwa vino. 2“Kwaviya mgati mwenyu mna wana wa seuta, iviya mna falasi na malingisha na viziha na mizi izengelwe ngome. Ivyo aho nahokele ibaluwa ino, 3msagule na kumwika mta udahi utendese mgati mwa awana wa seuta atende seuta, mkaheza gombani nkondo kwa chausa cha ulukolo lwe ikaya ya seuta.” 4Vilongozi wa Samaliya wogohaga vitendese na kugamba, “Nachidahe vivihi kumtowa Yehu kuno seuta Yolamu na seuta Ahaziya wamdunduga?” 5Ivyo sekulu mkulu ywe inyumba ya seuta na sekulu mkulu ywo umzi, wakambizana na vilongozi watuhu na wamizi, niyo wamwigaila Yehu ulosi uno, “Suwe chiwandima wako, naho chemalanya kudanya dyodyose ukulonga. Mna hachike mntu yoyose atende seuta. Damanya viya ukuwona vyawagila.” 6Yehu niyo awawandikila baluwa ntuhu awagamba, “Hegu chindedi mwemalanya kale kudamanya malagizo yangu, nigailani imitwi ya awana wa sekulu ywenyu hano ho umzi wa Yezieli, luvi sazino niiwone.” Wana awo milongo mfungate wa Ahabu wendaga wakekala kwa vilongozi wa Samaliya awo wendaga wakawatunduliya. 7Ivyo, ibaluwa ya Yehu ize iwabwile niyo wawakoma awo awana wose milongo mfungate wa seuta, mitwi yawo niyo waijela mwe ntangulu wamwigaila Yehu uko Yezieli. 8Mlosi yumwenga niyo ambasa seuta Yehu amgamba, “Imitwi ya awana wa seuta Ahabu iletwa kale.” Seuta niyo alagiza, “Ikeni hasi kwe inchili yo umzi mafungu maidi, mkaheza ilekeni isigaile uko kubula luvi mtondo.” 9Mtondo wakwe niyo afosa achimala na kuwagamba wantu wose, “Nyuwe mwatimila chiya mkugambilwa, miye sidya njama na kumkoma sekulu ywangu Yolamu. Mna ni yuhi awakomile wano wose? 10Manyani kugamba milosi yose alongile Zumbe Chohile kuwalanga awantu we ikaya ya Ahabu ichinta. Zumbe Chohile kadamanya yadya alongile kujinkila mndima ywakwe Eliya.” 11Yehu niyo akoma welekwa watuhu wasigale we inyumba ya Ahabu nawakekala Yezieli, hamwenga na masekulu wakwe na wambuyaze na walavyantambiko wakwe, hasigaze mntu yoyose.

Walukolo wa seuta Ahaziya wakomwa

12Yehu niyo akulawa Yezieli ahinga Samaliya. Umo achei emwesila hantu hakwitangwa, “Nkambi ya wadimi,” 13adugana na wantu we ikaya ya mta ukwaga Ahaziya seuta ywa Yuda, niyo awauza, “Nyuwe ni nyuwe wahi?” Wamhitula, “Suwe chiwantu we ikaya ya Ahaziya. Chisela kuno chiwahani awana wa seuta na awana wa Yezebeli mkaza seuta Ahabu.” 14Vikaheza, Yehu niyo awalagiza awantu wakwe agamba, “Wagwileni wachei wajima.” Niyo wawagwila wantu milongo mine na waidi, wawakomela hajihi ne idisima dye “Nkambi ya Wadimi.” Hahasigale hata mntu yumwenga.

Walukolo wose wasigale wa Ahabu wakomwa

15Yehu niyo afosa vituhu mwesila adugana na Yehonadabu mwana ywa Lekabu, Yehu niyo amlamsa, akaheza amgamba, “Weye una fanyanyi zikuligana na izangu? Togola nolungane na miye unambize?” Yehonadabu niyo amhitu, “Heye, nanelunge na weye.” Yehu niyo amgamba, “Ninka umkono wako” Niyo watozana imikono, Yehu niyo amkweza mwe idilingisha dyakwe. 16Yehu niyo amgamba, “Timilana na miye chani uwone ivyo ni mkanuni kwa Zumbe Chohile.” Elo, niyo watamba hamwenga mwe idilingisha dyakwe waita Samaliya. 17Weza wabule Samaliya, Yehu niyo awakoma awalukolo wose wa Ahabu hasigaze hata yumwenga. Niyo vyatenda saviya Zumbe Chohile amgambile Eliya ivyo navitende.

Wantu wakuvikila Milungu yo udanti wakomwa

18Yehu niyo awachisanya awantu wa Samaliya awagamba, “Seuta Ahabu amsankanilaga mnungu Baali hadodo du, mna miye nanimsankanile vitendese. 19Haluse wetangeni, wadya wose wakumvikila mnungu Baali na walavyantambiko wakwe. Vyaungwa chila yumwenga abule, kwaviya naunga nimvikile Baali mviko mkulu, yoyose naswese kubula nakomwe.” Iyo yendaga njama ya Yehu chani awakome wadya wose wakumvikila mnungu Baali. 20Yehu niyo alagiza, “Itangani mdugano mkulu wa kumvikila mnungu Baali!” Lugong'ondo niyo lwatoigwa, 21Yehu niyo atuma ulosi mweisi yose ya Izulaeli chani wantu wose wakumvikila mnungu Baali chila yumwenga abule. Niyo wose weza na kumema mwenyumba yo kumvikila mnungu Baali kulawa mpembe imwenga kubula ntuhu. 22Aho, Yehu niyo amlagiza yudya mlavyantambiko achimaile izisuche zisentigwe akamgamba, “Lavya izo izisuche uwenke awantu wezile ho mviko wo kumvikila mnungu Baali.” Uyo mchimaila niyo alavya izo izisuche na kuwenka. 23Akaheza Yehu niyo engila mwe inyumba yo kumvikila mnungu Baali akatenda kalongozana na Yehonadabu, kuwagamba wadya wendile umo mwenyumba yo kuvikila, “Manyani kugamba wantu we mndani mwenyumba yo kuvikila ni wadya du wakumvikila mnungu Baali, na kugamba hamna mntu yoyose akumvila Zumbe Chohile.” 24Akaheza niyo wengila hamwenga wamlavize malavyo na ntambiko za kutikimya mnungu Baali. Yehu nendile kaika wantu milongo mnane kuse kweinyumba yokuvikila na kuwenka amalagizo yano, “Wakomeni wano awantu wose. Yoyose namleke hata yumwenga asumke naakomwe!” 25Ahadya Yehu eze abinde ukulavya ntambiko zo kutikimya, niyo awagamba awamizi na masekulu, “Ingilani mkawakome wose. Msekumleka hata yumwenga asumke!” Niyo wengila na mabamba yawo wawakoma wose, wakaheza niyo walavya ivimba vyawo kuse. Wakaheza niyo wengila kwechumba cho kuvikila, 26na kuilavya kuse inguzo ikuvikilwa na kuitikimya moto. 27Niyo wabalanga inguzo hamwenga ne inyumba yo kuvikila, nyumba iyo waihitula itenda choo, ivyo nivyo vili kubula vino dyelo. 28Ivyo nivyo Yehu alekeze miviko ya kumvikila mnungu Baali mweisi ya Izulaeli. 29Mna Yehu halekile kukola masa sayadya adamanyaga Yeloboamu mwana ywa Nebati ya kuwalongoza Waizulaeli wakole masa. Aikaga matukulu ya ndama ya zahabu uko Beteli na Dani. 30Zumbe Chohile niyo amgamba Yehu, “Welekwa wa Ahabu kuwadamanyiza yadya yose nungile uwadamanyize. Ivyo sikwelisiza kugamba welekwa wako kubula cheleko cha kane nawalongoze Izulaeli.” 31Mna Yehu hatimile amalagizo ya Zumbe Chohile, Chohile ywa Izulaeli kwa moyo wakwe wose. Kakola masa sayadya akoile Yeloboamu awahosize wantu wa Izulaeli wakole masa.

File ya Yehu

32Mwe ichipindi icho Zumbe Chohile akongaga kuhunguza ahantu he isi ya Izulaeli. Seuta Hazaeli ywa Alamu niyo aihuda ntendele nkulu ye isi ya Izulaeli, 33kulawa ntendele yo ulailo wa zuwa yo umto wa Yolodani ne izisi za Giliyadi na Gadi na Lubeni na Manase na kulawa komzi wa Aloeli na kwe izisi za Giliyadi na Bashani. 34Ntendwa ntuhu zose adamanye Yehu na ntendwa zakwe za ukankalu ziwandikwa mwe chitabu cho Lukumbusa cha Amaseuta wa Izulaeli. 35Niyo abanika na kuhambwa Samaliya. Mwanawe Yehoahazi niyo alongoza ise eze abanike. 36Yehu kalongoza Izulaeli ekekala Samaliya kwa mihilimo milongo midi na mnane.