Maseuta 11

Malikiya Ataliya alongoza isi ya Yuda

1Ahadya Ataliya nine dya seuta Ahaziya eze awone mwanawe kakomwa, niyo alagiza awantu wose we ikaya ye ichiseuta wakomwe. 2Mna Yehosheba mchiche ywa seuta Yeholamu, lumbudye dya Ahaziya amguhaga chinyele Yoashi mwana ywa Ahaziya yumwenga dya awana wa seuta nendile wakaungwa wakomwe. Amfisaga hamwenga na mlezi ywakwe mwechumba cho kugona. Wamfisa chani Ataliya anase kumuwona na kumkoma. 3Yoashi ekalaga naye kwa mihilimo mtandatu akatenda kamfisa mndani mwe Idihekalu dya Zumbe Chohile, umo Ataliya achei kulongoza mweisi. 4Mna mo mhilimo wa mfungate Yehoyada mlavyantambiko niyo asigila ulosi na kuwachisanya wamizi wahajihi wa masekulu, kalagiza wambase kwe Idihekalu dya Zumbe Chohile, niyo adamanya nawo wivano na kuwawapiza umo mwe Idihekalu dya Zumbe Chohile. Akaheza niyo awalagisa Yoashi mwana ywa seuta Ahaziya. 5Akaheza niyo alagiza, “Umo namwizile kutoza uluzo lwenyu lwe Idizuwa dyo Kuhumula, wantu mabunga matatu mgati mwe mane nawamile idizumba dye ichiseuta, 6wantu mabunga matatu mgati mwe mane watuhu nawamile inchili ya Suli na wantu mabunga matatu mgati mwe mane watuhu nawatende kwenchili kunyuma kwa awamizi. Ivyo nivyo namwamile idizumba dye ichiseuta chani disekutulwa. 7Yadya amabunga amaidi yakubinda uluzo lwawo mwe idizuwa dyo Kuhumula nawatoze luzo mwe inyumba ya Zumbe Chohile wamwamile seuta. 8Ikalani na seuta hohose natendeke, mumzunguluke chila mntu na chiziha chakwe mo mkono, mntu yoyose najeze kuwasogeilani mkomeni.” 9Masekulu wa awamizi watimila amalagizo yose yalagizwe ni mlavyantambiko Yehoyada. Chila sekulu niyo aguha awantu wakwe wose, wadya wendile wakabinda uluzo lwawo na wadya nawakengila kutoza uluzo lwawo Idizuwa dyo Kuhumula, elo niyo wambasa mlavyantambiko Yehoyada. 10Mlavyantambiko niyo awenka awo amasekulu maguha na nchinga vyendaga vya seuta Daudi, izo zendaga zikwa mwe Idihekalu dya Zumbe Chohile, 11wamizi awo wendaga wachilmala kukongela ntendele ya kwamwemzi kubula ntendele ya chenya ye inyumba na kuzunguluka imazabahuyo kulaviza ntambiko ne inyumba chani wamzunguluke seuta, chila mntu katoza idiguha dyakwe mo mkono. 12Akaheza niyo amlavya kuse Yoashi mwana ywa seuta, amvika chilemba komtwi na kumwinka useuta, wamhaka mavuta na kumtenda seuta, watowa magasa wagamba, “Seuta ekale mazuwa yalozize!” 13Ataliya eze eve amaizwi ya awamizi hamwenga na wantu watuhu, niyo awabasa wadya awantu wendile wechisanya kwe Idihekalu dya Zumbe Chohile. 14Eze asungile niyo amwona seuta mhya kachimala haguhi ne inguzo kwe inchili ye Idihekalu dya Zumbe Chohile, saviya vyendile mazwela, kuno masekulu na watowa magunda wakatenda haguhi na seuta, wantu wose nendile wakasendemka na kutowa magunda, aho niyo atatula izisuche zakwe alonga kwa izwi kulu, “Uno nubanasi! Uno nubanasi!” 15Akaheza mlavyantambiko Yehoyada kwaviya haungile Ataliya akomelwe mwe Idihekalu dya Zumbe Chohile, niyo awalagiza masekulu wa awagomba nkondo awagamba, “Mlavyeni kuse Ataliya hagatigati ha awagomba nkondo, chila mntu akunga amtimile mkomeni.” 16Elo, niyo wamgwila, wamgwiza kwe inchili ye izifalasi kuhinga kweinyumba ye ichiseuta, niyo wamkomela uko.

Yehoyada ahitukila

2Mihilimo 23:16-21

17Vikaheza Yehoyada niyo adamanya lagano na Zumbe Chohile na seuta na wantu kugamba nawatende wantu wa Zumbe Chohile, iviya niyo adamanya lagano mgati mwa seuta na awantu. 18Vikaheza wantu wose wa Izulaeli wendile aho, niyo waita kwe inyumba yo kumvikila Baali waibogozola, watula imazabahuyo kulaviza ntambiko na amatukulu yakwe, wamkoma Matani mlavyantambiko ywa Baali kulongozi kweimazabahuyokulaviza ntambiko. Mlavyantambiko Yehoyada niyo aika wamizi chani wamile inyumba ya Zumbe Chohile. 19Vikaheza niyo awaguha masekulu wa wagomba nkondo, Wamizi wa hajihi wa seuta na awekazi wose, wamsindikiza seuta kulawa kwenyumba ya Zumbe Chohile wajinkila kweinchili ya awamizi kubula kwe imba yechiseuta. Seuta niyo ekala mwe ichigoda cho useuta kulagisa kugamba nuyo seunta mhya. 20Ivyo, awekazi wose niyo wamema mbwedo Ataliya eze akomwe umo mwe idizumba dye ichiseuta, umzi wose niyo watondowala. 21Yoashi akongaga kulongoza mweisi ya Yuda akatenda na mihilimo mfungate.