Maseuta 12

Seuta Yoashi ywa Yuda

2Mihilimo 24:1-16

1Mo mhilimo wa mfungate wo uolongozi wa seuta Yehu ywa Izulaeli Yoashi akongaga kulongoza Yuda, uyo kalongoza kwa mihilimo milongo mine uko Yelusalemu. Nine endaga aketangwa Sibiya kulawa komzi wa Biasheba. 2Mo wikazi wakwe wose kadamanya mbuli zedi zimuwagile Zumbe Chohile, kwaviya mlavyantambiko Yehoyada nendile akamhinya. 3Hata ivyo, ahantu henukile ho kuvikila milungu hahabalange, wantu nawakajendeleza kuvika na kuvunkiza ubani uko. 4Yoashi niyo awetanga walavyantambiko awalagiza kugamba, “Hela zose zikwigalwa mweinyumba ya Zumbe Chohile hegu ilawana na vintu vikukile vitagigwe, hela ya chila mntu saviya awandikilwe na hela mntu akulavya kwa kunga mwenye mweinyumba ya Zumbe Chohile, 5walavyantambiko wazihokele kulawa kwa chila mntu, awo wadidamanye uhya Idihekalu dya Zumbe Chohile hantu hohose hakunga kudamanywa uhya.” 6Mna hata mihilimo milongo midi na mitatu yo ulongozi wa seuta Yoashi walavyantambiko nendile hawadamanye uhya wowose mweinyumba ya Zumbe Chohile. 7Ivyo, seuta Yoashi niyo amwitanga mlavyantambiko Yehoyada na walavyantambiko watuhu awauza, “Ni mbwani hamkuidamanya uhya Idihekalu dya Zumbe Chohile? Elo, msekuguha hela kulawa kwa awantu mkulongoza, mna nigailani chani Idihekalu didamanywe uhya.” 8Walavyantambiko niyo wazumila kugamba hawahokele hela vituhu kulawa kwa wantu, iviya niyo welisa kugamba hawaidamanye uhya Idihekalu dya Zumbe Chohile. 9Yehoyada niyo aguha shanduku aponkola langa mweingubiko yakwe, akaheza adika kwe imazabahu yo kulaviza ntambiko ntendele ya kulume uneva mntu akengila mwe Idihekaluu dya Zumbe Chohile. Awo walavyantambiko wendile mo uluzo kwe inchili waika izihela zose zigalwe mwe Idihekalu dya Zumbe Chohile. 10Chila wakawona kugamba mwe idishanduku mna hela zilozize, yudya akuwandika izimbuli za seuta na mlavyantambiko mkulu nawengila na kuziwaza wakaheza wazinyinya mwe bahasha izihela zose zichisanywe mwe Idihekalu dya Zumbe Chohile. 11Weze waheze kuziwaza niyo wawenka awandima wachimaile Idihekalu dya Zumbe Chohile, awo niyo wawaliha mafundi wa kusongola na wazesi awo wazengile uhya Idihekalu dya Zumbe Chohile, 12iviya wazesi na watula mayuwe, wajeseza kugula mbawo na mayuwe yatuligwe chani wazenge uhya Idihekalu dya Zumbe Chohile na kuchintiza ivintu vyose navikaungwa mo kuzenga uhya Idihekalu dya Zumbe Chohile. 13Hela zigalwe kwenyumba yo kuvikila hazijesezwe kulihila kudamanywa mabilika ya mayuwe ya chumbu na mikasi ya kukantila ntambi za mishumaa na mabakuli na magunda hegu viya vituhu vyovyose vya zahabu hegu viya vya chumbu. 14Zose zijesezwa kuwaliha awandima wazijeseze kudamanya uhya Idihekalu dya Zumbe Chohile. 15Awandima wachimaile indima ino wendaga wakanuni vitendese, ivyo hawaungigwe walonge ivyo wazijeseze izihela izo. 16Hela zilavigwe kutenda malavyo ya mlema na malavyo ya kusa masa hazingizwe mweinyumba ya Zumbe Chohile, izo zendaga hela za walavyantambiko. 17Chipindi icho Hazaeli seuta ywa Alamu awebungaga umzi wa Gati niyo autaha. Mna Hazaeli eze ahinge komzi wa Yelusalemu chani akawebunge, 18elo, seuta Yoashi ywa Yuda aguhaga amalavyo yose yakukizwe ni wababa zakwe maseuta wa Yuda, Yehoshefati na Yeholamu na Ahaziya nakongezeza na ziya izakwe, hamwenga ne izahabu yose yendile mwe ihazina ye Idihekalu dya Zumbe Chohile na kwe inyumba ye ichiseuta azigala kwa seuta Hazaeli ywa Alamu. Hazaeli niyo akulawa Yelusalemu. 19Mbuli ntuhu zose adamanye seuta Yoashi ziwandikwa mwechitabu cha Mbuli za Mihilimo za amaseuta wa Yuda. 20Masekulu wa awagomba nkondo wa Yoashi niyo wamdila njama, wamkomela mweinyumba ya Milo kweisila ikuhinga kweseleza ya Sila. 21Wamkomile ni Yozakali mwana ywa Shimeati na Yehozabadi mwana ywa Shomeli wandima wakwe. Yoashi kahambwa kwe izimbila ze ichiseuta za wababa zakwe komzi wa Daudi. Amaziya mwana ywa Yoashi niyo atenda seuta ywa Yuda.