Maseuta 13

Seuta Yehoazi ywa Izulaeli

1Mo mhilimo wa milongo midi na mitatu yo ulongozi wa seuta Yoashi ywa Yuda, Yehoahazi mwana ywa Yehu akongaga kulongoza Izulaeli, kajendeleza kulongoza uko Samaliya kwa mihilimo mlongo umwenga na mfungate. 2Akolaga masa kulongozi kwa Zumbe Chohile saviya seuta Yeloboamu mwana ywa Nebeti awahosizize awantu wa Izulaeli wakole masa. Yehoazi halekile kudamanya ntendwa zakwe zihiye. 3Ivyo, Zumbe Chohile niyo awafila maya awantu wa Izulaeli, chila nkanana kawatenda wahundwe kwenkondo ni seuta Hazaeli ywa Alamu na mwanawe Beni Hadadi. 4Yehoazi niyo amlombeza Zumbe Chohile, Zumbe Chohile eze awone ivyo seuta ywa Alamu awabunyanye awantu wa Izulaeli niyo eva amalombezo yakwe. 5Zumbe Chohile niyo awenka chilongozi awantu wa Izulaeli uyo awakombole kulawa kwa Waalamu, elo niyo wekala kwa utondowazi saviya wekala aho nkongo. 6Hata ivyo hawalekile kudamanya mbuli za masa izo seuta Yeloboamu awahosize awantu wa Izulaeli, wajendeleza kudamanya mbuli zawo za ukola masa ne iditukulu dya mnungu ywa chivyele Ashela dikigwa uko Samaliya. 7Yehoazi nendile hana wagomba nkondo walozize, mna endaga na wakwela falasi milongo mishano na wagomba nkondo wakujenda lwaviga elufu mlongo umwenga, kwaviya seuta ywa Alamu awakomaga awagomba nkondo wa Izulaeli na kuwasiliginta hasi ni wamema sanga nkundu. 8Mbuli ntuhu zose adamanye Yehoazi na ukankalu wakwe yawandikwa mwechitabu cha Mbuli za Lukumbusa cha amaseuta wa Izulaeli. 9Yehoazi abanikaga na kuhambwa uko Samaliya, mwanawe akwitangwa Yehoashi niyo atenda seuta.

Yehoashi seuta ywa Izulaeli

10Mo mhilimo wa milongo mitatu na mfungate yo ulongozi wa seuta Yoashi ywa Yuda, Yehoashi mwana ywa Yehoazi akongaga kulongoza Izulaeli, kalongoza Samaliya na ulongozi wakwe wikala kwa mihilimo mlongo umwenga na mtandatu. 11Yehoashi adamanyaga mbuli za masa kwa Zumbe Chohile, katimila mbuli saziya adamanye seuta Yeloboamu mwana ywa Nebati awahosize awantu wa Izulaeli wakole masa. 12Mbuli ntuhu zose za Yehoashi na ukankalu wakwe, nkondo agombile na seuta Amaziya ywa Yuda viwandikwa mweichitabu cha Mbuli za Lukumbusa cha amaseuta wa Izulaeli. 13Yehoashi abanikaga na kuhambwa kwezimbila wahambigwe maseuta watuhu uko Samaliya, Yeloboamu ywa kaidi niyo atenda seuta.

File ya Elisha

14Muoni Elisha ahumaga unyonje wihise. Umo ehaguhi na kubanika, seuta Yehoashi ywa Izulaeli niyo amtalamkila. Eze ambwile Elisha niyo aila agamba, “Hoo tate, hoo tate! Mkankalu ywa Izulaeli!” 15Elisha niyo amgamba, “Hake nigaila uta na mifulo!” Yehoashi niyo amwigaila. 16Elisha niyo amgamba emalanye chani alase. Seuta niyo emalanya Elisha niyo aika imikono yakwe mlanga mwe imikono ya seuta. 17Seuta katimila amalagizo ya muwoni niyo avugula ididilisha dikusinya ntendele ya Alamu. Elisha niyo amlagiza, “Kunta mfulo!” Ahadya seuta eze akunte umfulo, muwoni niyo agamba, “Weye nuwo umfulo wa Zumbe Chohile, kwa uwo nopate uhuda mwa awagomba nkondo wa Alamu. Nogombe nkondo na Waalamu uko komzi wa Afeka kubula uwahude.” 18Akaheza Elisha niyo amgamba seuta aguhe imifulo imituhu aitowe hasi. Seuta niyo atowa mifulo hasi nkanana ntatu, akaheza niyo aleka. 19Elisha niyo ehiwa vitendese, amgamba seuta, “Ni mbwani hutoile nkanana shano hegu mtantatu? Ivyo nakuwakoma pele awagomba nkondo wa Alamu. Mna haluse nowahude nkanana ntatu du.” 20Elisha niyo abanika na kuhambwa. Chila mhilimo mabunga ya wantu kulawa Moabu yeza kuyebunga isi ya awantu wa Izulaeli. 21Zuwa dimwenga Waizulaeli nendile wakahamba mntu kwezimbila, wantu awo wakuhamba niyo wawona bunga dya wadya wakwizaga kuwebunga, wadya wenule ichimba niyo wachidula mwe imbila ya Elisha wasumka. Ahadya ichimba icho chize chikufye amafuha ya Elisha, niyo auyuka na kuchimala.

Nkondo ya Waizulaeli na Waalamu

22Seuta Hazaeli ywa Alamu nendile akawazila vitendese wantu wa Izulaeli chipindi chose cho ulongozi wa Yehoazi, 23mna Zumbe Chohile kawalekeila amasa yawo na kuwafila mbazi. Kawasinya kwa wedi kwachausa cha lagano dyakwe na Bulahimu, Isaka na Yakobo. Hawakomile naho hawajaile kubula vino dyelo. 24Hazaeli seuta ywa Alamu eze abanike, mwanawe akwitangwa Beni Hadadi niyo atenda seuta hantu haise. 25Seuta Yehoashi kamhuda Beni Hadadi nkanana ntatu vyaleka aikombola imizi yose yendile itahwa mwe ichipindi cho ulongozi wa Yehoazi ise dya Yehoashi.