Maseuta 14

Amaziya seuta ywa Yuda

1Mo mhilomo wa kaidi wo ulongozi wa Yehoashi mwana ywa Yehoahazi uko Izulaeli, Amaziya mwana ywa Yoashi seuta ywa Yuda akongaga kulongoza. 2Umo akakonga kulongoza endaga na mihilimo milongo midi na mishano, alongozaga uko Yelusalemu kwa mihilimo milongo midi na chenda. Nine endaga aketangwa Yehoadani kulawa Yelusalemu. 3Adamanyaga mbuli zikumuwagila Zumbe Chohile, mna hendaga saviya babakwe Daudi. Adamanyaga mbuli zose saviya ise Yoashi adamanye. 4Uyo habalange ahantu hokuvikila milungu uko kwamagulu, wantu wajendeleza kuvika na kuvunkiza ubani uko. 5Ahadya Amaziya eze edindimaze mo ulongozi, niyo awakoma wadya awandima wamkomile seuta Yoashi, kugamba ise. 6Mna wana wa wadya awakomi wamkomile ise hawakomile, kwaviya viwandikwa mweichitabu che Isigilizi ya Musa, Chohile agamba, “Welesi hawakomwe kwa chausa cha masa yadamanywe ni wana wawo, hegu wana hawakomwe kwachausa cha masa yadamanywe ni welesi wawo, mna chila mntu nakomwe kwachausa cha masa adamanye mwenye.” 7Amaziya kakoma wagomba nkondo wa Waedomu wakubula elufu mlongo umwenga Kwedibwandasi dyo Umunyu, niyo autaha umzi wa Sela niyo awitanga Yokiteli, ivyo nivyo ukwitangwa kubula vino dyelo. 8Vikaheza Amaziya niyo egala walosi kwa Yehoashi mwana ywa Yehoahazi, mwana ywa Yehu seuta ywa Izulaeli, amgamba, “So kuno chigombe nkondo.” 9Mna Yoashi seuta ywa Izulaeli niyo amwigaila ulosi Amaziya seuta ywa Izulaeli amgamba, “Zuwa dimwenga mti wa miwa wa Lebanoni waugambaga mwelezi wa uko Lebanoni, ‘Mloze mchiche ywako kwa mwanangu.’ Mna kala dya kumbago niyo dyajinka dyaujata jata uwo umti we imiwa. 10Haluse weye Amaziya kuwahuda Waedomu, umoyo wako wakutenda weduvye. Unanavyo vyachinta, ni mbwani ukwelondela nkunto nazikukome weye mwenye hamwenga na awantu wako wa Yuda?” 11Mna Amaziya niyo ahufya ulosi uwo. Ivyo Yehoashi seuta ywa Izulaeli niyo aita na awagomba nkondo wakwe wakugomba nkondo na Amaziya uko Beti Shemeshi kweisi ya Yuda. 12Wagomba nkondo wa Yuda niyo wahudwa ni wagomba nkondo wa Izulaeli, chila yumwenga niyo auya kwekaya yakwe. 13Yehoashi seuta ywa Izulaeli niyo amtaha Amaziya seuta ywa Yuda uko Beti Shemeshi, niyo aita komzi wa Yelusalemu abogozola ichiwambaza chakwe kukongele kwenchili ya Efulaimu kubula kwempembe ya inchili, utali wakwe mita magana maidi. 14Kaguha izahabu yose ne ichumbu, iviya kaguha ne ivimpandwa vyose vyendile mwe Idihekalu dya Zumbe Chohile na idya yendile mwe ihazina ye idizumba dye chiseuta, iviya kataha wantu niyo auya Samaliya. 15Mbuli ntuhu zose adamanye Yehoashi na ukankalu wakwe, nkondo agombile na seuta Amaziya ywa Yuda viwandikwa mweichitabu cho Lukumbusa lwa amaseuta wa Izulaeli. 16Yehoashi eze abanike niyo ahambwa mwe izimbila wahambigwe amaseuta awatuhu uko Samaliya. Yeloboamu ywa kaidi niyo atenda seuta hantu hakwe.

File ya Amaziya seuta ywa Yuda

2Mihilimo 25:25-28

17Seuta Amaziya ywa Yuda ekalaga mihilimo mlongo umwenga na mishano seuta Yehoashi ywa Izulaeli eze abanike. 18Mbuli ntuhu zose adamanye Amaziya ziwandikwa mwe Ichitabu cha Mbuli za Mihilimo za Amaseuta wa Yuda. 19Njama za kumkoma Amaziya zadamanyagwa uko Yelusalemu, ivyo niyo asumkila Lakishi, mna awankondo wakwe wegala wantu niyo wakumkomela uko. 20Ichimba chakwe niyo chakwezwa mlanga mwe falasi chegalwa Yelusalemu chakuhambwa mwe izimbila wahambigwe maseuta awatuhu uko komzi wa Daudi. 21Vikaheza awantu wose wa Yuda niyo wamguha Uziya akatenda na mihilimo mlongo umwenga na mtandatu wamtenda seuta hantu haise Amaziya. 22Ize iheze ifile ya ise, Uziya niyo auzenga uhya umzi wa Elati na kuwavuziza awantu wa Yuda.

Seuta Yeloboamu ywa kaidi ywa Izulaeli

23Mo mhilimo wa mlongo umwenga na mishano wo ulongozi wa Amaziya mwana ywa Yoashi seuta ywa Yuda, Yeloboamu mwana ywa Yehoashi seuta ywa Izulaeli akongaga kulongoza uko Samaliya, kalongoza kwa mihilimo milongo mine na mhilimo umwenga. 24Kadamanya mbuli za ukola masa kwa Zumbe Chohile, katimila mbuli saziya adamanyaga seuta Yeloboamu mwana ywa Nebeti awahosize awantu wa Izulaeli wakole masa. 25Akombolaga isi yose yendile ya Izulaeli, kulawa Hamati kubula kwe Bahali ya Alaba. Ivyo nivyo alongaga Zumbe Chohile kujinkila umndima ywakwe Yona mwana ywa Amitai muwoni kulawa Gati Hefeli. 26Ivyo vilaila kwaviya Zumbe Chohile awonaga izinkunto zikulise wapatile awantu wa Izulaeli, hakwendaga na mntu yoyose ywa kuwambiza. 27Mna Zumbe Chohile nendile halongile kugamba nawabinde pele awantu wa Izulaeli, ivyo awakombolaga kujinkila kwa seuta Yeloboamu mwana ywa Yohoashi. 28Mbuli ntuhu zose adamanye Yeloboamu na nkondo agombile kwa ukankalu na viya aikombole Damesiki na Hamati itenda ya Izulaeli, vyose viwandikwa mweichitabu cho Lukumbusa lwa amaseuta wa Izulaeli. 29Yeloboamu abanikaga na kuhambwa kweizimbila wahambigwe amaseuta awatuhu wa Izulaeli, mwanawe akwitangwa Zekaliya niyo atenda seuta hantu hakwe.