Maseuta 15

Seuta Uziya ywa Yuda

2Mihilimo 26:1-23

1Mo mhilimo wa milongo midi na mfungate wo ulongozi wa Yeloboamu seuta ywa Izulaeli, Azaliya mwana ywa Uziya akongaga kulongoza akatenda seuta uko Yuda. 2Umo akakonga kulongoza endaga na mihilimo mlongo umwenga na mtandatu. Kalongoza uko Yelusalemu kwa mihilimo milongo mishano na midi. Nine naketangwa Yekoliya kulawa Yelusalemu. 3Adamanya mbuli zikumuwagila Zumbe Chohile saziya zose adamanye ise. 4Mna ahantu hokuvikila kulanga kwa amagulu hahabalangwe, wantu wajendeleza kuvika na kuvunkiza ubani uko. 5Zumbe Chohile niyo amjelaga unyonje wa matana Uziya kubula aho abanikile. Ekalaga mwe nyumba ye ichedu, ndima zose zo ulongozi nendile zikadamanywa ni mwanawe Yotamu. 6Mbuli zose ntuhu adamanye Uziya ziwandikwa mweichitabu cho Lukumbusa lwa amaseuta wa Yuda. 7Uziya eze abanike niyo ahambwa kweizimbila wahambigwe amaseuta awatuhu komzi wa Daudi, mwanawe akwitangwa Yotamu niyo atenda seuta hantu ha ise.

Seuta Zekaliya ywa Izulaeli

8Mo mhilimo wa milongo mitatu na mnane yo ulongozi wa Uziya seuta ywa Yuda, Zekaliya mwana ywa Yeloboamu akongaga kulongoza Izulaeli, kalongoza kwa myezi mtandatu iyodu akatenda ekala komzi wa Samaliya. 9Uyo naye adamanyaga yehiye saviya wadamanyaga amaseuta wamlongoile, kamleka Zumbe Chohile. Katimila mliganyo wihiye wa seuta Yeloboamu mwana ywa Nebeti awahosize awantu wa Izulaeli wakole masa. 10Shalumu mwana ywa Yabeshi niyo adya njama mwa seuta Zekaliya, kamtowa na kumkoma kulongozi kwa wantu, niyo atenda seuta hantu hakwe. 11Mbuli ntuhu zose adamanye Zekaliya ziwandikwa mweichitabu cho Lukumbusa amaseuta wa Izulaeli. 12Izimbuli izo zilaila saviya Zumbe Chohile alongaga kwa seuta Yehu akagamba, “Welekwa wako nawalongoze Izulaeli kubula cheleko cha kane.”

Seuta Shalumu ywa Izulaeli

13Mo mhilimo wa milongo mitatu na chenda yo ulongozi wa seuta Uziya ywa Yuda, Shalumu mwana ywa Yabeshi akongaga kulongoza Izulaeli, alongozaga kwa mwezi umwenga du akatenda ekala komzi wa Samaliya. 14Manahemu mwana ywa Gadi akulawaga komzi wa Tiliza aita Samaliya, uko niyo amkoma Shalumu mwana ywa Yabeshi, akaheza Manahemu niyo atenda seuta, eze amkome Shalumu. 15Mbuli ntuhu zose za Shalumu ne izinjama zakwe zose adamanye ziwandikwe mweichitabu cho Lukumbusa lwa amaseuta wa Izulaeli. 16Akatenda emwesila akalaila komzi wa Tiliza Manahemu niyo aubalanga vitendese umzi wa Tapua, kakoma awekazi wakwe hamwenga na awekazi we isi yose iuzunguluke kwaviya walemelaga kunga utondowazi mwakwe. Iviya wavyele wendile wasoka awatumbulaga wose.

Seuta Manahemu ywa Izulaeli

17Mo mhilmo wa milongo mitatu na chenda yo ulongozi wa seuta Uziya ywa Yuda, Menahemu mwana ywa Gadi akongaga kulongoza Izulaeli, kalongoza uko Samaliya kwa mihilimo mlongo umwenga. 18Mazuwa yose yo ulongozi wakwe kadamanya mbuli zimwihize Zumbe Chohile, halekile kudamanya mbuli zihiye saziya adamanye Yeloboamu mwana ywa Nebeti awahosize awantu wa Izulaeli wakole masa. 19Elo, Pulu seuta ywa Ashulu niyo ayebunga isi ya Izulaeli, Manahemu niyo amwinka chilo milongo mitatu na nne za chumbu chani amwambize kudindimaza ulongozi wakwe mweisi ya Izulaeli, 20Manahemu apataga izihela izo kwa kuwakunkusa awagoli wa Izulaeli chila yumwenga alavye nchango ya shekeli milongo mishano ya hela. Ivyo, Pulu hekale Izulaeli mna auyaga kweisi yakwe. 21Mbuli ntuhu zose adamanye Menahemu ziwandikwa mwechitabu cho Lukumbusa lwa amaseuta wa Izulaeli. 22Menahemu niyo abanika, mwanawe akwitangwa Pekahiya niyo atenda seuta ise eze abanike.

Seuta Pekahiya ywa Izulaeli

23Momhilimo wa milongo mishano yo ulongozi wa seuta Uziya ywa Yuda, Pekahiya mwana ywa Menahemu akongaga kulongoza Izulaeli, alongozaga kwa mihilimo midi akatenda ekala uko Samaliya.

24Kadamanya mbuli zilozize za ukola masa kwa Zumbe, katimila mbuli zihiye saziya zidamanywe ni seuta Yeloboamu mwana ywa Nebeti awahosize awantu wa Izulaeli wakole masa. 25Sekulu ywa awagomba nkondo wa Pekahiya akwitanga Peka mwana ywa Lemaliya, ambizanaga na wantu watuhu milongo mishano kulawa Giliyadi wamkoma Pekahiya mwe ingome ya mndani ye idizumba dye chiseuta uko Samaliya, Peka niyo atenda seuta hantu ha Pekahiya. 26Mbuli ntuhu zose adamanye Pekahiya ziwandikwa mweichitabu cho Lukumbusa lwa amaseuta wa Izulaeli.

Seuta Peka ywa Izulaeli

27Mo mhilimo wa milongo mishano na midi yo ulongozi wa seuta Uziya ywa Yuda, Peka mwana ywa Lemaiya akongaga kulongoza akatenda ekala uko Samaliya, kalongoza kwa mihilimo milongo midi. 28Iviya uyo niyo adamanya mbuli za ukola masa kwa Zumbe Chohile, katimila mbuli zihiye saziya zidamanywe ni seuta Yeloboamu mwana ywa Nebeti ahosize awantu wa Izulaeli wadamanye mbuli za ukola masa. 29Chipindi cho ulongozi wa Peka seuta ywa Izulaeli, seuta Tigilati seuta ywa Ashulu atahaga imizi ya Iyoni na Abeli Beta Maka na Yanoa na Kadeshi na Hazoli hamwenga ne isi ya Giliyadi na Galilaya na Nafutali niyo ataha awekazi we imizi iyo. 30Mo mhilimo wa milongo midi yo ulongozi wa Yotamu mwana ywa Uziya seuta ywa Yuda, Hoshea mwana ywa Ela amfungilaga njama Peka mwana ywa Lemila, kamkoma akaheza niyo alongoza hantu ha Peka. 31Mbuli ntuhu zose adamanye Peka ziwandikwa mweichitabu cho Lukumbusa lwa amaseuta wa Izulaeli.

Seuta Yotamu ywa Yuda

2Mihilimo 27:1-9

32Mo mhilimo wa kaidi wo ulongozi wa Peka mwana ywa Lemila uko Izulaeli, Yotamu mwana ywa seuta Uziya seuta ywa Yuda akongaga kulongoza uko Yuda. 33Umo akakonga kulongoza endaga na mihilimo milongo midi na mishano, kalongoza uko Yelusalumu kwa mihilimo mlongo umwenga na mtandatatu. Nine etangangwa Yelusha mchiche ywa Sadoki.

34Kadamanya mbuli zedi zimuwagile Zumbe Chohile saviya adamanyaga ise Uziya. 35Mna, ahantu hokuvikila milungu ya udanti hahabalange, wantu wajendeleza kulavya malavyo na kuvunkiza ubani ahantu aho. Yotamu niyo azenga inchili ya ntendele ya chenya ye Idihekalu dya Zumbe Chohile. 36Mbuli zose ntuhu adamanye Yotamu ziwandikwa mweichitabu cho Lukumbusa lwa amaseuta wa Yuda. 37Mo ulongozi wakwe Yotamu, Zumbe Chohile akongaga kuwatuma seuta Lesini ywa Alamu na seuta Peka ywa Izulaeli chani wakayebunge Yuda. 38Yotamu niyo abanika na kuhambwa kwe izimbila ze ichiseuta wahambigwe amaseuta watuhu uko komzi wa Daudi. Mwanawe akwitagwa Ahazi niyo atenda seuta ize eze abanike.