Maseuta 16

Seuta Ahazi ywa Yuda

1Mo mhilimo wa mlongo na mfungate wo ulongozi wa Peka mwana ywa Lemaliya seuta ywa Izulaeli, Ahaziya mwana ywa Yotamu niyo akonga kulongoza uko Yuda. 2Ahazi umo akakonga kulongoza endaga na mihilimo milongo midi. Kalongoza uko Yelusalemu kwa mihilimo mlongo umwenga na mtandatu. Hadamanye mbuli zikuwagila kwa Zumbe Chohile saviya Daudi babakwe adamanye, 3katimila lujendo lwihiye lwa amaseuta wa Izulaeli. Iviya kamlavya mwanawe ntambiko kwa kumjisa mwe moto, katimila mazwela yehiye ya wantu wa si ntuhu, awo wabalazwe ni Zumbe Chohile ywa Izulaeli umo wendaga wakengila mwe isi. 4Ahazi kalavya malavyo na kuvunkiza ubani hantu henukile, kwawagulu na hasi he chila mti mbisi. 5Vikaheza seuta Lesini ywa Alamu na Peka mwana ywa Lemaliya seuta ywa Izulaeli wafosa chani wagombe nkondo na awantu wa Yelusalemu, wamtandama Ahazi mna hawadahile kumhuda. 6Mwe ichipindi icho, seuta ywa Alamu autahaga na kuwavuziza awantu wa Alamu umzi wa Elati, kawabalaza awantu wa Yuda wendaga wakekala umo momzi. Wantu wa Alamu niyo wengila momzi wa Elati waika wikazi wawo kubula vino dyelo. 7Ivyo, Ahaziya niyo atuma walosi kwa seuta Tigilati Pileseli ywa Ashulu wakatenda na ulosi uno, “Miye mndima ywako mkanuni. So unambule kwa maseuta wa Alamu na Izulaeli awo wakunebunga.” 8Ahaziya niyo aguha chumbu na zahabu mwe Idihekalu dya Zumbe Chohile ne ihazina yendaga mwe inyumba ya seuta na kumwigaila seuta ywa Ashulu saviya majeleko. 9Tigilati Pileseli niyo azumila kudamanya viya Ahaziya alombeze, kawebunga umzi wa Damesiki na kuutaha. Kataha awantu womzi wa Damesiki na kuwegala kwemzi ukwitangwa Kili, akaheza niyo amkoma seuta Lesini. 10Vikaheza seuta Ahaziya niyo aita komzi wa Damesiki akadugane na seuta Tigilati Pileseli, uko awonaga mazabahu ya kulaviza ntambiko. Elo, niyo amtumila umdolonyo we imazabahu iyo mlavyantambiko Uliya, hamwenga no umwalo wase wo uzesi ivyo ukungwa ujeswe. 11Ivyo, Uliya kazenga iyo imazabahu kuligana na ivyo umdolonyo wili, kabinda kuizenga umo Ahaziya henati kuya kaya. 12Ahaziya eze auye kulawa Damesiki, niyo awona iyo imazabahu, kaisogeila na kulavya malavyo mlanga mwakwe. 13Kalavya malavyo yakwe ya kutikimya na mpuluzi na yakunywa, niyo amyaga sakame ya malavyo ya utondowazi. 14Mazabahu idamanywe kwa shaba ya kulaviza ntambiko ikigwe ukuka kwa Zumbe Chohile kayusa kulongozi kwe inyumba kulawa ahantu yaikigwe hagati he imazabahu yakwe ne inyumba ya Zumbe Chohile, niyo aika hantu hendile ntendele ya chenya ye imazabahu yakwe. 15Niyo amlagiza Uliya amgamba, “Jeseza ino imazabahu yangu nkulu kwa kutikimiza malavyo ya mtondo na malavyo ya mpuluzi ya nechisingi, malavyo ya kutikimya na malavyo ya mpuluzi ya seuta na awantu wose, iviya na malavyo ya divai ya wantu. Imyagile sakame ya awanyama wose wo kutikimya awo walavigwe malavyo. Mna idya imazabahu idamanywe kwa shaba miye naniijeseze kumuza ulangilizi Chohile.” 16Mlavyantambiko Uliya niyo ajesa saviya alagizwe ni seuta. 17Seuta Ahazi niyo ausa izifulemu zendile zichimaliswa uko, niyo ausa ibilika ikwitangwa bahali iyo yendile mlanga mwe ziya izinjeku mlongo na mbili zidamanywe kwa saba na kuika mlanga mwe chegamo cha mayuwe. 18Ne idiheha nadikasejezwa mwe Idizuwa dyo Kuhumula dyendile dizengwa mndani mwe inyumba hamwenga ne ibalaza ya kuse, seuta kavisamiza kulawa mwe Idihekalu dya Zumbe Chohile kwachausa cha seuta ywa Alamu. 19Mbuli ntuhu zose adamanye seuta Ahazi ziwandikwa mwechitabu cho Lukumbusa lwa amaseuta wa Yuda. 20Ahazi niyo abanika na kuhambwa kwe izimbila wahambigwe amaseuta awatuhu komzi wa Daudi, mwana ywa Ahazi akwitangwa Hezekiya niyo atenda seuta ise eze abanike.