Maseuta 17

Seuta Hoshea ywa Izulaeli

1Mo mhilimo wa mlongo na mbili wo ulongozi wa seuta Ahazi ywa Yuda, Hoshea mwana ywa Ela akongaga kulongoza Izulaeli, kalongoza kwa mihilimo chenda akatenda ekala uko Samaliya. 2Kadamanya mbuli za ukola masa kwa Zumbe Chohile, mna masa akoile sayo sayadya yadamanywe na amaseuta wa Izulaeli wamlongoile. 3Seuta Shalimanesa ywa Ashulu amwebungaga, Hoshea niyo atenda mndima ywake amliha kodi chila mhilimo. 4Mna chipindi chimwenga Hoshea asigilaga walosi kwa seuta Soo ywa Misili alombeza wambizi, aho niyo aleka kuliha kwa seuta Shalimanesa ywa Ashulu saviya azwele kudamanya chila mhilimo. Shalimanesa eze awone ivyo niyo amtaliza minyolo Hoshea na kumjela mwechifungo.

Kuhudwa kwa Samaliya

5Seuta ywa Ashulu niyo ayebunga isi yose ya Izulaeli aubwila umzi wa Samaliya autanadama kwa mihilimo mitatu. 6Mo mhilimo wa chenda wo ulongozi wa Hoshea, seuta ywa Ashulu niyo awataha awantu wo umzi wa Samaliya, kawataha awantu wa Izulaeli na kuwegala Ashulu, awamwenga kawaika ko mkowa ukwitangwa Hala Gozani wi hajihi na umto wa Haboli, na awatuhu kawaika komzi wa Mediya. 7Yose ayo yadamanyika kwaviya wantu wa Izulaeli wamleka Zumbe Chohile ywawo, uyo awalavize mwemikono ya seuta ywa Misili, iviya wavikila milungu mituhu, 8na kutimila sila za wantu wa izisi ntuhu wabalazwe ni Zumbe Chohile kulongozi kwa Waizulaeli, na kudamanya mbuli zingizwe mwe isi ni maseuta wa Izulaeli. 9Wantu wa Izulaeli wadamanya kwa chinyele mbuli zihiye kulongozi kwa Zumbe Chohile, Chohile ywawo. Wazenga hantu henukile hakuvikila milungu ya udanti mwe chila mzi, kukongela kwe imizi imidodo kubula kwe mizi mikulu. 10Kulanga kwe chila kagulu na chila hantu hana mti una mani mabisi, wazenga nguzo za mayuwe na matukulu ya mnungu ywa chivyele akwitangwa Ashela, 11niyo wavunkiza ubani kwe izimazabahu zose zo kulaviza ntambiko za milungu yo udanti kutimila mazwela ya wantu wa izisi ntuhu awo wabalazwe ni Zumbe Chohile, wamwihiza Zumbe Chohile kwa ntendwa zawo zihiye, 12naho wasankanila matukulu ayo Zumbe Chohile awalemeze akagamba, “Msekudamanya izimbuli izo.” 13Zumbe Chohile niyo atuma wawoni na walotezi chani wawafunde awantu wa Izulaeli na Yuda, akagamba, “Lekani izisila zenyu zihiye mtimile imiko yangu na malagizo yangu kutimilana na izisigilizi niwenkile wababa zenyu, naho izo siwenkani kujinkila kwa awandima wangu wawoni.” 14Mna wowo hawanitegeleze, wendaga wankani saviya wababa zawo, awo hewemzumile Zumbe Chohile, Chohile ywawo. 15Walemela kutimila malagizo yakwe, hawatozize lagano adamanye na wababa zawo, hamwenga na kuhufya amakanyo yakwe, wavikila matukulu kubula wowo wenye hawana mana, watimila mazwela ya wantu watuhu wawazunguluke, wahufya imiko ya Zumbe Chohile naho hawaitimile. 16Wabalanga imiko yose ya Zumbe Chohile, Chohile ywawo, niyo wadamanya matukulu ya milungu ya wadama waidi wa kusana, iviya niyo wadamanya matukulu ya mnungu ywa chivyele akwitangwa Ashela niyo wavikila ivintu vyose vya mo ulanga na kumsankanila mnungu Baali. 17Wawalavya ntambiko wana wawo wa chilume na wachiche kwa milungu yaudanti, waunga ulangilizi kwa walotezi na wasai. Wekamba vitendese kudamanya mbuli zihiye kwa Zumbe Chohile, wamwihiza vitendese. 18Elo, Zumbe Chohile niyo aweihiwa vitendese wantu wa Izulaeli niyo awabalaza chani asekuwawona, hasigaze mntu, ukaleka awantu we idikabila dya Yuda awodu. 19Mna hata awantu we idikabila dya Yuda hawatimile imiko ya Zumbe Chohile, Chohile ywawo, watimila mazwela yegalwe ni wantu wa Izulaeli. 20Zumbe Chohile kawalemela Waizulaeli na Wayuda wose, kawakantila na kuwaleka mwe imikono ya wankondo wawo wakali, akaheza niyo awabalaza chani asekuwawona. 21Zumbe Chohile eze awasente wantu wa Izulaeli kulawa mo ulukolo lwa Daudi, niyo wamwika Yeloboamu mwana ywa Nebeti atende seuta. Uyo Yeloboamu niyo awahosa awantu wa Izulaeli wamleke Zumbe Chohile wadamanya mbuli zikuile za ukola masa. 22Waizulaeli wadamanya mbuli za masa zidamanywe ni Yeloboamu, wadunduga kuzileka, 23izimbuli izo zihosa Zumbe Chohile awabalaze kulongozi kwakwe, saviya alongaga kujinkila kwa awandima wakwe wose wawoni. Ivyo wantu wa Izulaeli niyo watahigwa kulawa mweisi yawo wenye wegalwe kweisi ya Ashulu uko wakwikala kubula vino haluse.

Wantu wa Ashulu waika wikazi wawo Izulaeli

24Vikaheza seuta ywa Ashulu niyo aguha wantu kulawa Babeli na Kuta na Ava na Hamata na Sefalivaimu awaika komzi wa Samaliya hantu hawantu wa Izulaeli wasamizwe. Niyo waguha iyo imizi na kwikala umo. 25Niyo vyalaila kugamba weze wakonge kwikala umo, hawamvikile Zumbe Chohile, ivyo Zumbe Chohile niyo atuma simba, izo zikoma awamwe wawo. 26Wantu niyo wamgambila seuta ywa Ashulu, “Wantu we izisi usamize na kuwaika mwe imizi ya Samaliya hawamanyize izimbuli akunga mnungu ywa iyo isi, ivyo uyo mnungu katuma simba zikuwakoma.” 27Aho, seuta ywa Ashulu niyo alagiza vino, “Guhani mlavyantambiko yumwenga mwa wadya mtahile kulawa Samaliya chani auye ekale uko na kuwahinya mbuli ziya akunga mnungu ywa isi iyo.” 28Ivyo mlavyantambiko yumwenga atahagwa kulawa Samaliya niyo aita akwikala komzi wa Beteli kuwahinya wantu ivyo vikuwagila kumvikila Zumbe Chohile. 29Mna izisi zose mwe imizi wekale wedamanyiza milungu yawo na kuika hantu henukile uko wantu wa Samaliya nendile wadamanye. 30Wantu walaile Babeli niyo wadamanya mnungu ywawo akwitangwa Sukoti Beneti na wantu walaile Kuta niyo wadamanya mnungu ywawo akwitangwa Neligali na wantu walaile Hamati wadamanya mnungu ywawo akwitangwa Ashima. 31Waavi wadamanya Nibuhazi na Talitaki, Wasefelivaimu walavya wana wawo watende malavyo ya kutikimya kwe imilungu yawo ya Adulameleki na Anameleki. 32Wantu awo iviya wamvikila Zumbe Chohile. Mna iviya wasagulaga wantu wawo wasiku chani wawajeseze mwembuli zawo za ulavyantambiko hantu hokuvikila milungu hantu henukile he imiviko ye imilungu kwachausa chawo. 33Wamvikila Zumbe Chohile mna iviya wasankanila milungu yawo waguhile kweizisi walaile. 34Kubula vino dyelo wajendeleza kutoza mbuli zawo za chikale wazwele. Hawakumvikila Zumbe Chohile viya vikungwa naho hawakutimila izinkanto na amalagizo, miko na sigilizi ziya Zumbe Chohile awenkile awelekwa wa Yakobo, yudya amwinkile zina hya dya Izulaeli. 35Umo Zumbe Chohile akadamanya Lagano na Waizulaeli kawalagiza kugamba, “Msekuvikila milungu yoyose mituhu naho msekuifikila madi hegu kuisankanila hegu kuilaviza ntambiko. 36Mna mwaungwa mnivikile miye Zumbe Chohile, miye niwalavizeni kweisi ya Misili kwa nguvu na udahi wangu mkulu. Kwangu miye namfike madi na kunilaviza ntambiko. 37Mazuwa yose mwaungwa mkaulise kutimila izinkanto na amalagizo, miko na sigilizi niwagambileni. Msekuvikila milungu mituhu mpwii. 38Msekujala lagano nidamanye na nyuwe, naho msekuvikila milungu mituhu. 39Mna, namnivikile miye Zumbe Chohile ywenyu, miye nuyo naniwakomboleni kulawa mwa awankondo wenyu wose.” 40Hata ivyo hawevile, mna wajendeleza kudamanya mbuli zawo wazwele kudamanya. 41Hata umo awantu awo wakamvikile Zumbe Chohile, wendile wachei wakasankanila matukulu yawo. Kubula vino dyelo welekwa wawo wajendeleza kudamanya mbuli saziya wadamanye watati zawo.