Maseuta 18

Seuta Hezekiya ywa Yuda

1Mo mhilimo wa katatu wo ulongozi wa Hoshea mwana ywa Ela akatenda seuta ywa Izulaeli, Hezekiya mwana ywa Ahaziya seuta ywa Yuda akongaga kulongoza. 2Hezekiya umo akakonga kulongoza endaga na mihilimo milongo midi na mishano. Alongozaga uko Yelusalemu kwa mihilimo milongo midi na chenda. Nine nendile aketangwa Abiya, mchiche ywa Zekaliya. 3Hezekiya adamanyaga mbuli zedi zikumuwagila Zumbe Chohile saziya adamanye babakwe Daudi. 4Abalangaga ahantu hose henukile hakuvikila milungu ya udanti na kutula izinguzo za amayuwe zo kuvikila za mnungu Ashela. Iviya atulaga tukulu dya nyoka ya shaba dyadamanyagwa ni Musa nadiketangwa Nehushitani, kwaviya kubula amazuwa ayo wantu wa Izulaeli wendaga wachei wadivunkiziza ubani iditukulu idyo. 5Hezekiya aikaga msuhi wakwe kwa Zumbe Chohile, Chohile ywa Izulaeli, mgati mwa amaseuta wose wa Yuda wamlongoile na wamtimile hahana endile sauyo. 6Uyo kamwetegeleza Zumbe kwa kuhikiliza naho halekile kumtimila, katoza imiko yose Zumbe Chohile amlagize Musa kwachausa cha awantu wa Izulaeli. 7Zumbe Chohile niyo atenda hamwenga naye niyo achumilwa mwe chila mbuli adamanye. Iviya alemelaga kumtimila na kumsankanila seuta ywa Ashulu. 8Awatowaga Wafilisiti kubula komzi wa Gaza neisi iwazunguluke kukongele komnala wa awamizi kubula komzi uzengelwe ngome. 9Mhilimo wa kane wo ulongozi wa Hezekiya, iviya wendaga mhilimo wa mfungate wo ulongozi wa Hoshea mwana ywa Ela seuta ywa Izulaeli, seuta Shelimanesa ywa Ashulu awebungaga umzi wa Samaliya na kuutandama kwa wagomba nkondo. 10Mo udumo wa mhilimo wa katatu wagomba nkondo wa Ashulu wautahaga umzi wa Samalia. Uwo wendaga mhilimo wa mtandatu wo ulongozi wa Hezekiya iviya ni mhilimo wa chenda wo ulongozi wa Hoshea seuta ywa Izulaeli umo awantu wo umzi wa Samaliya wakatahwa. 11Seuta ywa Ashulu awatahaga awantu wa Izulaeli na kuwegala Ashulu, awamwenga awaikaga komzi wa Hala, awatuhu hajihi no umto wa Haboli komzi wa Gozani, awatuhu kawaika kwemizi ya Waamedi. 12Ayo yalaila kwaviya wantu wa Izulaeli hawatimile viya alongile Zumbe Chohile, Chohile ywawo, mna waleka idilagano dyakwe, naho hawatimile yadya yose walagizwe ni Musa mndima ywa Chohile.

Seuta Senakelibu ywa Ashulu awawatisa awantu wa Yelusalemu

2Mihilimo 32:1-19; Isaya 36:1-22

13Mo mhilimo wa mlongo na mine yo ulongozi wa seuta Hezekiya, seuta Senakelibu ywa Ashulu ayebungaga imizi yose ya Yuda yazengelagwa ngome niyo aitaha. 14Hezekiya niyo atuma ulosi uko Lakishi kwa Senakelibu amgamba, “Sibalanga. Hampu leka kunebunga miye nahulihe chochose naunge.” Seuta ywa Ashulu niyo amlagiza Hezekiya amwigaila tani mlongo umwenga za chumbu na tani imwenga ya zahabu. 15Hezekiya niyo amwigaila ichumbu chose chendile mwe Idihekalu dya Zumbe Chohile na mwe ihazina ye idizumba dya seuta. 16Iviya Hezekiya niyo abandula izahabu yose imamatizwe mwe izinyivi ze Idihekalu dya Zumbe Chohile na idya izahabu amamatize mwenye mwe izifulemu ze izinyivi, yose niyo amwigaila Senakelibu. 17Vikaheza, Seuta ywa Ashulu niyo amsigila sekulu ywa wagomba nkondo wakwe na sekulu ywakwe mkulu na chilongozi mkulu ywa wagomba nkondo wakwe hamwenga na wagomba nkondo walozize kulawa Lakishi kwita Yelusalemu kwa seuta Hezekiya. Watamba niyo wabula Yelusalemu. Weze wabule niyo wengila na kuchimala hampezo ho mfilimbi ukwigala mazi kwe idibwawa dintendele ya kuchenya mwe isila nkulu ikuhinga kwe ichiwasa cha awantu wakufuila suche. 18Niyo wamwitange seuta Hezekiya, niyo wasingilwa ni Eliyakimu mwana ywa Hilikiya, endaga mta kuchimaila idizumba dya seuta na Shebuna mta kuwandika na Yao mwana ywa Asafu mta kuwandika Mbuli zijinkile za mihilimo za seuta. 19Yudya sekulu ywa awagomba nkondo wa Ashulu niyo awagamba, mgambileni Hezekiya, Vino nivyo seuta mkulu, seuta ywa Ashulu akulonga, “Msuhi wako kuwika kwa yuhi? 20Togola wafanyanya kugamba ulosi uwodu wadaha ukuhuda mwe nkondo? Msuhi wako kwika kwa yuhi vikuleka wanihituka? 21Kaula, haluse kwika msuhi kweisi ya Misili ikwambize ni saviya tete kuditenda nkome ya kutalamkila difyokile idyo mntu anadyegamila dyamlumiza. Ivyo nivyo eli Falao seuta ywa Misili kwa mntu yoyose namwikiye msuhi.” 22“Weye unanigamba, ‘Msuhi wetu chawika kwa Zumbe Chohile ywetu’, Mmanye kugamba ni Chohile uyo uyo, yudya Hezekiya abogozole ahantu hakwe henukile ne izimazabahu zakwe, nakuwagamba awantu wa Yuda na Yelusalemu wavike du kulongozi kwe imazabahu iyuko Yelusalemu. 23Haluse damanyani wivano na sekulu ywangu seuta ywa Ashulu, miye naniwenkeni falasi elufu mbili, uneva namdahe kupata wakwela falasi. 24Weye ne idyo idibunga ididodo dya wagomba nkondo, nodahe vivihi kumvuza kunyuma sekulu yumwenga wa bunga dodo naho dihwele dya wagomba nkondo dya sekulu ywangu, kuno mwaika msuhi kweisi ya Misili iwegaileni malingisha na wakwela falasi?” 25Kujinka ivyo, mwafanyanya kugamba siza hehena sigilizi ya Zumbe Chohile chani niyebunge na kuibalanga ino isi? Zumbe Chohile nuyo anigambile, “Yebunge ino isi na kuibalanga.” 26Elo, Eliakimu mwana ywa Hilikiya na Shebuna na Yoa wamgamba uyo sekulu ywa wagomba nkondo wa Ashulu, “Hampu losana na suwe kwa longa dya Chialamu kwaviya chadiva vyedi, usekulosana na suwe kwa Chiebulania kwaviya wantu wemwe chiwambaza wetegeleza.” 27Mna yudya sekulu ywa wagomba nkondo niyo awagamba, “Togolani sekulu ywangu kanisigila nilavye ulosi uno kwa sekulu ywenyu na kwenyu du? Togolani iviya hanisigile kwa wantu wakwikala mweviwambaza wakantilwe hamwenga na nyuwe kudya amavi yawo na kunywa amakozo yawo wenye?” 28Vikaheza yudya sekulu ywa wagomba nkondo niyo achimala alonga Chiebulania kwa izwi kulu, “Tegelezani milosi ya seuta mkulu, seuta ywa Ashulu akuwagambilani! 29Vino nivyo akulonga seuta, Msekuzumila kudantwa ni Hezekiya, kwaviya hadahe kuwambulani. 30Msekuzumila awaluvyeni chani mwike msuhi kwa Zumbe Chohile akagamba, Zumbe Chohile nachambule naho uno umzi haujelwe mwemikono ya seuta ywa Ashulu. 31Msekumwetegeleza Hezekiya, mwetegelezeni seuta ywa Ashulu agamba, ‘londani utondowazi na miye, naho mwize kwangu. Aho chila yumwenga ywenyu nadahe kudya ntunda za mzabibu wakwe mwenye, ntunda za mtini wakwe mwenye na kunywa mazi yakulawa mwesima dyakwe mwenye, 32kubula aho nyumani nanizile na kuwegalani hale kweisi saino iyenyu, si ina nkande na divai, si ina nkonde za ngano na nkonde ya mizabibu, si ina mizaituni na uchi. Uneva mnazumila vino hulonga hambanike mna namtende na ujima.’ Msekumwetegeleza Hezekiya akawadanta akagamba, Zumbe Chohile nachambule. 33Togolani, hana mnungu ywa si yoyose ambule isi yakwe kulawa mwemikono ya seuta ywa Ashulu? 34Togolani, ikuhi imilungu ya Hamati na Alipadi. Ikuhi imilungu ya Sefalivaimu na Hena na Iva, Togolani iwambula Samaliya kulawa mwemikono yangu? 35Ni mnungu yuhi mgati mwe zino izisi ambule isi yakwe mwangu vileke ufanyanye Zumbe Chohile nadahe kuwambula umzi wa Yelusalemu kulawa mwangu? 36Mna wantu wose niyo wanyamala dwii, hawahitule ulosi wowose saviya walagizwe ni seuta Hezekiya, akagamba, msekumhitula.” 37Vikaheza, Eliakimu mwana ywa Hilikiya mta kuchimaila inyumba ya seuta na Shebina mta kuwandika na Yoa mwana ywa Asafu mta kuwandika Mbuli za Mihilimo niyo wambasa seuta Hezekiya kuno watatula izisuche zawo, wamgambila mbuli zose wagambilwe ni yudya sekulu ywa wagomba nkondo.