Maseuta 19

Seuta alombeza wambizi kwa Isaya

1Seuta Hezekiya eze eve izimbuli izo, niyo atatula izisuche zakwe avala majuniya engila kwe Idihekalu dya Zumbe Chohile. 2Kawalagiza Eliakimu sekulu ywe idizumba dya seuta na Shebuna mta kuwandika na wadalahala wa walavantambiko, wambase muwoni Isaya mwana ywa Amozi, wakatenda wavala majuniya. 3Awo niyo wamgamba Isaya, “Hezekiya agamba vino, dyelo ni zuwa dya chiholozi, zuwa dya kukwahilwa na kubelwa. Suwe chitenda saviya msoka akunga kwefungula, mna hakudaha kwefungula. 4Vyadahika Zumbe Chohile, Chohile ywako nakeva ulosi wa sekulu ywa wakulu wa wagomba nkondo, uyo asigilwe ni seuta ywa Ashulu sekulu ywakwe, chani amhulute Chohile mta ujima, uyo Zumbe Chohile, Chohile ywako, nakwahile mbuli evile. Elo, walombezeze wantu wasigale.” 5Ivyo, wandima awo wa seuta Hezekiya weze wabule kwa Isaya, 6kawetegeleza niyo awagamba, “Mgambileni sekulu ywenyu, vino nivyo Zumbe Chohile akulonga, ‘Usekogoha kwachausa cha mbuli wivile, izo wandima wa seuta ywa Ashulu awalongile kunitila. 7Tegeleza! Nanitende seuta eve mbuli siku, nauye kweisi yakwe, uko nanihose akomwe kwa mabamba.’”

Seuta ywa Ashulu awatisa vituhu Waizulaeli

Isaya 37:8-20

8Vikaheza yudya mkulu ywa wagomba nkondo eze eve kugamba seuta ywa Ashulu kakulawa Lakishi kambasa na kumbwila kawebunga umzi wa Libina. 9Vikaheza seuta eze eve ulosi kugamba Tilihaka seuta ywa Kushi eza kugomba nkondo naye, niyo asigila walosi kwa Hezekiya, kugamba, 10“Mgambileni Hezekiya seuta ywa Yuda, ‘Usekuzumila kudantwa nuyo Chohile ywako ukwikiya msuhi akagamba umzi wa Yelusalemu hautahigwe ni seuta ywa Ashulu. 11Kwa ukanuni kwiva ivyo maseuta wa Ashulu ivyo wazitendile izisi ntuhu na kuzibalanga vitendese. Togola weye wafanyanya nohone? 12Togola, milungu ye izisi izo yambulaga Gozani na Halani na Lesefu na Waedeni wekalaga Telasali, izisi izo wababa wazibalangaga? 13Wekuhi amaseuta wa Hamati na Alipadi na Sefavaimu na Hena na Iva?’”

Malombezo ya Hezekiya

14Seuta Hezekiya kahokela baluwa kulawa kwa walosi niyo aisoma. Akaheza niyo aita akwingila kwe Idihekalu dya Zumbe Chohile, niyo aifungula kulongozi kwa Zumbe Chohile. 15Akaheza niyo amlombeza Zumbe Chohile akagamba, “Weye Zumbe Chohile, Chohile ywa Izulaeli, ukwikala mwe ichigoda chako cho uzumbe mlanga mwe vyumbe vina mawawa vikwitangwa makelubi, ni weye Chohile ichedu, ukulongoza seuta zose za mweizisi. Weye kumba isi na ulanga. 16Weye Zumbe Chohile, gubula ameso uwone, tega gutwi dyako wive amahuluto yose Senakelebu akukuhuluta weye Zumbe Chohile mta ujima.” 17“Weye Zumbe Chohile, ni chindedi kugamba maseuta wa Ashulu wabalanga wantu ne izisi zawo. 18Awo wadulaga milungu yawo mo moto kwaviya hayendile milungu ya chindedi, mna yendaga matukulu ya miti na mayuwe du yasongolwe ni mikono ya wantu. 19Haluse, weye Zumbe Chohile, Chohile ywetu, nakweila chambule kulawa mwe imikono yakwe, chani maseuta wose mweisi wamanye kugamba weye ichedu ni weye Zumbe Chohile.”

Ulosi wa Isaya kwa seuta

Isaya 37:21-38

20Vikaheza Isaya mwana ywa Amozi niyo asigila ulosi kwa Hezekiya, akamgamba, “Vino nivyo akulonga Zumbe Chohile, Chohile ywa Izulaeli, ‘Siyeva amalombezo yako kumlanga Senakelebu seuta ywa Ashulu.’” 21Uno nuwo ulosi wa Zumbe Chohile alongile ukumlanga Senakelebu, “Akuhufya na kukubela weye mchiche ywa Sayuni, asingisa mtwi wakwe kunyuma kwako mchiche ywa Yelusalemu. 22Togola, uyo ukutila na kumhuluta ni yuhi? Wamgutila yuhi na kumng'oila meso kobezi, kunidamanyiza miye Mkuka ywa Izulaeli!” 23Kwa kuwasigila walosi wako kumtila Zumbe Chohile, weye kugamba, “Kwa malingisha yangu ya nkondo yalozize, sikwela vinenengwe vya magulu, kubula ko lunenengwe lwa Lebanoni. Mielezi yakwe mitali siisenga, ne imisonobali imitana, singila kubula mndani mwakwe na mndani mwe izimbago zakwe nkulu. 24Sisimba masima mwe izisi ze chijeni na kunywa amazi yakwe. Kwa lwayo lwe iviga vyangu sinyaza imito yose za Misili.” 25“Togola hwivile, chikale vidala silagiza imbuli ino.” Chino hudamanya sichifanyanya mazuwa. Kugamba uzenge mizi ina ngome kwa visungu vya makalankala. 26Wantu wakwe wakatenda wasilwa ni nguvu, wogoha na kufa chevu naho wajelwa soni. Watenda saviya mani ya kwenkonde, saviya mani yanyuluke. Saviya mani yakuhota kulanga kowala yakunyala heyenati kukula. 27“Mna miye simanya chila chintu chako, ukengila na ukafosa, ne ivyo ukuniihiwa sivimanya. 28Kwaviya wanifila maya naho ubezi wako siwiva, nanike indwana yangu mwe impula yako, na kazuma kakuwogweila mo mlomo wako. Nahuvuze mwesila idya wizile.” 29Vikaheza Isaya amgamba Hezekiya, “Chino nachitende chilagiso kwako, mhilimo uno na ukwiza namdye chehotele. Mna mhilimo wa katatu namhande na kulozola, namhande zabibu na kudya izintunda zakwe. 30Wantu wo ulukolo lwa Yuda wasigale nawajenyele na kutenda walozize saviya mti ukuhoteza maizi yakwe mwesanga na kweleka ntunda kulanga. 31Kwaviya nakutenda na wantu nawasigale uko Yelusalemu, heye uko kolugulu lwa Sayuni nakutende na wantu nawasigale, kwaviya Zumbe Chohile kekamba kudamanya izimbuli izo. Kwekamba kwa Zumbe mta nguvu zose nuwo nauchintize ayo.” 32“Ivyo Zumbe Chohile agamba vino kumlanga seuta ywa Ashulu, ‘Hengile muno mo mzi hegu kulasa mfulo hegu kuubasa kwa nchingo hegu kuutandama. 33Nauye kwa sila idya ezile naho hengile muno mo mzi.’ Ivyo nivyo akulonga Zumbe Chohile. 34‘Mzi uno naniudime na kuwambula kwa chausa cha ntunyo yangu na kwachausa che idilagano nimwikiye mndima ywangu Daudi.’ ” 35Ichilo icho mlosi ywa Zumbe Chohile niyo engila mwe inkambi ya Waashulu na kukoma wantu laki imwenga na milongo mnane na shano elufu. Kwize kuche wantu niyo wenuka, wawona vimba vya wantu chila hantu. 36Ivyo, vikaheza Senakelebu seuta ywa Ashulu niyo ahalawa aita akwikala kweisi ya Ninawi 37Zuwa dimwenga Senakelebu umo akavika mwe inyumba ya Nisiloki mnungu ywakwe, wanawe waidi, Adulameleki na Sheleza niyo wamkoma kwa bamba, niyo wasumkila kweisi ya Alalati. Mwanawe akwitangwa Esali Hadoni niyo atenda seuta ise eze abanike.