Maseuta 20

Seuta Hezekiya ahuma na kuhona

1Amazuwa ayo, Hezekiya ahumisaga hadodo abanike, Muoni Isaya mwana ywa Amozi niyo ambasa amgamba, “Vino nivyo Zumbe Chohile akulonga, ‘Damanya vyedi mbuli ze inyumba yako kwaviya nobanike hohone.’” 2Hezekiya niyo ahitukila kwenkandula amlombeza Zumbe Chohle agamba, 3“Weye Zumbe Chohile kumbuka viya husankanile kwa moyo wose na ivyo nidamanye yakuwagila kulongozi kwako.” Hezekiya niyo aila kwa usungu utendese. 4Umo Isaya henati kujinka uwa wa hagati, ulosi wa Zumbe Chohile niyo wamwizila, kugamba, 5“Uya ukamgambe Hezekiya, mkulu ywa awantu wangu. Miye Zumbe Chohile ywa mkale ywako Daudi, siva idilombezo dyako naho mesozi yako siyawona elo nahuhonye. Nahuhonye mazuwa matatu yanomboka nawite kwe Idihekalu dya Zumbe Chohile. 6Nahongeze mihilimo mlongo umwenga na mishano ya ujima. Nahwambule weye hamwenga na uno umzi kulawa mwe imikono ya seuta ywa Ashulu. Mzi uno naniudime kwachausa cha ntunyo yangu na kwachausa cha lagano nimwikiye mndima ywangu Daudi.” 7Vikaheza, Isaya niyo agamba, “Nigailani nkuyu inyaile muimamatize mwe idihu dyakwe chani ahone.” 8Hezekiya niyo amuza Isaya, “Ni chilagiso chani icho nachinilagise kugamba chindedi Zumbe Chohile nanihonye na zuwa dya katatu nanidahe kwita kwe Idihekalu dya Zumbe Chohile?” 9Isaya amhitula, “Chino nachitende chilagiso kwako kulawa kwa Zumbe Chohile kugamba, Zumbe Chohile nadamanye saviya alongile. Togola wonga ichizuli che idizuwa chime izintantillo chite nkacho mlongo kulongozi hegu chuye kunyuma nkacho mlongo?” 10Hezekiya ahitula, “Nivihufu chizuli kwita kulongozi nkacho mlongo! Leka chuye kunyuma nkacho mlongo.” 11Isaya niyo amlombeza Zumbe Chohile, Zumbe Chohile niyo atenda ichizuli chuye nkacho mlongo kulawa heizintantilo zidamanywe ni Ahazi.

Ulosi kulawa kwa seuta ywa Babeli

Isaya 39:1-8

12Mwa amazuwa ayo seuta Melodaki Baladani, mwana ywa Baladani seuta ywa Babeli nakeva kugamba Hezekiya kahumisa mna haluse kahona, niyo amwigaila ulosi na majeleko. 13Hezekiya niyo awahokela na kuwalagisa ugoli wakwe. Nyumba yakwe ye ihazina, hela na zahabu na vilungo vya kwambikila, mavuta ya kupwepweleka ne inyumba ye iviziha vyakwe vyose vya kugombela nkondo na vintu vyose vyendile mwe izihazina zakwe. Hakwendila na chochose mwe inyumba yakwe hegu kweisi yakwe hewalagise. 14Aho muwoni Isaya niyo ambasa Hezekiya amuza, “Wano wantu wagamba mbwani? Naho wakubasa walawa kuhi?” Hezekiya amhitula, “Wanibasa walawa si ya hale uko Babeli.” 15Niyo amuza, “Wawona mbwani mwe idizumba dyako?” Hezekiya amhitula, “Wawona vyose vimwe idizumba dyangu. Hahana chochose mwa amagulu yangu siwalagise.” 16Aho, Isaya amgamba Hezekiya, “Tegeleza ulosi wa Zumbe Chohile. 17Kaula, mazuwa yeza vintu vyose vimwe inyumba yako vichisanywe ni watati zako kubula mazuwa yano navigalwe kubula Babeli. Hahana chintu chochose nachisigale, nivyo Zumbe Chohile akulonga. 18Naho wanawo wasiku wa chilume nawatahwe, awo nawafuntwe na kutendwa wandima mwe idizumba dya seuta ywa Babeli.” 19Hezekiya niyo amgamba Isaya, “Ulosi wa Zumbe Chohile saviya ulongile uchuma.” Kalonga ivyo kwaviya nakafanyanya, “Ni mbwani visekutenda ivyo hegu nakutende na utondowazi mo ulongozi wangu.”

Uhelo wo ulongozi wa Hezekiya

2Mihilimo 32:32-33

20Mbuli ntuhu adamanye Hezekiya na ukankalu wakwe na milosi ya ivyo azengile idibwawa na kusimba mfilimbi ukwigala mazi komzi, yawandikwa mweichitabu cho Lukumbusa lwa maseuta wa Yuda. 21Hezekiya niyo abanika, mwanawe akwitangwa Manase niyo atenda seuta ise eze abanike.