Maseuta 21

Seuta Manase ywa Yuda

2Mihilimo 33:1-20

1Manase endaga na mihilimo mlongo umwenga na midi umo akakonga kulongoza Yuda, kalongoza kulawa Yelusalemu kwa mihilimo milongo mishano na mishano. Nine naketangwa Hefisiba. 2Manase kadamanya mbuli za wavu kulongozi kwa Zumbe Chohile kwa kutimila lujendo lwihiye lwa wantu we izisi wabalazwe ni Zumbe Chohile umo awantu wakwe wa Izulaeli umo wendaga wakengila mweisi iyo. 3Kwaviya ahazengaga uhya ahantu henukile ho kuvikila milungu mituhu habalangwe ni ise Hezekiya, niyo azenga mazabahu ya kulaviza ntambiko za kumvikila mnungu Baali na kudamanya tukulu dya Ashela, saviya adamanye Ahabu seuta ywa Izulaeli. Iviya kafikila madi na kuvikila vintu vyose vya kulanga. 4Niyo azenga mazabahu za kuvikila milungu mndani mwe Idihekalu dya Zumbe Chohile, hantu aho Zumbe Chohile alongaga, “Awantu wo umzi wa Yelusalemu nawanivikile miye.” 5Mwe izinyuwa mbili ze Idihekalu dya Zumbe Chohile azengaga mazabahu ya kuvikila vintu vya mo ulanga. 6Iviya kamlavya mwanawe lavyo dya kutikimya. Kasinya mlamulo, kahima ndege akambizana na walaguzi wa wazimu na wasai. Kadamanya wavu utendese kulongozi kwa Zumbe Chohile niyo amjela maya vitendese. 7Niyo aguha iditukula dya Ashela adamanye adika mwe Idihekalu dya Zumbe Chohile amgambaga Daudi na mwanawe Solomoni vino, “Mwe Idihekalu dino na momzi wa Yelusalemu nisagule naho ahantu nanivikilwe kale na kale. 8Naho hegu Waizulaeli wanatimila na kudamanya mbuli zose nilagize na kutimila imiko yangu yose wenkigwe ni Musa mndima ywangu, saniwaleke wabalazwe kulawa mweisi ino niwenkile watati zawo.” 9Mna hawanivile, uyo Manase kawahosa wakolese masa kujinka yadya yadamanywe na awantu we izisi ntuhu awo Zumbe Chohile awabalangaga kulongozi kwa Waizulaeli. 10Aho, Zumbe Chohile niyo alonga kujinkila awandima wakwe wawoni akagamba, 11“Manase seuta ywa Yuda kadamanya mbuli zikwihiza, mbuli zihiye vitendese kujinka ziya zidamanywe ni Waamoli wamlongwele, iviya kawahosa awantu wa Yuda nawo wakole masa kwa kujeseza amatukulu yakwe. 12Elo haluse miye Zumbe Chohile, Chohile ywa Izulaeli, nanigale file zilozize mwa Yelusalemu na Yuda, yoyose akunga eve imbuli iyo netuke. 13Yelusalemu naniukantile saviya niukantile Samaliya na seuta Ahabu hamwenga na welekwa wakwe. Yelusalemu naniuse saviya mntu akusa sahani isuntigwe na kuigubika. 14Naniwase awantu wangu nawasigale naniwenkize kwa wankondo wawo chani wawahude, na kutaha isi yawo. 15Naniwadamanyize ayo yose kwaviya wakola masa kulongozi kwangu na kunijela maya kukongela wadalahala wawo walaile Misili kubula vino dyelo.” 16Vikaheza ivyo, ukaleka amasa yakwe awahosize awantu wa Yuda wakole masa kulongozi kwa Zumbe Chohile, iviya Manase kakoma wantu walozize hewene masa, sakame yamemaga kulawa ntendele imwenga kubula ntendele ntuhu ya Yelusalemu. 17Ntendwa ntuhu zidamanywe ni Manase hamwenga na amasa yakwe yose ziwandikwa mwechitabu cho Lukumbusa lwa amaseuta wa Yuda. 18Manase kabanika na kuhambwa mwechibuta chimweidizumba dyakwe dye chiseuta chidamanywe ni Uza. Ivyo mwana ywa Manase akwitangwa Amoni niyo atenda seuta.

Seuta Amoni ywa Yuda

2Mihilimo 33:21-25

19Amoni endaga na mihilimo milongo midi na midi umo akakonga kulongoza. Kalongoza uko Yelusalemu kwa mihilimo midi. Zina dya nine naketangwa Meshulemeti mchiche ywa Haluzi kulawa komzi wa Yotiba. 20Amoni kadamanya mbuli za wavu kulongozi kwa Chohile, saviya adamanye ise Manase. 21Katimila lujendo lose lwa ise kavikila matukulu ayadya ise avikile na kuyafikila madi. 22Kalemela kutimila izisila za Zumbe Chohile ywa wakale wakwe, hatozize imiko ya Zumbe Chohile. 23Nyumani awandima wakwe niyo wadya njama wamkomela mwe idizumba dyakwe dye chiseuta. 24Mna wantu wa Yuda niyo wawakoma awantu wose wamkomile Amoni. Vikaheza wantu awo niyo wamsagula Yosiya mwana ywa Manase atende seuta. 25Mbuli ntuhu zose adamanye Amoni ziwandikwa mwechitabu cho Lukumbusa lwa amaseuta wa Yuda. 26Amoni kahambwa mwe izimbila mwe ichibuta cha Uza, vikaheza mwanawe akwitangwa Yosiya niyo atenda seuta ise eze abanike.