Maseuta 22

Seuta Yosiya ywa Yuda

2Mihilimo 34:1-2

1Seuta Yosiya endaga na mihilimo mnane umo akakonga kulongoza uko Yelusalemu, niyo alongoza kwa mihilimo milongo mitatu na umwenga. Nine naketangwa Yedida mchiche ywa Adaya, mwikazi ywo umzi wa Bosikati. 2Yosiya kadamanya mbuli zedi zimwelele Zumbe Chohile. Katongela mligano wa seuta Daudi amlongwele na kutoza imiko ya Zumbe Chohile kwa kukaulisa.

Chitabu cha sigilizi chabunkulwa

2Mihilimo 34:8-28

3Mo mhilimo wa mlongo na mnane wo ulongozi wakwe, seuta amsigilaga mta kuwandika mbuli zakwe, Shafani mwana ywa Azaliya, mwezukulu ywa Meshulamu, aite kwe Idihekalu dya Zumbe Chohile, akamgamba, 4“Hita kwa mlavyantambiko mkulu Hilikiya mgambe awaze ziya izihela zigalwe mwe Idihekalu dya Zumbe Chohile izo zichisanywe ni wata kuchimaila kulawa kwa awantu. 5Wagambile wazinkize izihela izo kwa awantu wasagulwe kuchimaila indima ye Idihekalu dya Zumbe Chohile. Walagize awantu awo wawalihe awandima wakuzenga uhya Inyumba ya Zumbe Chohile, 6kugamba wakusongola na wazesi na wambizi wawo. Naho wagambile wagule mbao na mayuwe yasongolwe kwa ndima ya kuzenga uhya inyumba. 7Wantu wakuchimaila uzesi wasekutigizwa walavye uwazwa wajeseze izihela nawenkigwe, kwaviya wazijeseza kwa ukanuni.” 8Vikaheza mlavyantambiko mkulu Hilikiya niyo amgamba Shafani mta kuwandika, “Sichipata Ichitabu che Izisigilizi mwe Idihekalu dya Zumbe Chohile.” Hilikiya niyo amwinka Shafani icho ichitabu, uyo niyo achisoma. 9Shafani mta kuwandika niyo ambasa seuta akumgambila ulosi uwo, amgamba, “Wandima wako walavya izihela zilondolwe mwe Inyumba ya Zumbe Chohile naho wazinkiza kwa awazesi wakuchimaila kuzenga uhya Inyumba ya Zumbe Chohile.” 10Vikaheza Shafani mta kuwandika amgamba seuta, “Hilikiya mlavyantambiko kaninka chitabu.” Shafani niyo achisoma kulongozi kwa seuta. 11Seuta eze eve ulosi uwandikwe mwechitabu che Isigilizi niyo atatula izisuche zakwe, 12seuta niyo awalagiza, Hilikiya mlavyantambiko na Ahikamu mwana ywa Shafani na Akiboli mwana ywa Mikaya na Shefani mta kuwandika na Asaya mndima ywa seuta awagamba, 13“Hitani mkamuze Zumbe Chohile ulangilizi kwachausa changu na kwachausa cha awantu wose wa Yuda mwembuli ziya ziwandikwe mndani mwechitabu chino chiwoneke. Zumbe Chohile anase kuchiwonela maya suwe, kwaviya watati zetu hawatimile imilosi ye ichitabu chino, hawadamanye kuligana na mbuli zose ziya ziwandikwe umo zikuchilanga suwe.” 14Ivyo, mlavyantambiko Hilikiya na Ahikamu na Akiboli na Shafani na Asaya waita wakulosana na muwoni mvyele akwitangwa Huluda, uyo endaga mkaza Shalumu, mwenawe dya Tikwa, mwezukulu ywa Halihasi mta kutunduliya izisuche ze Inyumba ya Chohile. Ichipindi icho, Huluda nendile akekala komzi wa Yelusalemu mwe ikaya ya kaidi. 15Niyo amgamba, “Vino nivyo akulonga Zumbe Chohile ywa Izulaeli, mgambile uyo mtu awatumileni kwangu, 16Zumbe Chohile agamba, nanigale nkomano ahantu hano na kwawekazi wakwe saviya viwandikwe mwechitabu chino chisomigwe ni seuta ywa Yuda. 17Kwaviya wanileka naho wavunkiziza ubani milungu mituhu, ivyo wanisonga maya kwa ndima zose ze imikono yawo, amaya yangu nayemuke mwa awantu wa Yelusalemu naho hahana nadahe kuyachinda. 18Mna kumlanga seuta ywa Yuda awatumileni mwize muze ulangilizi kwa Zumbe Chohile, vino nivyo Zumbe, Chohile ywa Izulaeli akulonga mwembuli wivile. 19Kwaviya kwiva viya nilongile kulanga ahantu hano, kugamba awekazi wakwe nawaligitwe na kwasigwa wachiwa, niyo weila na kunyanyahala kulongozi kwangu na kutatula izisuche zako elo, miye nami sikwiva chiya ulombeze, 20ivyo nkomano hunga nigale mwa awekazi wa Yelusalemu hoziwone, nanigoje unde kubanika uhambwe kwa utondowazi.” Walosi awo niyo wakumgambila seuta ulosi uwo.