Maseuta 23

Yosiya adamanya lagano uhya

2Mihilimo 34:3-7, 29-33

1Vikaheza seuta Yosiya niyo egala wantu, wamchisanyiza vilongozi wose wa Yuda na wa Yelusalemu. 2Niyo seuta aita kwe Inyumba ya kumvila Zumbe Chohile hamwenga na awantu wose wa Yuda na wekazi wose wa Yelusalemu walavyantambiko na hamwenga na wawoni, wantu wose wakulu na wadodo. Niyo awasomela ulosi we ichitabu che idilagano chibwilwe mwe Inyumba ya Zumbe Chohile. 3Vikaheza seuta niyo achimala hajihi ne inguzo aika ndagano kulongozi kwa Zumbe Chohile, amtimile Zumbe Chohile, kutoza malagizo yakwe viya akunga mo moyo wakwe ne iloho yakwe yose kudamanya ulosi wakwe wose we idilagano yawandikwe mwe ichitabu icho, wantu wose niyo walungana mo kwika indagano.

4Yosiya niyo amlagiza mlavyantambiko mkulu Hilikiya na walavyantambiko wambizi wakwe na wamizi wo lwivi walavye vintu vyose nendile vikigwe kwe Inyumba yo kumvikila ya Zumbe Chohile, vidamanywe kwa chausa cha mnungu Baali, na Ashela na kwa chausa cha vintu vya mo ulanga. Niyo avitikimya kuse komzi wa Yelusalemu kwe idikolongo dya Kiduloni na kuyaguha amaivu ayo na kuyegala kubula Beteli. 5Niyo awausa walavyantambiko wose wasagulwe na maseuta wa Yuda kwa kuvunkiza ubani hantu ho kuvikila mwe mizi ya Yuda na kuzunguluka Yelusalemu. Naho wadya wose wavunkize ubani kwa Baali, zuwa na mnenge naho ntondo na ivintu vya moulanga mwe Inyumba ya Zumbe Chohile. 6Niyo ausa iditukulu dya Ashela kulawa kwe inyumba ya Zumbe kuse kwa Yelusalemu, niyo adigala kwa akamto ka Kiduloni. Uko niyo aditikimya dyatenda maivu, amaivu yakwe niyo ayafilisa mlanga mwe izimbila za wantu. 7Niyo atula izinyumba za wagosi wachilanga zendile mwe Inyumba ya Zumbe Chohile, hantu wavyele nawasuma mapaziya ya Ashela mnungu mvyele. 8Niyo awachisanya walavyantambiko wose kulawa kwe mizi ya Yuda na kuwegala Yelusalemu. Niyo abalanga izimazabahu zo kuvunkiza ubani kulawa Geba kubula Balisheba. Niyo atula imazabahu yendile ntendele ya kumoso kolwivi lo mzi kwe izinyivi zendile zikwesila yo kwingilila kolwivi lwa Yoshuwa chilongozi ywo umzi. 9Walavyantambiko awo hawalekelwe wasankane mwe ndima yo ulavyantambiko mwe imazabahu ya Zumbe Chohile uko Yelusalemu, mna wadya imikate heigwaduswe wenkigwe ni walukolo wawo walavyantambiko.

10Seuta Yosiya niyo abalanga ahantu ha kuvikila milungu yo udanti hakwitangwa Tofesi kwedikolongo dya wana wa Hinomu, chani mntu yoyose asekumtikimya mwanawe ywa chilume hegu mchiche ywakwe atende ntambiko kwa mnungu Moleki. 11Naho ausaga izifalasi izo zendile zikajesezwa ni maseuta wa Yuda mwe kuvikila mnungu zuwa, iviya katikiywa amalingisha na wakajesaza mwe imiviko iyo. Falasi izo na amalingisha ayo yaikagwa homwingilo we inchili ye Inyumba ya Zumbe Chohile, naho nendile ni hajihi ne ichumba nakekala Nasani Meleki yumwe mwe vilongozi wakulu. 12Imazabahu yazengigwe ni maseuta wa Yuda mlanga mwe idihala dye ichumba cha kulanga cha Ahazi, hamwenga ne imazabahu izengigwe ni Manase mwe izinyuwa izimbili ze Inyumba ya Zumbe Chohile. Kayatula niyo ayatiginta, malumbi yakwe niyo ayadula kwa kamto ka Kiduloni. 13Naho nakabalanga hantu hakuvikila ntendele ya ulailo wa zuwa wa Yelesalemu na ntendele yo ulugulu lwo ubanasi, hantu seuta Solomoni ywa Izulaeli azengile kwa chausa cha mnungu Asitaloti ihizo dya Wasidoni na Kemosi ihizo dya Wamoabu, naho kwa chausa cha Milikomu ihizo dya Waamoni. 14Nguzo kazitula vihandehande, naho tukukulu dya Ashela niyo achikantakanta, hantu hachimaliswe amatukulu ayo niyo ahajela uzavu kwa kumemeza mavuha ya wantu.

15Naho kudya Beteli niyo abalanga hantu hakuvikila hazengigwe ni seuta Yeloboamu mwana ywa Nebeti awahosaga awantu wa Izulaeli wakole masa. Imazabahu iyo kaibalanga, mayuwe yakwe niyo ayatulatula vihandehande, kavihondahonda vyatenda malumbi, iditukulu dya Ashela niyo aditikimya. 16Vikaheza, Yosiya eze ahituke niyo awona mbila mlanga mwe kagulu. Niyo alagiza mavuha mwe izimbila izo yafukulwe, niyo ayatikimya mlanga mwe imazabahu. Kwa kudamanya ivyo aijelaga uzavu imazabahu isekuwagila kuvikila kuligana na ulosi wa Zumbe Chohile ulongigwe ni mtu ywakwe, muwoni alotelaga ivyo navilaile. 17Niyo seuta auza, “Idya imbila huwona izengelwe kudya ni ya yuhi?” Wantu wo mzi uwo niyo wamhitula, “Ni mbila ya mntu ywa Zumbe Chohile ezaga kulawa kweisi ya Yuda niyo alotela yadya yose udamanye mwe imazabahu yo kulaviza intambiko uko Beteli.”

18Seuta niyo alagiza. “Yaseni ivyo ili, mntu yoyose asekusa amavuha yakwe.”

Ivyo, amavuha yakwe niyo wayasa ahadya, hamwenga na amavuha ya muwoni alawaga Samaliya.

19Mwe chila mzi wa Samaliya seuta Yosiya niyo ahajela uzavu ahantu hokuvikila milungu ya udanti hazengigwe ni maseuta wa Izulaeli, ivyo vileka wamjele maya Zumbe Chohile. Izimazabahu zose izo kazibalanga saviya adamanye kudya Beteli. 20Yosiya niyo awakomaga awalavyantambiko wose we imilungu yo udanti mlanga mwe izimazabahu zawo wenye, mavuha yawo niyo ayatikimya mlanga mwe izo izimazabahu. Akaheza niyo auya Yelusalemu.

Yosiya adamanya lukumbusa lwa ngasu ya Pasaka ya kulawa Misili

2Mihilimo 35:1-19

21Vikaheza seuta Yosiya niyo alagiza awantu wose, awagamba, “Damanyani ngasu ye Pasaka kwa kumtunya Zumbe Chohile, Chohile ywenyu saviya viwandikwe mweichitabu chino chibunkulwe kwe Inyumba ya Zumbe Chohile.” 22Hahana Pasaka ivinigwe saviya ino kukongela ichipindi cha walamuzi wawalongoze Waizulaeli hegu ichipindi cha maseuta wa Izulaeli hegu wa Yuda. 23Ivyo mo mhilimo wa mlongo na mnane wo ulongozi wa Yosiya, Pasaka yo kumtunya Zumbe Chohile ivinilwa uko Yelusalemu.

Mbuli ntuhu adamanye seuta Yosiya

24Naho, seuta Yosiya awausaga wasai na walotezi na milungu na matukulu ya milungu hamwenga na viya vituhu vijeseze kuvikila milungu ya udanti. Chani ajese izisigilizi zose ziwandikwe mweichitabu chibunkulwe ni mlavyantambiko mkulu Hilikiya kwe Inyumba ya Zumbe Chohile, 25Umo Yosiya henati kutenda seuta na hata aho akomelezaga kutenda seuta hahalaiga seuta yoyose enga yeye, amsankanile Zumbe Chohile kwa moyo wakwe wose na nguvu zakwe zose na loho yakwe wose kuligana ne isigilizi ya Musa.

26Mna Zumbe Chohile halekile ukali na maya yakwe yalozize kwa awantu wa Yuda kwaviya seuta Manase adamanyaga ntendwa zilozize zimjeile maya Zumbe Chohile. 27Zumbe Chohile niyo agamba, “Naniwabalaze awantu wa Yuda kulawa kulongozi kwangu saviya nidamanye mwa awantu wa Izulaeli. ‘Naniulemele umzi wa Yelusalemu nasagule hadya nagambaga wantu nawanivikile miye momzi umo.’”

Udumo wo ulongozi wa seuta Yosiya

2Mihilimo 35:20-36:1

28Mbuli ntuhu zose adamanye Yosiya, ziwandikwa mweichitabu cho Lukumbusa lwa amaseuta wa Yuda. 29Mo ulongozi wa Yosiya, seuta Neko ywa Misili nakaita kubula ko mto wa Fulati wakadugane na seuta ywa Ashulu. Mna seuta Yosiya niyo aita akatowane naye, seuta Neko ywa Misili eze amuwone seuta Yosiya niyo amkomela uko Megido. 30Wandima wakwe wakulu niyo wenula ichimba chakwe mwe idilingisha wachivuza Yelusalemu uko niyo wamhamba mwe imbila yakwe mwenye. Wantu wa Yuda niyo wamguha Yohazi mwana ywa Yosiya, wamhaka mavuta wamwika atende seuta ise eze abanike.

Seuta Yohazi ywa Yuda

2Mihilimo 36:2-4

31Yehoahazi endaga na mihilimo milongo midi na mitatu akakonga kulongoza, kalongoza chipindi cha myezi mitatu akatenda Yelusalemu. Nine naketangwa Hamutali mchiche ywa Yelemiya mwikazi ywo umzi wa Libina. 32Yehoahazi niyo adamanya yehiye kulongozi kwa Zumbe Chohile saviya vyose wadamanye wababa zakwe. 33Chani asekujendeleza kulongoza akatenda Yelusalemu, seuta Neko ywa Misili nendile kamfunga uko Libila kwe isi ya Hamati, niyo awalihiza kodi awantu wose wa Yuda chilo elufu ntatu na magana mane za mayuwe ya chumbu na chilo milongo mitatu na nne za zahabu. 34Neko seuta ywa Misili niyo amwika Eliakimu mwana ywa seuta Yosiya atende seuta hantu ha ise Yosiya, Niyo ahituila idizina dyakwe amwitanga Yehoyakimu. Mna niyo amguha Yohazi amwigala hale kubula Misili niyo abanikila uko.

Seuta Yehoyakimu ywa Yuda

2Mihilimo 36:5-8

35Yehoyakimu niyo amwinka mayuwe ya chumbu na zahabu seuta ywa Misili, awalihiza kodi awantu, chani ajese viya akunga seuta ywa Misili kwa kwinkwa hela. Kawalihiza hela na zahabu. Chila yumwenga nakalavya kuligana na ivyo seuta alagize, niyo amwinka Neko seuta ywa Misili.

36Yehoyakimu kakonga kulongoza akatenda na mihilimo milongo midi na mishano, kalongoza chipindi cha mihilimo mlongo umwenga na umwenga akatenda Yelusalemu. Zina dya nine naketangwa Zebida mchiche ywa Pedaya mwikazi ywa mzi wa Luma. 37Yehoyakimu niyo adamanya yehiye kulongozi kwa Zumbe Chohile sayadya yose wadamanye wakale wakwe.