Maseuta 24

1Mo useuta wa Yehoyakimu, Nebukadineza seuta ywa Babeli ayebunga isi ya Yuda. Yehoyakimu kakunduganywa atenda mndima ywa seuta Nebukadineza kwa chipindi cha mihilimo mitatu, vikaheza niyo aleka kumwetegeleza amhituka. 2Zumbe Chohile niyo amwigaila mabunga ya manyakwili wa Wababeli na manyakwili wa Alamu na manyakwili wa Wamoabu na manyakwili wa Amoni wayebunge isi ya Yuda na kuibalanga, kuligana na ulosi wa Zumbe Chohile alongile kujinkila wandima wakwe wawoni. 3Mbuli izo niyo zalaila mwe isi ya Yuda chindedi kwa lagizo dya Zumbe Chohile, chani awasamize kulongozi kwakwe kwa masa akoile seuta Manase na mbuli zose adamanye, 4naho seuta Manase kahosa wantu hewena lema wakomwe uko Yelusalemu. Masa ayo Zumbe hamlekeile.

5Elo, ntendwa ntuhu na mbuli zose adamanye Yehoyakimu yawandikwa mwechitabu cho Lukumbusa lwa amaseuta wa Yuda. 6Yehoyakimu niyo abanika mwanawe akwitangwa Yehoyakini niyo alongoza ise eze abanike.

7Seuta ywa Misili na awagomba nkondo wakwe hawafosize vituhu mwe isi yawo, kwaviya seuta ywa Babeli nakaziguha izisi zose nazikalongozwa ni seuta ywa Misili aho nkongo kukongela kwa kamto ka Misili kubula komto wa Efulati kaitende itende yakwe.

Seuta Yehoyakini ywa Yuda

2Mihilimo 36:9-10

8Yehoyakini kakonga kulongoza akatenda na mihilimo mlongo umwenga na mnane. Kalongoza uko Yelusalemu kwa myezi mitatu. Nine naketangwa Nehusita, mchiche ywa Elinatani mwikazi ywa Yelusalemu. 9Yehoyakini kadamanya yehiye kulongozi kwa Zumbe Chohile saviya adamanye ise.

10Chipindi icho wagomba nkondo wa Nebukadineza seuta ywa Babeli, niyo wawebunga umzi wa Yelusalemu niyo wautandama. 11Chipindi awankondo wa Nebukadineza wakautandama umzi, Nebukadineza mwenye niyo abula Yelusalemu, 12Yehoyakini seuta ywa Yuda hamwenga na nine niyo wenula mikono na kwita wenye kwa seuta ywa Babeli, wandima wakwe, wakulu na vilongozi wa wagomba nkondo wakwe. Seuta ywa Babeli niyo awegala saviya watahigwe mo mhilimo wa mnane wo ukulongoza kwakwe. 13Naho saviya Zumbe alongile, Nebukadineza niyo aguha ugoli wose nendile wimwe Inyumba ya Zumbe Chohile, na mnyumba mwe idizumba dye chiseuta. Niyo atulatula ivintu vyose vya zahabu vyadamanyagwa ni seuta Sulemani ywa Izulaeli. Viya ivyo nendile vimndani mwe inyumba yo kumvikila Zumbe. 14Kawaguha awantu wose kulawa Yelusalemu na kuwegala ko usamizo, wakulu wose na wantu wose wendile wakankalu na wafungwa elufu mlongo umwenga na mafundi wose na wafuwa vyuma. Hahana asigale, wadya wendile wachiwa vitendese mwe isi nawo wasigale.

15Kamwigala Yekoniya hamwenga na nine dya seuta kubula Babeli wavyele wa seuta, wakulu wa wagomba nkondo wakwe, na wakulu we isi wose. Awo kawalavya Yelusalemu na kuwegala ko usamizo uko Babeli. 16Nebukadineza aguhaga wantu wakankalu wa Yuda, mligano wawo ni wantu elufu mfungate hamwenga na mafundi wakankalu na wafuwa vyuma elufu imwenga, wose awo nendile ni wantu wata nguvu naho wakudaha kugomba nkondo.

17Nebukadineza niyo amwika Mataniya mlukolo ywa ise dya Yehoyakini atende seuta hantu hakwe, zina dyakwe niyo adihitula amwitanga Sedekiya.

Seuta Sedekiya ywa Yuda

18Sedekiya endaga na mihilimo milongo midi na umwenga umo akakonga kulongoza, kalongoza kwa chipindi cha mihilimo mlongo umwenga na umwenga uko Yelusalemu. Nine naketangwa Hamutali mchiche ywa Yelemiya, mwikazi ywa mzi wa Libina. 19Seuta Sedekiya kadamanya yehiye kulongozi kwa Zumbe Chohile saviya adamanye seuta Yehoyakimu. 20Zumbe Chohile niyo awawonela maya vitendese awantu wa Yelusalemu na Yuda, niyo awabalaziza hale naye.