Maseuta 25

Kwebungwa na kubalangwa komzi wa Yelusalemu

1Sedekiya ni amhituka seuta Nebukadineza, mwe idizuwa dya mlongo mo mwezi wa mlongo, mhilimo wa chenda wo ulongozi wa Sedekiya, Nebukadineza seuta ywa Babeli hamwenga na awagomba nkondo wakwe wabulaga komzi wa Yelusalemu niyo wawebunga, wautandama wakaheza wauzengela ngome. 2Mzi uwo ujendeleza kwebungwa kubula mo mhilimo wa mlongo na umwenga wo ulongozi wa seuta Sedekiya. 3Mwe idizuwa dya chenda dyo mwezi wa kane niyo gumbo dyatendesa mo mzi, nendile hemwina nkande kwa awekazi wakwe. 4Niyo waponkola langa mwe ichiwambaza cho umzi, nechilo seuta na wagomba nkondo wose niyo wasumka kujinkila kolwivi lwendile hagati gati heviwambaza vidi, niyo waita ntendele za Alaba, hatahegu Wababeli nendile wautandama umzi. 5Mna awagomba nkondo wa Babeli niyo wambasa seuta wamtaha kwe dikolongo dya Yeliko, wagomba nkondo wakwe wose niyo wamwasa watimkana. 6Elo Wababeli niyo wamtaha seuta, wamwigala kwa seuta ywawo uko Libila, naye niyo amkantila. 7Vikaheza niyo wawakoma wana wa Sedekiya kulongozi kwakwe, yeye wamtula ameso yakwe. Uhelo wakwe niyo wamnyinya minyolo wamwigala Babeli.

Inyumba ya Chohile yabalangwa

Yelemia 52:12-23

8Mwe idizuwa dya mfungate, mo mwezi wa shano, mo mhilimo wa mlongo na chenda wo useuta wa Nebukadineza seuta ywa Babeli.

Nebuzaladani chilongozi ywa wamizi wa seuta nakengila Yelusalemu. 9Niyo ayoka Inyumba ya Zumbe ne idizumba dya seuta ne izinyumba zose za Yelusalemu, chila nyumba nkulu kayoka. 10Wagomba nkondo wose wa Babeli nendile wehamwenga na mkulu ywa wagomba nkondo ywa wamizi wa seuta niyo wabogozola iviwambaza zizunguluke umzi wa Yelusalemu. 11Nebuzaladani, mkulu ywa wagomba nkondo wa seuta niyo awasamiza awegala ko usamizo awantu wendile wasigale ko mzi na wadya wose nendile wenule imikono wenye kwa seuta ywa Babeli hamwenga na wantu watuhu wose. 12Mna yudya sekulu ywa awagomba nkondo kawasa wantu wasiku wachiwa vitendese mwe isi chani watundulie imizabibu na kulima izinkonde. 13Wantu wa Babeli niyo wazitula vihandehande izinguzo ze shaba nendile zikwe Inyumba ya Zumbe Chohile, hamwenga na chegamilo che bilika kulu dititu dya shaba nendile dimwe nyumba ya Zumbe Chohile, shaba waiguha waigala Babeli. 14Naho wegala nyungu na makulega yakusiza maivu na mikasi ya kukantila utambi na viya vya shaba vijesezwe mwe Inyumba ya Zumbe Chohile. 15Niyo wegala vyetezo na mabakuli. Mkulu ywa wagomba nkondo wamizi wa seuta niyo avigala Babeli viya vyose vya zahabu na vya mayuwe ya chumbu. 16Shaba yose seuta Sulemani azengele ziya izinguzo izimbili na diya idibilika na vyegamo vyakwe kwachausa che inyumba ya Zumbe Chohile havidahike kuhimwa uzami wakwe. 17Chila nguzo nendile ina utali wa futi milongo midi na mfungate na halanga hakwe nendile hana ntumba ya shaba ntitu. Utali wa chila ntumba nendile futi nne na nusu. Chila ntumba naizungulusizwa mpambo za makomamanga, yose ya shaba ntitu.

Watu wa Yuda wegalwa ko usamizo uko Babeli

Yelemia 52:24-27

18Vikaheza, mkulu ywa wagomba nkondo wamizi wa seuta niyo amtaha Selaya muwoni mkulu na Zefaniya muwoni ywa kaidi na wamizi watatu we Inyumba ya Zumbe Chohile. 19Nakaguha mkulu yumwenga momzi achimaile wantu wa nkondo, hamwenga na wantu washano mwe wadya wakuchimala kulongozi kwa seuta, iviya kamguha mta kuwandika ywa mkulu ywa wagomba nkondo uyo atunduliye ulukumbusa lwa wagomba nkondo hamwenga na wantu wamanyikise milongo mtandatu abwile komzi wa Yelusalemu. 20Nebuzaladani sekulu ywa wamizi kawaguha awantu awo niyo awegala kwa seuta ywa Babeli uko Libila. 21Nebukadineza seuta ywa Babeli niyo alagiza awantu awo watoigwe na kuwakoma uko Libila mwe isi ya Hamati. Ivyo wantu wa Yuda niyo wegalwa ko usamizo hale neisi yawo.

Gedaliya atenda chilongozi ywa Yuda

22Seuta Nebukadineza ywa Babeli niyo amguha Gedalia mwana ywa Ahikamu mwezukulu ywa Safanu, atende seuta ywa wantu wose wa Yuda hewegalwe Babeli. 23Vikaheza amasekulu wose wa awagomba nkondo hamwenga na awantu wawo weze weve kugamba seuta ywa Babeli kamsagula Gedaliya atende chilongozi, niyo wambasa Gedaliya uko komzi wa Misipa. Wantu awo wendaga ni Ishimaeli mwana ywa Netaniya na Yonahani mwana ywa Kaleya na Selaya mwana ywa Tanihumeti kulawa komzi wa Netofa na Yezaniya kulawa komzi wa Maaka, hamwenga na awantu wawo. 24Gedaliya niyo elisa kulongozi kwawo na awantu wawo, agamba, “Msekuwogoha maseku wa Wababeli. Ikalani mweisi naho msankanileni seuta ywa Babeli, mbuli zenyu naziwachumileni.” 25Mna mwezi wa mfungate Ishimaeli mwana ywa Netaniya mwezukulu ywa Elishama endaga ywa lukolo lwa chiseuta niyo eza kwa Gedaliya na wantu mlongo umwenga na kumkoma Gedaliya hamwenga na wantu wa Yuda na Wababeli wendaga naye uko komzi wa Misipa. 26Vikaheza, wantu wose wahwele mweisi ya Izulaeli wakulu kwa wadodo hamwenga na masekulu wa wagomba nkondo, wahalawa waita Misili, kwaviya nendile wakawogoha Wababeli.

Yehoyakini alekelwa mwechifungo

Yelemia 52:31-34

27Mo mhilimo udya atendaga seuta ywa Babeli, ni alagisa wedi kwe seuta Yehoyakini ywa Yuda, kwa kumlekeila kulawa kwechifungo. Idyo dyendaga zuwa dya milongo midi na mfungate mo mhilimo dyo mwezi wa mlongo na mbil, mhilimo wa milongo mitatu na mfungate umo Yehoyakimu aguhigwe kwigalwa ko usamizo. 28Kalosana naye vyedi niyo amwinka luhenyo lwa ntunyo kujinka maseuta wose wendaga hamwenga naye uko Babeli. 29Ivyo, Yehoyakini niyo avika suche ntuhu ukaleka ziya za kwechifungo. Mazuwa yose nkande yakwe nendile akadya kwa seuta. 30Naho chila zuwa seuta nendile akamwinka Yehoyada viya akunga mazuwa yose yo wikazi wakwe.