Titusi 2

Aniau vetindija pai nie umaja pasi

1Vape au, Titus, tuopana aniau vetindija pai. 2Buono kavo sanepaja maso mua veve baba pasia, ave setawan sene tarai pasi, sesamuai sanepaja vetindija e setenam ariri siniotu vesamuai tatuana. Sia ma nari sesanemitiar Kristus vei vea, sesanemipai tutiri sane vetutira e setanota vea nana sene marior veter sia pasi. 3Toapa jana kota, buono kavo sanepaja maso vavi baba pasia ave amamo sene tenam pasi sive sren, ariri siniotu veve ari maso Allah. Kasa sesisiajara siniotu vevesiei va, e kasa setunu sua va. Nari setaniniau vava viate pasi, 4tutiri toapa jana, diadi so setadidini vavi vavoru pasia, ave sesanemipai sesawami pasia tutir sene atuma pasia, 5setenam na sanepaja vetindija pai, tutiri sene tenam pasi sive sren e senanari ariri sene anio raro pasi tutiri vesie e setatuana sesawami pasia. Tutiri toapa jana mamo, esia kasa sesisiajara Allah nie Kavo pai va.

6Tojana kota, buono kavo sanepaja maso mua vavoru pasia ave amamo setawan sene tarai pasi nana pi vura. 7Nana vava saserai mamo, vue ria nana buai viate pai. Nana rabua bueniniau siniotu pa mamo, nuenaripi to tindija mo, e vevata. 8Bueniniau nana kavavo sanepaja vetindija pai, nari siniotu sisiajara au va, ave amamo siniotu vio variriwi tutir au pasia semamaja, aso varo vava vekariria sesamuai e senggavora nanapi tata.

9Au ma buono kavo sanepaja maso veve womi pasia, setatuana sene tuan pasia, e setono sane vesieni maso sia nana pi vura. E senggavo nendiwa va, 10e setamanana pi va. Vape setoisara toapa setenam nana buai viate pai tutiri senggor usara tawana, ave amamo nana sene buai jani, siniotu sesanandik aniau nanapi Allah Vekor Vesie maso tata pai.

11Aso Allah vieruana nie sanepaja pai to manau, nanapi kior vesie pai maso siniotu pasi vura pa. 12Allah nie sanepaja pai diedidin tata, ave tane tenam pasi siovavera Allah nie majar pai vape moja e tanda usara dunia nei nie majar pai vape moja. Allah dieniniau tata ave amamo tatenam nana dunia nei tutiri tanduini tatawan tane tarai pasi e tatenam to tindija, e tanggor usara maso Allah. 13Nine ma tata ne tatanota raria tasanemitiara pai; Raria jani ma dunia nei nari siejo Yesus Kristus riama na sasaar pimasa pai, andina Allah vebaba mo pai e Raja vekor Vesie maso tata pai. 14I ma diono Nie tarai pai maso tata to manau ave tataisu vurusu kariria pasi vura, e dionae tambe sren, e tambe nie kaiwasa vea, tutiri tasanemi vesie tananari pi viate pai.1

15Tuopana pi ninesi vura, e buono kavo sanepaja, e kuevo suara so kaiwasa viadiawa au pasia tutir paja pai nana Allah. Buonae esi dietor e sanetura au vape moja.