Skip to content
BibleKenya

Alkitab Bahasa Wondama

Titusi 3

Kavo sanepaja nanapi tenam siniotu Kristen

Buono kavo sanepaja so nomu kaiwasa na kuaruvi vesanemitiar pasia, ave amamo setatuana maso veveru e veve baba na pareta pasia, senggor usara e senda ariri nanaripi viate pasi vura. Tuopa maso sia, ave sesisiajara vape moja, kota sembaririwi va, vape tawana setenam na buai viate pai e senanaripi tutiri mariat so kaiwasa vura. Aso matau tata kota, papo pa tanganggau, tanda sasara e tanggor usara va. Tambe womi so pi saserai vura na sane vesie e sanepaja nana dunia nei. Papo pa tatenam tutiri sanepaja nganggau pai e sane kariria pai, tutiri tamadidi vavera pa. Vape Allah, vekor Vesie maso tata pai vieruana nie sanepaja pai e viate pai maso tata. Nana rabua jana Allah diono Vesie pai maso tata to manau, aso tananari pi viate pesa to manau pana va, vape aso matauni sanepai tata pana. Diono vesie pai maso tata nanapi Wainunu Sren pai, andi diono avi riwanea pai e diono tenam vavoru pai maso tata, nanapi rioisi rurana tasanemi pasi pa. Allah diono nie Wainunu Sren pai maso tata nanapi Yesus Kristus, Raja Vekor Vesie maso tata pai, ave amamo nanapi Yesus nie sanepaja pai, tatono ate riwanea tutiri Allah e tasamuai tenam viaworoi mo, ariri tapir sanetiar soa pai. Kavo nine ma vevata mo.

Isanemi vesie, kuevo vava ninesi to karakuai, ave amamo siniotu vesanemitiar maso Allah pasia setosasera vevata ave senanari nanaripi viate pasi e sikor viate so siniotu vura. Vape vue kasau nomu tarai pai vurusu kavo vavera veve vata va pasi, topanusara sano usapui, variriwi e vemamu vavera nanapi hukum Torat pai. Pi jasi vura ma sive vata va e sikor vesie va. Siniotu vevediajarae tamasiepar nana kuaruvi vesanemitiar pai ma, tindija mamo kuevo suari ve siri pivai ve muandu. Manau mamo vue maneta tutiri ea vape moja. Ruini toapa siniotu vetoapa jani ma kieriria mo e nie tatar pasi siveruana vie sasara.

Kavo vioisara vemanau pasi

Nana rabua nari jemias Artemasi, pivai Tikhikusi maso au mamo, buosasera ave saira ruama so jau nana Nikopolis, aso ikutu so imasoi nana uta wana na rabua riewas pa.1 Buosasera to vesie mo ave sanepai Zenasi, siniotu veruini hukum pai, tutiri Apolosi, ave amamo piesa mandi nanapi sune rara pai va.2 Tane siniotu vesanemitiar pasia, ave setaniniau senanari pi viate pasi, ave sesanemipai siniotu vevesiei vevaro pi pasia, ave amamo nanaripi jani nari dionae sene tenam pasi siete.

Maneta venana nine sia vura tutiri jau, amatanatu tabea maso au. Tuopana amane tabea nei maso tane maneta vesanemipai tata pasia nana sanetiar pai.

Ive nadi maso Syen ave diono vesie pai maso mambeneta pasia vura.

Source notes (2)
  1. Cross-reference Kis. 20:4; Ef. 6:21-22; Kol. 4:7-8; 2Tim. 4:12
  2. Cross-reference Kis. 18:24; 1Kor. 16:12

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.