Titusi 1

1Ine atuma panau, Titusi! Nanapi jau, Paulusi, ivui surat ninei ariri Allah nie womi, e ariri Yesus Kristusi nie rasul. Allah diri jau e diemiasa jau, ave isanemipai siniotu Allah diria pasia, ave amamo sepaja nana sene sanetiar pasi. Nari jedidin sia kota, amamo senduin ariri aniau vetindija pai, e senda usara Allah nie majar pai. 2Aniau vetindija pai diono sanetiar maso tata toapa nari tasamuai tenam viaworoi pai. Allah dierere tenam jani to manau, nanapi aja dunia nei vie diadi varami pa, e Allah ma diawi va. 3Nana raria pai miesi pa, Allah vieruana nie kavo pai nana nie arer pai maso tata. Arer jani siwi maso jau to manau, e itopanusari nanapi Allah Vekor Vesie maso tata pai, nie pareta.

4Titusi, ine atuma ni au vevata mo, aso tune sanetiar pa siri vura maso Kristus to manau pana.

Ive nadi ave amamo nari Allah Tatamami pai e Yesus Kristus Raja Vekor Vesie maso tata pai, surono mari ma vesie pai maso au.1

Titusi nie nanaripi pai na Kreta

5Ira vurusu au na Kreta, ave amamo nuenari ariri pi aja vemasi varami pasi. Kota rusasana penatua na kuaruvi vesanemitiar pasia, na bendar pasi vura. E nari sanepai tawana Ine kavo itopana so au to manau pasi. 6Penatua na kuaruvi vesanemitiar pesi mamo, i ma siniotu vene tenam viate, nie vinie pa siri to vea. Nie atuma pasia sesanemitiar maso Kristus to manau. Apa siniotu vevesiei pa kasa sesop nie atuma pasia va aso senanari kariria, e senggambarai setadiawa kavo nana sene baba.2 7Siniotu veveru na kuaruvi vesanemitiar pai ma, siniotu venanari ariri Allah nie nanaripi nina. I ma kasa vie sasara va. I ma kasa sienandiki va, saira e kiesiou va, dunu sua va, diono mamuna va, re pasi sibaba pipi va. 8Vape i ma sane vesie siniotu sendama so nie anio pai, e nari sane pa vesasie nanapi vava viate pasi, nie sanepaja pai tindija, nie sane pa ate, vie sren e piaja so tiawan nie tarai pai. 9I ma nari kior usara aniau vetindija pai, ariri Kristus nie aniau tataniau maso sia to manau. Tutiri toapa jana, diadi so diono kavo sanepaja maso siniotu nanapi aniau vetindija pai, e diadi so kievo suara maso siniotu vekavo vavera Kristus nie aniau pasi.

10Aso siniotu pa sepau, senggor usara aniau vetindija pai va, verawai mo pa siniotu Yahudi verut tawana hukum sunat pasia. Asia setawi vavera siniotu vevesiei pasia, tutir senggavo kavo veve vata va. 11Siniotu vetoapa jasia ma, sesoremi pasi nari sirut tupa pino, aso setono kavo vemanasi va na anio raro vepau, nanapi sene aniau veve vata va pasi. Senanari tojana pa ma, ave amamo sesamuai pipi vepau nanapi vava vekariria pana! 12Mataun sene nabi pesi, vieva nana nu Kreta kota, kievo e diojo, “Siniotu Kreta pasia ma tawana setawitituwa, ariri piaum vemas vianggutu e vekawawaru pasia na.” 13Nabi pai nie kavo pasi ma sive vata. Apavo kuevo suara sia to karakuai ave sesanemitiar vei via nanapi aniau vetindija pai, 14e ave amamo senda usara Yahudi pa sene arami pasi ea vape moja, e senda usara pareta pai nana siniotu vetawa irara aniau vetindija pasia vape moja. 15Maso siniotu vene sane raro veve sren pasia, pi vura sive sren. Vape maso siniotu vene sanepaja veve rariai e vesanemitiar maso Kristus va pasia, piesa imbe sren va, aso sene sanepaja wasi tutir sesanemi raro pasi sive rariai to manau. 16Senggavo toapa senduini Allah, vape sene vava senanari pasi ma seporasa Allah. Sesanemi raro pasi siomadidi, e senggambarai senggorusari. Sia ma kasa senanari pi viate pesa va.