2 Timotiusi 4

1Yesus Kristusi nari riama ea so dunia nei, ave kutu kavo maso siniotu vetenam e vevoru pasia, e I ma nari riama vie pareta ariri Raja. Apavo isau so au mo na aropo Allah e Yesus Kristusi: 2Ariria mamo tuopanusara Allah nie Kavo pai, e tawana buerama vediora nana raria viate pivai vekariria, ave siniotu setadiawasi. Ariria mamo buoisara sene sasara pasi e kuevo suara sia e buonae sene sane raro pasi sikarakuai. Bueniniau siniotu nine sia tutir muenasi vea. 3Aso nari raria pesi mamo, kaiwasa senggambarai setadiawa aniau vetindija pai. Vape sia ma nari senda ariri matau sene majar pasi, e senduir guru pa pau, ave amamo setaniniau vava viate vionae setadiawa nanapi sene taradiau pasi. 4Nari senosa sene taradiau pasi so vava vetindija pai, vape setara sene taradiau pasi so topanusara arami. 5Vape au ma bueriori nomu tarai pai nana vava saserai. Muenasi nana marior pai, nuenari nomu nanaripi pai ariri vetopana Kavo Vesie jani e rua usara nomu nanaripi pai vura ariri Allah nie womi.

6Nanapi ine tarai nei, raria pai riama to manau mamo ja ma nari ivoru ariri pi som maso Allah. Katu esa mamo nari ivavuru dunia ninei. 7Josasera joto mei vesie jani to manau, e isamuai sope vemanau pai. Ikorusara Kristus veito vemanau pai. 8E nine ma vait nana mei pai dienota jau. Nana raria vemanau pai, Syen, andi kutu kavo vetindija mo pai, nari siwi vait jani maso jau, aso itenam tutiri vesie maso Allah pana. E nari imesari isamuai vait jani vea va, vape kaiwasa vura vesanemi vesie vianota Syen ria sovera pasia kota.

Nanapi kavo arer vemanau pai

9Buosasera ave saira ruama so jau, 10aso Demasi vievu vurusu jau to manau, aso sanepai dunia ninei. Ria so Tesalonika to manau. Kretes ria so Galatia, e Titusi ria so Dalmatia. 1 11Lukasi andi miesoi tutiri jau vea. Timotiusi au rua vedioro Markusi vea, e kuori maso jau, aso i ma diadi kiotae nienaripi usara jau nana ine nanaripi nei.2 12Jemiasa Tikhikusi ria so Efesus to manau.3 13Masisi ruama mamo, kuor ine sasu vebatioir ivavura na Troas pai nana Karpusi nie anio pai, e kuor ine surat pasi kota, verawai mo paini ine surat venanari nana piaum rawa pai.4

14Aleksander, siniotu venanari tembaga pai, nienari vava vekariria pa pau vesiri maso jau to manau. Nari Syen sioverasi riwanea maso i ariri vava nienari pasi.5 15Ariria mamo matau au kota, suejo vedioro to vesie, aso i ma kievo irara tane aniau nei mo.

16Na raria ikavo vori jau retena na kuaruvi vekutu kavo pai pa, varo siniotu verama e viosa siwara jau ave kievo vori jau, sia vura senda vurusu jau. Ive nadi ave Allah vie ampun sia. 17Vape Syen diosa siwara jau. Diono paja maso jau, apa diadi so itopana Kavo Vesie pai vetutira, ave siniotu Yahudi va pasia vura, setadiawasi. E itaisu vurusu kariria voru pai. 18E Syen pai nari riera jau vurusu vava kariria vio vetere jau pasi. Nari kior jau tutiri vesie so Nie Kerajaan venana rora wa. Tindija mamo andi siniotu vura sesanandiki to woroi-woroi! Amin.

Paulusi dienatu tabea vemanau pai

19Jenatu tabea maso Priskila tutir Akwila, e maso Onesiforus nie anio raro pai.6 20Erastusi miesoi na Korintus. Trofimusi ma piota pa ira vurusui na Miletusi.7 21Buosasera ave ruama so nine nana aja uta nei riewas varami ne.

Ebulusi, Pudesi, Linusi, tutir Klaudiai e tane maneta sanetiar siri vura na sia kota, setanatu tabea maso au.

22Ive nadi ave amamo Syen tutiri Timotiusi au,

Ive nadi kota ave amamo Syen diono vesie pai maso mia vura!