Markusi 16

Yesus siobatai nana voru pai

(Mat. 28:1-10; Luk. 24:1-12; Yoh. 20:1-10)

1Nana raria Sabat pai kiara to manau pa, Maria Magdalenai e Maria Yakobusi siniani tutir Salomei setoru senda sembori mani vesairara ave sesokiara Yesus nie wominggo pai. 2Nana raria Ari pai, bera vavoru vesiri, nana rabua wor pai sia to manau pa, senda so papi pai. 3Senggavo vavera nana sia e setojo, “Nari teini sanepai tata e kiediduir rovuki pimasa vesiori kamberei papi wai?” 4Vape nana rabua sendama sederiasi so papi pai e sesajo mana rovuki pimasa pai kiediduira to manau. 5Avori sesuapui so papi jani e sesajo siniotu vavoru pesi siesuni nana sasu viaroi vemamara pai e miesoi na rawa vata pa, e setandor. 6Vape siniotu vavoru jani kievo so sia e diojo, “Mematai vape moja! Iruini mia ma mesasera Yesus siniotu Nazaret sepa na aitabat pai. Niana nine va. Tienam riwanea to manau! Ite mesajo uta sepiri nana pa nine. 7Vape nine ma menda, metopana kavo nine raso Nie verausari pasia tutir Petrusi. Metojo, ‘I ma ria papo nana mia so Galilea. Na wana nari mesajori, ariri tiopa maso mia to manau pa’ ”1 8Apavo vavi pa setoru sesuvi nana papi pai avori setapai aso setandor e sematai. Setitopana piesa maso esi kota va, aso sematai pana.

Yesus vieruana nie tarai pai maso Maria Magdalenai

(Mat. 28:9-10; Yoh. 20:11-18)

9Manau na jana pa Yesus tienam riwanea nana voru pai, nana raria Ari pai bera vavoru pa, retena mo pa vieruana nie tarai pai maso Maria Magdalenai. Nana i mamo Yesus dietavar wainunu vekariria pa rim e muandu nana papo pa. 10Apavo Maria Magdalenai ria tiopanusara vava jana maso siniotu verausara Yesus pasia, aja sesanemi pa sikariria e sesai rami. 11Vape nana rabua setadiawa toapa Yesus tienam ea pa, e Maria siejori pa, amana sesanemitiar va.

Yesus vieruani maso nie verausari pa sandu

(Luk. 24:31-35)

12Janama Yesus vieruani maso nie verausari pa sandu, nana nie tarai viombesiei, nana rabua sunda so aniose pesa. 13Avori susovera e sutopanusara vava jani so sune neta esi pasia, vape sesanemitiar va.

14Vepui pa Yesus vieruani maso Nie verausari sura e siri pasia nana kasau setapi pa. I ma kievo suara sia aso sesanemitiar mo va e sendumi pasi sikarakuai apa sesanemitiara siniotu vesajori to manau pasia toapa Yesus tienam riwanea pa. 15Avori Yesus kievo maso sia e diojo, “Menda raso dunia nei vetutira e metopanusara Allah nie Kavo Vesie nei raso kaiwasa vura. 2 16Teini sanetiar e siemuai kambu masi pa nari siemuai vesie pai. Vape teini sanetiar va nari siemuai hukuman pai. 17Siniotu vesanemitiar jasia ma nari sesamuai paja so senanari pitandor. Nari setatavar wainunu vekariria pasi nana sano ne. Senggavo nana kavo vavoru senduini va. 18Masisi sendu korou pasi pivai setunu pi veriris viono voru pai mamo, kasa sesamuai kariria pai va. Masisi sepir sembarami pasi ajai so siniotu vepota pasia mamo, siniotu jasia nari sepanam.”

19Manau nana Syen Yesus kievo tonine maso sia pa, Allah piosasana Yesus so rora wa, avori miesoi nana Allah nie rawa vata pa.3 20Apavo Nie verausari pasia senda e setopanusara Kavo Vesie pai so uta pasi vura. E Syen nia tutir sia e diono paja maso sia ave senanari pitandor veve ruana toapa kavo senggavora pasi sive vata mo.